ഡോക്ടർമാർ, രോഗികളുടെ ജീവിതത്തിലെ ഏറ്റവും നിർണ്ണായകമായ നിമിഷങ്ങളിൽ അവർക്ക് ആശ്വാസവും പ്രത്യാശയും പകരുന്നവരാണ്. ഇത്തരത്തിൽ പലപ്പോഴും സമൂഹത്തെ താങ്ങിനിർത്തുന്ന നിശബ്ദശക്തികളാണിവർ. കടുത്ത സമ്മർദ്ദങ്ങൾക്കിടയിലും വലിയ ഉത്തരവാദിത്വത്തോടെ മറ്റുള്ളവരുടെ ആരോഗ്യം സംരക്ഷിക്കാൻ സ്വയം സമർപ്പിക്കേണ്ട ഒരു മേഖലയാണ് വൈദ്യവൃത്തി. ചികിത്സയ്ക്കും ശസ്ത്രക്രിയകൾക്കുമപ്പുറം രോഗികളുടെ ആശങ്കകളും ഭയവുമകറ്റി അവർക്ക് ആശ്വാസവും ആത്മവിശ്വാസവും പകരുകയെന്നൊരു മഹത്തായ ദൗത്യവും ഡോക്ടർമാർക്കുണ്ട്. അവരുടെ സമർപ്പണവും വൈദഗ്ദ്ധ്യവും, കരുണയും ആശുപത്രികളുടെമതിലുകൾക്കുപുറത്ത് സമൂഹത്തെയും കുടുംബങ്ങളെയും വ്യക്തികളെയും കൂടുതൽ ശക്തമാക്കുന്നു.
യൂണീക്ക് ടൈംസുമായുള്ള ഈ പ്രത്യേക അഭിമുഖത്തിൽ, മികവ്, പ്രതിബദ്ധത, രോഗി പരിചരണത്തോടുള്ള അഭിനിവേശം എന്നിവകൊണ്ട് ശ്രദ്ധേയനായ, ആസ്റ്റർ മെഡ്സിറ്റിയിലെ സെന്റർ ഓഫ് എക്സലൻസ് ഇൻ ഓർത്തോപീഡിക്സിലെ കൺസൾട്ടന്റ് ഓർത്തോപീഡിക് സർജൻ ഡോ. വിജയ മോഹൻന്റെ മെഡിക്കൽ യാത്രയും അനുഭവങ്ങളും ഓർത്തോപീഡിക് മേഖലയിലെ നൂതനസാധ്യതകളെക്കുറിച്ചുള്ള കാഴ്ച്ചപ്പാടുകളും പങ്കുവയ്ക്കുന്നു.

വിവിധ രാജ്യങ്ങളിലെയും സംസ്കാരങ്ങളിലൂടെയും താങ്കൾ നേടിയ പരിശീലനവും പ്രവൃത്തിപരിചയവും കരിയറിന്റെ തുടക്കത്തിൽ തന്നെ താങ്കൾ ആഗ്രഹിക്കുന്ന തരത്തിലുള്ള ഡോക്ടറാകണമെന്ന് തീരുമാനിക്കാൻ പ്രേരിപ്പിച്ച ഒരു പ്രത്യേക നിമിഷം ഉണ്ടായിരുന്നോ?
