ഇന്ത്യൻ പ്രീമിയർ ലീഗ് (ഐപിഎൽ) 2026 സീസണിൻ്റെ ആദ്യഘട്ട മത്സരക്രമം പ്രഖ്യാപിച്ചു. നിലവിലെ ചാമ്പ്യന്മാരായ റോയൽ ചലഞ്ചേഴ്സ് ബെംഗളൂരുവും സൺറൈസേഴ്സ് ഹൈദരാബാദും തമ്മിലാണ് ഉദ്ഘാടന മത്സരം

മാർച്ച് 28 ശനിയാഴ്ച ബെംഗളൂരുവിലെ എം. ചിന്നസ്വാമി സ്റ്റേഡിയത്തിലാണ് ആദ്യ മത്സരം നടക്കുക. പുതിയ സീസണിനായുള്ള ആദ്യഘട്ട മത്സരങ്ങൾ ബെംഗളൂരു ഉൾപ്പെടെയുള്ള വിവിധ വേദികളിൽ നടത്താനാണ് തീരുമാനം. ഉച്ചകഴിഞ്ഞ് 3:30-നും വൈകിട്ട് 7:30-നുമാണ് മത്സരങ്ങൾ. ഉദ്ഘാടന മത്സരത്തിന് പിന്നാലെ ഞായറാഴ്ച മുംബൈയിലെ വാങ്കഡെ സ്റ്റേഡിയത്തിൽ മുംബൈ ഇന്ത്യൻസ് കൊൽക്കത്ത നൈറ്റ് റൈഡേഴ്സിനെ നേരിടും.

ആദ്യഘട്ടത്തിൽ ബെംഗളൂരു, മുംബൈ, ഗുവാഹത്തി, ന്യൂ ചണ്ഡീഗഡ്, ലഖ്നൗ, കൊൽക്കത്ത, ചെന്നൈ, ഡൽഹി, അഹമ്മദാബാദ്, ഹൈദരാബാദ് എന്നിങ്ങനെ പത്ത് നഗരങ്ങളിലായി ആകെ 20 മത്സരങ്ങളാണ് നടക്കുക. ഈ ഘട്ടത്തിൽ നാല് ഡബിൾ ഹെഡറുകൾ (ഒരു ദിവസം രണ്ട് മത്സരങ്ങൾ) ഉണ്ടായിരിക്കും.

രാജസ്ഥാൻ റോയൽസ് തങ്ങളുടെ ഹോം മത്സരങ്ങൾക്ക് ഗുവാഹത്തിയിൽ തുടക്കം കുറിക്കും. ചെന്നൈ സൂപ്പർ കിംഗ്‌സ്, മുംബൈ ഇന്ത്യൻസ് എന്നിവർക്കെതിരെയുള്ള മത്സരങ്ങൾ ഇവിടെയായിരിക്കും നടക്കുക. പഞ്ചാബ് കിംഗ്‌സ് അവരുടെ ആദ്യ ഹോം മത്സരങ്ങൾ ന്യൂ ചണ്ഡീഗഡിലെ പിസിഎ സ്റ്റേഡിയത്തിൽ കളിക്കും.

ഐപിഎൽ ആരാധകർ ഏറെ ആകാംക്ഷയോടെ കാത്തിരിക്കുന്ന ടൂർണമെന്റിന്റെ ആദ്യ മത്സരം തന്നെ ശക്തമായ പോരാട്ടമാകുമെന്നാണ് കായികലോകം വിലയിരുത്തുന്നത്. ആദ്യഘട്ട മത്സരക്രമത്തിലെ മറ്റു മത്സരങ്ങളുടെ വിശദാംശങ്ങളും ഉടൻ പുറത്തുവിടുമെന്നാണ് അധികൃതർ അറിയിച്ചത്.

Photo Courtesy: Google/ images are subject to copyright