ഐപിഎൽ ചരിത്രത്തിലെ റെക്കോർഡ് തുകയ്ക്ക് റോയൽ ചലഞ്ചേഴ്‌സ് ബെംഗളൂരുവിനെ (RCB) പുതിയ സംരംഭക സഖ്യം സ്വന്തമാക്കി. പ്രമുഖ വ്യവസായി കുമാർ മംഗലം ബിർളയുടെ നേതൃത്വത്തിലുള്ള ആദിത്യ ബിർള ഗ്രൂപ്പ് ഉൾപ്പെട്ട സംയുക്ത സംരംഭമാണ് ടീമിനെ ഏറ്റെടുത്തത്. ഏകദേശം 1.78 ബില്യൺ ഡോളർ (ഏകദേശം 15,000 കോടിയിലധികം രൂപ) എന്ന വമ്പൻ തുകയ്ക്കാണ് ഈ ചരിത്രപരമായ കൈമാറ്റം നടന്നതെന്നാണ് റിപ്പോർട്ടുകൾ സൂചിപ്പിക്കുന്നത്. നേരത്തെ രാജസ്ഥാൻ റോയൽസ് 1.63 ബില്യൺ ഡോളറിന് വിറ്റുപോയതായിരുന്നു ഐപിഎല്ലിലെ ഇതുവരെയുള്ള ഏറ്റവും ഉയർന്ന റെക്കോർഡ്. ആ റെക്കോർഡ് തുകയെ പിന്തള്ളിക്കൊണ്ടാണ് ആർസിബി ഇപ്പോൾ വിപണി മൂല്യത്തിൽ ഒന്നാമതെത്തിയിരിക്കുന്നത്.

ബ്രിട്ടീഷ് മദ്യക്കമ്പനിയായ ഡയാജിയോയുടെ ഉടമസ്ഥതയിലുള്ള യുണൈറ്റഡ് സ്പിരിറ്റ്‌സ് ലിമിറ്റഡിൽ നിന്നാണ് ബിർള ഗ്രൂപ്പിന്റെ നേതൃത്വത്തിലുള്ള സഖ്യം ടീമിനെ വാങ്ങിയത്. കുമാർ മംഗലം ബിർളയുടെ മകനും മുൻ ക്രിക്കറ്റ് താരവുമായ ആര്യമാൻ വിക്രം ബിർള ടീമിന്റെ പുതിയ ചെയർമാനായി ചുമതലയേൽക്കും. ആദിത്യ ബിർള ഗ്രൂപ്പിന് പുറമെ ടൈംസ് ഓഫ് ഇന്ത്യ ഗ്രൂപ്പ്, ബോൾട്ട് വെഞ്ചേഴ്‌സ്, ബ്ലാക്ക്‌സ്റ്റോൺ തുടങ്ങിയ പ്രമുഖ നിക്ഷേപകരും ഈ സംയുക്ത സംരംഭത്തിൽ പങ്കാളികളാണ്. പുരുഷ ടീമിനൊപ്പം തന്നെ വനിതാ പ്രീമിയർ ലീഗിലെ (WPL) ആർസിബി ടീമിന്റെ ഉടമസ്ഥാവകാശവും ഈ കരാറിലൂടെ പുതിയ ഉടമകൾക്ക് ലഭിക്കും.

2008-ൽ ഐപിഎൽ ആരംഭിക്കുമ്പോൾ വെറും 111 മില്യൺ ഡോളറിന് വിജയ് മല്യ വാങ്ങിയ ടീമാണ് 18 വർഷങ്ങൾക്കിപ്പുറം പതിനായിരക്കണക്കിന് കോടി രൂപയുടെ മൂല്യത്തിലേക്ക് വളർന്നിരിക്കുന്നത്. വിരാട് കോലിയെപ്പോലുള്ള സൂപ്പർ താരങ്ങളുടെ സാന്നിധ്യവും ആർസിബി എന്ന ബ്രാൻഡിന് ലോകമെമ്പാടുമുള്ള ആരാധക പിന്തുണയുമാണ് ഇത്രയും വലിയൊരു തുകയ്ക്ക് ടീം വിറ്റുപോകാന് കാരണമായത്. 2025-ൽ തങ്ങളുടെ കന്നി ഐപിഎൽ കിരീടം ടീം സ്വന്തമാക്കിയതോടെ ബ്രാൻഡ് മൂല്യം വലിയ തോതിൽ വർദ്ധിച്ചിരുന്നു. ബിസിസിഐയുടെ ഔദ്യോഗിക നടപടികൾ പൂർത്തിയാകുന്നതോടെ ടീമിന്റെ പൂർണ്ണ നിയന്ത്രണം പുതിയ സഖ്യത്തിന് കൈമാറും

Photo Courtesy: Google/ images are subject to copyright