അധ്യാപകരുടെ കുടുംബത്തിൽ വളർന്നതുകൊണ്ടുതന്നെ വിദ്യാഭ്യാസത്തിനും സാമൂഹിക ഉത്തരവാദിത്വങ്ങൾക്കും ഞങ്ങളുടെ കുടുംബത്തിൽ വളരെ പ്രാധാന്യം കൽപ്പിച്ചിരുന്നു. എന്റെ പഠനം ആരംഭിച്ചത് ഒരു ഗ്രാമീണ സ്കൂളിലാണ്. അക്കാലത്ത് മെഡിക്കൽ പ്രൊഫഷൻ ഏറ്റവും ആദരണീയമായ ഒരു കരിയറായിട്ടാണ് കണക്കാക്കപ്പെട്ടിരുന്നത്. എന്റെ സ്കൂളിലെ ഏറ്റവും മികച്ച വിദ്യാർത്ഥിയായിരുന്നു ഞാൻ. അതുകൊണ്ടുതന്നെ എന്റെ കുടുംബാംഗങ്ങളും അധ്യാപകരും എന്നെ വൈദ്യശാസ്ത്രം പിന്തുടരാൻ പ്രോത്സാഹിപ്പിച്ചു. ചിലർ പൊതുസേവനമേഖലയായ സിവിൽ സർവീസ് നിർദ്ദേശിച്ചു. അങ്ങനെ പ്രചോദനപരമായ അന്തരീക്ഷത്തിൽ വളർന്നുവന്ന എന്റെ മനസ്സിൽ കുട്ടിക്കാലം മുതൽക്കേ ഒരു ഡോക്ടർ എന്ന സ്വപ്നം ഉടലെടുക്കുകയും വളരുന്തോറും ആ സ്വപ്നം എന്നോടൊപ്പം വളർന്ന് ദൃഢമാകുകയും ചെയ്തു. എന്റെ ഹൈസ്കൂൾ പഠനകാലത്ത് കേരളത്തിലുണ്ടായ മാർക്ക് കുംഭകോണം എനിക്ക് ഇപ്പോഴും ഓർമ്മയുണ്ട്. അതിനുശേഷം പ്രവേശന പരീക്ഷാ സമ്പ്രദായം നിലവിൽ വന്നപ്പോൾ ഡോക്ടറാകുക എന്ന സ്വപ്നം യാഥാർത്ഥ്യപരവും എനിക്ക് നേടിയെടുക്കാവുന്നതുമായ സാധ്യതയായി അനുഭവപ്പെട്ടു.

തിരുവനന്തപുരം മെഡിക്കൽ കോളേജിൽ പഠിക്കുന്ന സമയത്ത്, ഞാൻ വിദ്യാർത്ഥി യൂണിയൻ പ്രവർത്തനങ്ങളിൽ സജീവമായി പങ്കെടുക്കുകയും കോളേജ് യൂണിയൻ ചെയർമാനായും സേവനമനുഷ്ഠിക്കുകയും ചെയ്തു. ഈ പദവിയിലൂടെ ഡോ. ജോയ് ഫിലിപ്പ്, ഡോ. അക്ബർ, ഡോ. സോമൻ, ഡോ. ശിവശങ്കരപ്പിള്ള, ഡോ. ഏലിക്കുട്ടി തുടങ്ങിയ പ്രമുഖ ഡോക്ടർമാരുമായി അടുത്തിടപഴകാൻ എനിക്ക് അവസരം ലഭിച്ചു. ഈ വ്യക്തിത്വങ്ങളാണ് വൈദ്യശാസ്ത്രത്തെക്കുറിച്ചും ജീവിതത്തെക്കുറിച്ചുമുള്ള എന്റെ കാഴ്ചപ്പാടുകളെ രൂപപ്പെടുത്തിയത്.
