ശബരിമല യുവതീപ്രവേശനവുമായി ബന്ധപ്പെട്ട് ദീർഘകാലമായി സുപ്രീം കോടതിയിൽ പരിഗണനയിൽ തുടരുന്ന പുനഃപരിശോധനാ ഹർജികളിൽ ഏപ്രിൽ 7 മുതൽ ഒമ്പതംഗ ഭരണഘടനാ ബെഞ്ച് വാദം കേൾക്കുമെന്ന് സുപ്രീം കോടതി അറിയിച്ചു. രാജ്യവ്യാപകമായി വലിയ സാമൂഹ്യ-മത-നിയമ ചർച്ചകൾക്ക് ഇടയാക്കിയ വിഷയത്തിൽ വീണ്ടും നിർണായകഘട്ടമാണ് ആരംഭിക്കുന്നത്. കേസിൽ ഉൾപ്പെട്ട എല്ലാ കക്ഷികളും തങ്ങളുടെ രേഖാമൂലമുള്ള വാദങ്ങൾ 2026 മാർച്ച് 14-നോ അതിനുമുമ്പോ സമർപ്പിക്കണമെന്നും കോടതി നിർദ്ദേശിച്ചു.

ഏപ്രിൽ 21ന് അധിക വാദം ഉണ്ടെങ്കിൽ സമർപ്പിക്കാമെന്നും സുപ്രീംകോടതി നിർദേശിച്ചു. പുനഃപരിശോധനാ ഹർജികളെ പിന്തുണയ്ക്കുന്നുവെന്നാണ് കേന്ദ്രസർക്കാർ കോടതിയിൽ നിലപാട് അറിയിച്ചിരിക്കുന്നത്. ശബരിമലയിൽ യുവതി പ്രവേശനം അനുവദിച്ച സുപ്രീംകോടതി വിധിയെ ചോദ്യം ചെയ്തുകൊണ്ട് സമർപ്പിച്ച പുനഃപരിശോധനാ ഹർജികൾക്ക് ഒപ്പമാണ് തങ്ങൾ എന്നാണ് കേന്ദ്രം വ്യക്തമാക്കിയിരിക്കുന്നത്.

2018ൽ അഞ്ചംഗ ഭരണഘടനാ ബെഞ്ച് 10 മുതൽ 50 വയസ്സ് വരെയുള്ള സ്ത്രീകൾക്ക് ശബരിമലയിൽ പ്രവേശനം അനുവദിച്ച വിധി പുറപ്പെടുവിച്ചിരുന്നു. ആ വിധിക്കെതിരെ നിരവധി പുനഃപരിശോധനാ ഹർജികൾ സമർപ്പിക്കപ്പെട്ടു. തുടർന്ന് 2019ൽ സുപ്രീം കോടതി വിഷയം വിശാലമായ ഭരണഘടനാ ചോദ്യങ്ങളിലേക്ക് പരിഗണിക്കേണ്ടതുണ്ടെന്ന് നിരീക്ഷിച്ച് വലിയ ബെഞ്ചിന് വിടുകയായിരുന്നു.
മതസ്വാതന്ത്ര്യം, വിശ്വാസപരമായ ആചാരങ്ങൾ, ലിംഗസമത്വം, ഭരണഘടനാപരമായ അവകാശങ്ങൾ തുടങ്ങിയ നിർണായക വിഷയങ്ങൾ കേസിൽ ഉയർന്നിട്ടുണ്ട്. മതസംഘടനകളുടെ ആചാരങ്ങൾക്ക് ഭരണഘടന നൽകുന്ന പരിരക്ഷയുടെ പരിധി എന്തെന്നതും സ്ത്രീകളുടെ സമത്വാവകാശം എങ്ങനെ ഉറപ്പാക്കണമെന്നതുമാണ് പ്രധാന ചർച്ചാവിഷയങ്ങൾ.

ഏപ്രിൽ 7 മുതൽ ആരംഭിക്കുന്ന വാദം രാജ്യത്തുടനീളം ശ്രദ്ധയാകർഷിക്കുന്നതായിരിക്കും. ഭരണഘടനാ ബെഞ്ചിന്റെ അന്തിമ വിധി ശബരിമലയെ മാത്രമല്ല, രാജ്യത്തെ മറ്റ് മതാചാരങ്ങളുമായി ബന്ധപ്പെട്ട കേസുകൾക്കും നിർണായകമായ മാർഗ്ഗരേഖയായേക്കുമെന്നാണ് നിയമവിദഗ്ധർ വിലയിരുത്തുന്നത്.

Photo courtesy : Google /images may be subject to copyright