പശ്ചിമേഷ്യയിൽ യുദ്ധം രൂക്ഷമാകുകയും ഹോർമുസ് കടലിടുക്ക് (Strait of Hormuz) വഴിയുള്ള ചരക്കുനീക്കം തടസ്സപ്പെടുകയും ചെയ്ത സാഹചര്യത്തിൽ, ഇന്ത്യയുടെ ഊർജ്ജ സുരക്ഷ ഉറപ്പാക്കാൻ റഷ്യയിൽ നിന്ന് വൻതോതിൽ ക്രൂഡ് ഓയിൽ ഇറക്കുമതി ചെയ്യുന്നു. ഏപ്രിൽ മാസത്തെ വിതരണത്തിനായി ഏകദേശം 6 കോടി ബാരൽ റഷ്യൻ എണ്ണയാണ് ഇന്ത്യൻ റിഫൈനറികൾ ഇതിനോടകം ബുക്ക് ചെയ്തിരിക്കുന്നത്. അമേരിക്കൻ ഉപരോധങ്ങളിൽ ലഭിച്ച ഭാഗികമായ ഇളവുകൾ പ്രയോജനപ്പെടുത്തിയാണ് ഈ നീക്കം.

പശ്ചിമേഷ്യയിലെ സംഘർഷം മൂലം ഗൾഫ് രാജ്യങ്ങളിൽ നിന്നുള്ള എണ്ണ വരവ് കുറയാനുള്ള സാധ്യത കണക്കിലെടുത്താണ് ഇന്ത്യ വിതരണ ശൃംഖല വൈവിധ്യവൽക്കരിക്കുന്നത്. റഷ്യയെ കൂടാതെ വെനസ്വേലയിൽ നിന്നും കൂടുതൽ എണ്ണ എത്തിക്കാൻ ഇന്ത്യ പദ്ധതിയിടുന്നുണ്ട്. ഏപ്രിൽ മാസത്തിൽ വെനസ്വേലയിൽ നിന്ന് 80 ലക്ഷം ബാരൽ എണ്ണ ഇറക്കുമതി ചെയ്യാനാണ് തീരുമാനം. 2020 ഒക്ടോബറിന് ശേഷമുള്ള ഏറ്റവും ഉയർന്ന ഇറക്കുമതി നിരക്കാണിത്.

ഇന്ത്യയുടെ എണ്ണ ആവശ്യകതയുടെ 85 ശതമാനത്തിലധികം ഇറക്കുമതിയെയാണ് ആശ്രയിക്കുന്നത്. പശ്ചിമേഷ്യയിലെ സംഘർഷം മൂലം ക്രൂഡ് ഓയിൽ വില വർദ്ധിക്കുന്നത് രാജ്യത്തെ പണപ്പെരുപ്പത്തെയും സമ്പദ്‌വ്യവസ്ഥയെയും ബാധിക്കുമെന്നതിനാൽ, കുറഞ്ഞ നിരക്കിൽ എണ്ണ ലഭ്യമാക്കാനാണ് സർക്കാർ ശ്രമിക്കുന്നത്. റഷ്യൻ എണ്ണയ്ക്ക് ലഭിക്കുന്ന ഡിസ്കൗണ്ടും വെനസ്വേലയുമായുള്ള പുതിയ കരാറുകളും ആഭ്യന്തര വിപണിയിൽ ഇന്ധനവില നിയന്ത്രിക്കാൻ സഹായിക്കുമെന്നാണ് വിലയിരുത്തൽ.

Photo Courtesy: Google/ images are subject to copyright