തുടർന്ന് ശസ്ത്രക്രിയയിലെ അതികായന്മാരായ, തിരുവനന്തപുരത്തെ ഡോ. ഹരിദാസ്, കൊല്ലത്തെ ഡോ. മോഹൻ, എറണാകുളത്തെ ഡോ. ഭാസ്കരൻ എന്നിവർ ശസ്ത്രക്രിയയുടെ ആഴത്തിലും സൂഷ്മതയിലുമുള്ള അറിവുകൾ പകർന്നുതന്ന് ഇന്നത്തെ ശസ്ത്രക്രിയാ വിദഗ്ദ്ധനായി എന്നെ വാർത്തെടുക്കാൻ സഹായിച്ചു. എന്നിരുന്നാലും, കുട്ടിക്കാലത്ത് ശുദ്ധമായ ഗ്രാമാന്തരീക്ഷത്തിൽ ഞാൻ സ്വാംശീകരിച്ച മൂല്യങ്ങളായ മനുഷ്യബന്ധങ്ങളുടെ വില, ലാളിത്യം, സഹാനുഭൂതി എന്നിവ, ലോകത്തെയും എന്റെ സഹമനുഷ്യരെയും ഞാൻ എങ്ങനെ കാണുന്നുവെന്നതിൽ ഏറ്റവും വലിയ സ്വാധീനം ചെലുത്തിയിട്ടുണ്ടെന്ന് ഞാൻ ശക്തമായി വിശ്വസിക്കുന്നു. സമൂഹത്തെ സേവിക്കുന്ന ഒരു ഡോക്ടർ എന്ന നിലയിൽ എന്റെ വ്യക്തിത്വം രൂപപ്പെടുത്തുന്നതിൽ എന്റെ മാതൃവിദ്യാഭ്യാസ സ്ഥാപനമായ തിരുവനന്തപുരം മെഡിക്കൽ കോളേജ് നിർണ്ണായക പങ്ക് വഹിച്ചിട്ടുണ്ടെന്നതിൽ സംശയമില്ല.

പലപ്പോഴും ആളുകളുടെ ചലനശേഷിയും ആത്മവിശ്വാസവും തിരികെ നൽകുന്ന ഒന്നാണ് സന്ധി മാറ്റിവയ്ക്കൽ ശസ്ത്രക്രിയ. ഇതിലൂടെ ഒരാളുടെ ജീവിതത്തിൽ ഏറെ മാറ്റം വന്നതായി താങ്കളുടെ ഓർമ്മയിൽ നിൽക്കുന്ന അനുഭവമുണ്ടോ?
അത്തരം നിരവധി കഥകളുണ്ട്, അതിൽ ചിലത് ആഴത്തിൽ വേറിട്ടുനിൽക്കുന്നു. ഞങ്ങളുടെ എസ്എസ്എൽസി ബാച്ച് പുനഃസമാഗമങ്ങളിലൊന്നിൽ, ഒരു സഹപാഠി ഏകദേശം രണ്ട് വർഷമായി കിടപ്പിലാണെന്ന് ഞങ്ങൾ മനസ്സിലാക്കി. ഞങ്ങൾ അവരെ സന്ദർശിച്ചപ്പോൾ, അവർക്ക് റൂമറ്റോയ്ഡ് ആർത്രൈറ്റിസ് ബാധിച്ചിട്ടുണ്ടെന്നും പ്രാദേശിക പരമ്പരാഗത വൈദ്യശാസ്ത്രത്തിലൂടെയുള്ള ചികിത്സയിലാണെന്നും ഞങ്ങൾ മനസ്സിലാക്കി. ശരിയായ വിലയിരുത്തലിന് ശേഷം, ഞങ്ങൾ അവർക്ക് ഉചിതമായ വൈദ്യചികിത്സ നൽകി. ഞങ്ങളുടെ ബാച്ച് ഒത്തുചേർന്ന് സാമ്പത്തിക സഹായം ക്രമീകരിച്ചു, ഞാൻ അവർക്ക് ഒരു ദ്വിതീയ കാൽമുട്ട് മാറ്റിവയ്ക്കൽ ശസ്ത്രക്രിയ നടത്തി. ഇന്ന്, അവർ സജീവമായ ജീവിതത്തിലേക്ക് മടങ്ങി, സന്തോഷത്തോടെ ജീവിക്കുന്നു.

മറ്റൊരു കേസിൽ ഒരു പിക്കപ്പ് വാനും മോട്ടോർ സൈക്കിളുമായി ഇടിച്ചുണ്ടായ ഗുരുതരമായ അപകടത്തിൽപ്പെട്ട 40 വയസ്സുള്ള ഒരു വ്യക്തിയുടെ മിക്കവാറും എല്ലാ അസ്ഥികളും ഒടിഞ്ഞ അവസ്ഥയിലായിരുന്നു. ഒന്നിലധികം ശസ്ത്രക്രിയകളിലൂടെ, ഫ്രാക്ചർ ഭേദമാക്കുകയും ഒപ്പം പ്രാഥമിക കാൽമുട്ട് മാറ്റിവയ്ക്കൽ ശസ്ത്രക്രിയയിലൂടെ, അദ്ദേഹം ചലനശേഷി വീണ്ടെടുക്കുകയും ചെയ്തു. അപകടം കണ്ട പലർക്കും അദ്ദേഹം അതിജീവിക്കില്ലെന്ന് ഉറപ്പായിരുന്നു. ഇന്ന്, അദ്ദേഹം വിജയകരമായ ഒരു ബിസിനസ്സ് നടത്തുന്നു, അദ്ദേഹത്തിന്റെ രണ്ട് പെൺമക്കൾ ഉന്നത വിദ്യാഭ്യാസം പൂർത്തിയാക്കി പ്രൊഫഷണലുകളായി പ്രവർത്തിക്കുന്നു. ഞങ്ങൾ ഇപ്പോഴും അടുത്ത ബന്ധം പുലർത്തുന്നു.
റൂമറ്റോയ്ഡ് ആർത്രൈറ്റിസ് ബാധിച്ച് ചികിത്സിക്കാൻ നിവർത്തിയില്ലാതെ മരണക്കിടക്കയിൽ കിടക്കുന്ന 45 വയസ്സുള്ള ഒരു സ്ത്രീയെ ഒരു സാമൂഹിക പ്രവർത്തകൻ കണ്ടെത്തുകയും, ശരിയായ യാത്രാ ചെലവ് താങ്ങാൻ കഴിയാത്തതിനാൽ തിരുവനന്തപുരത്ത് നിന്ന് ഒരു ഓട്ടോറിക്ഷയിൽ അവരെ എന്റെ അടുക്കൽ അദ്ദേഹം കൊണ്ടുവരികയും ചെയ്തു. അവരുടെ ഭർത്താവ് അവരെ ഉപേക്ഷിച്ചുപോയിരുന്നു. ഞാൻ അവരെ ഉടൻ തന്നെ ആശുപത്രിയിൽ പ്രവേശിപ്പിക്കുകയും ആശുപത്രിയുടെ സഹായത്തോടെ സാമ്പത്തിക സഹായം ക്രമീകരിച്ച് ഉചിതമായ ചികിത്സ ആരംഭിക്കുകയും ചെയ്തു. അവർ സുഖം പ്രാപിക്കുകയും ചെയ്തു. ഇരു കൈകാലുകളുടെയും ജന്മനാ വൈകല്യങ്ങളുള്ള ഇടുക്കിയിൽ നിന്നുള്ള ആ സ്ത്രീയും സന്തോഷകരമായ ഒരു ജീവിതത്തിലേക്ക് മടങ്ങി.

റോബോട്ടിക്, കംപ്യൂട്ടർ എന്നിങ്ങനെയുള്ള നൂതനസാങ്കേതികവിദ്യകളിലൂടെയുള്ള ശസ്ത്രക്രിയകളുടെ ഗുണങ്ങളും സുരക്ഷയും വിശദമാക്കാമോ?
സന്ധി മാറ്റിസ്ഥാപിക്കൽ ശസ്ത്രക്രിയ അടിസ്ഥാനപരമായി മെഡിക്കൽ സയൻസ്, മെറ്റീരിയൽ സയൻസ്, ഭൗതികശാസ്ത്രം, ഗണിതശാസ്ത്രം എന്നിവയുടെ സംയോജനമാണ്. കൃത്രിമ സന്ധികൾ ശരീരത്തിന്റെ മെക്കാനിക്കൽ അച്ചുതണ്ടിൽ കൃത്യമായി വിന്യസിക്കുകയും ദീർഘകാലവിജയത്തിനായി ശരിയായി സന്തുലിതമാക്കുകയും വേണം. മനുഷ്യപിശകുകൾ കുറയ്ക്കുന്നതിലൂടെ ഈ വിന്യാസതത്വങ്ങൾ കൂടുതൽ കൃത്യതയോടെ കണക്കാക്കാനും നടപ്പിലാക്കാനും സഹായിക്കുന്ന താരതമ്യേന പുതിയ ഉപകരണങ്ങളാണ് റോബോട്ടിക്സും മെഷീൻ ലേണിംഗും. ഓഗ്മെന്റഡ് റിയാലിറ്റി, ആർട്ടിഫിഷ്യൽ ഇന്റലിജൻസ്, മെഷീൻ ലേണിംഗ് തുടങ്ങിയ നൂതനാശയങ്ങൾ ക്രമേണ ഓർത്തോപീഡിക് ശസ്ത്രക്രിയയിൽ സംയോജിപ്പിക്കപ്പെടുന്നു. നിലവിൽ, ഈ സാങ്കേതികവിദ്യകൾ ഇപ്പോഴും പ്രാരംഭഘട്ടത്തിലാണ്, എന്നാൽ അടുത്ത ദശകത്തിൽ, അവ ശസ്ത്രക്രിയാകൃത്യതയും വിജയഫലങ്ങളും ഗണ്യമായി വർദ്ധിപ്പിക്കുമെന്ന് ഞാൻ വിശ്വസിക്കുന്നു.
വൈദ്യശാസ്ത്രത്തിലെ ഏറ്റവും വലിയ പ്രതിഫലം പണമോ പ്രശസ്തിയോ അല്ല, മറിച്ച് മനുഷ്യജീവിതങ്ങളിൽ നമുക്ക് ചെലുത്താൻ കഴിയുന്ന ആഴത്തിലുള്ള സ്വാധീനമാണെന്ന് ഈ അനുഭവങ്ങൾ എന്നെ ഓർമ്മിപ്പിക്കുന്നു.

റിവിഷൻ സർജറികൾ പലപ്പോഴും രോഗികൾക്ക് കൂടുതൽ സങ്കീർണ്ണവും വൈകാരികമായി വെല്ലുവിളി നിറഞ്ഞതുമാണ്. ശസ്ത്രക്രിയയിലൂടെയും വൈകാരികമായും ഈ കേസുകളെ താങ്കൾ എങ്ങനെ സമീപിക്കുന്നു?
മുൻപ് ഇംപ്ലാന്റ് ചെയ്ത സന്ധികളിലെ അണുബാധയോ അസെപ്റ്റിക് അയവ് മൂലമോ സാധാരണയായി റിവിഷൻ സർജറികൾ ആവശ്യമായിവരുന്നു. ഈ സാഹചര്യങ്ങൾ രോഗികൾക്ക് ശാരീരികമായും മാനസികമായും വളരെ ബുദ്ധിമുട്ടുളവാക്കുന്നു. സാമ്പത്തിക പ്രശ്നങ്ങൾക്ക് പുറമേ, മുൻകാല ശസ്ത്രക്രിയ അനുഭവങ്ങൾ കാരണം രോഗികൾക്ക് പലപ്പോഴും നിരാശയും ഭയവും ഉണ്ടാകുന്നു. വിശ്വാസം നഷ്ടപ്പെടുന്ന സാഹചര്യങ്ങൾ നേരിടേണ്ടിവരുന്നു. അത്തരം സാഹചര്യങ്ങളിൽ രോഗികളുമായി മതിയായ സമയം ചെലവഴിക്കേണ്ടത് നിർണ്ണായകമാണ്. മുൻ ശസ്ത്രക്രിയയുടെ പരാജയത്തിന്റെ കാരണങ്ങളും ലഭ്യമായ തിരുത്തൽ നടപടികളും ക്ഷമയോടെ വിശദീകരിച്ച്, അവരുടെ ആത്മവിശ്വാസം പുനഃസ്ഥാപിക്കുകയെന്നത് വളരെ പ്രധാനമാണ്.
ഒരു ശസ്ത്രക്രിയാ വീക്ഷണകോണിൽ, റിവിഷൻ സർജറി രണ്ടാമത്തെ പ്രാഥമിക ശസ്ത്രക്രിയയുടെ ആവർത്തനം മാത്രമല്ല അതിനേക്കാൾ ഏറെ സങ്കീർണ്ണമായ പ്രക്രിയയാണ്. സർജന്റെ അനുഭവത്തെയും വൈദഗ്ധ്യത്തെയും ആശ്രയിച്ചിരിക്കും അതിന്റെ ഫലങ്ങൾ. അതുകൊണ്ടുതന്നെ ഈ സങ്കീർണ്ണമായ നടപടിക്രമങ്ങളിൽ മതിയായ പരിചയവും പരിശീലനവും ഉള്ള സർജന്മാർ മാത്രമേ റിവിഷൻ സർജറികൾ ഏറ്റെടുക്കാവൂ.

താങ്കൾ സർക്കാർ ആശുപത്രികളിലും ലോകോത്തരനിലവാരത്തിലുള്ള സ്വകാര്യ ആശുപത്രികളിലും പ്രവർത്തിച്ചിട്ടുണ്ട്. ഈ രണ്ടനുഭവങ്ങളിൽ ശ്രദ്ധേയമായിത്തോന്നിയ വ്യത്യാസങ്ങൾ എന്തൊക്കെയാണ്? ഓരോ സാഹചര്യങ്ങളിൽ നിന്നും താങ്കൾ സ്വായത്തമാക്കിയതെന്തൊക്കെയാണ്?
അവ രണ്ട് വ്യത്യസ്ത ലോകങ്ങളാണ്, എന്നാൽ നമ്മുടേതുപോലുള്ള ഒരു രാജ്യത്ത്, രണ്ടും പരസ്പരപൂരകമായി നിലനിൽക്കണം. പൊതു ആശുപത്രികളിൽ, രോഗികളുടെ തിരക്ക് വളരെക്കൂടുതലായതിനാൽ ഡോക്ടർമാർ ഉൾപ്പെടുന്ന ആരോഗ്യപ്രവർത്തകർ അത്യന്തം സമ്മർദ്ദത്തിൽ ജോലി ചെയ്യേണ്ടിവരുന്നു. അതിനാൽ സേവനത്തിന്റെ ഗുണനിലവാരം പലപ്പോഴും വിട്ടുവീഴ്ച ചെയ്യപ്പെടുന്നു, കൂടാതെ ഈ സ്ഥാപനങ്ങളുടെ പ്രവർത്തനത്തെ സംസ്ഥാനത്തിന്റെ ഭരണപരവും സാമ്പത്തികപരവുമായ സ്ഥിതി വളരെയധികം സ്വാധീനിക്കുന്നു. മറുവശത്ത്, ഉന്നതതല സ്വകാര്യ സ്ഥാപനങ്ങൾക്ക് ആധുനിക വൈദ്യശാസ്ത്രത്തിലെ ഏറ്റവും പുതിയ സാങ്കേതികവിദ്യകളും ചികിത്സാരീതികളും വേഗത്തിൽ പ്രാവർത്തികമാക്കി രോഗികൾക്ക് നൽകാൻ സാധിക്കും. അതിനാൽ ചികിത്സാസൗകര്യങ്ങളിലും സേവന നിലവാരത്തിലും ഏറെ മുന്നിൽ നിൽക്കാൻ അവർക്ക് സാധിക്കുന്നത്.

ഇതൊരു വിശാലമായ വിഷയമാണ്, എന്നിരുന്നാലും സഹകരണ മേഖലാ മാതൃകകളിലൂടെയോ ഒരുപക്ഷേ പൊതു-സ്വകാര്യ പങ്കാളിത്തത്തിലൂടെയോ, രണ്ട് സംവിധാനങ്ങളുടെയും പ്രയോജനങ്ങൾ കൂട്ടിച്ചേർത്ത് പൊതുജനങ്ങളിലേക്ക് എത്തിച്ചേരുന്നുവെന്ന് ഉറപ്പാക്കാൻ സഹായിക്കുമെന്ന് ഞാൻ ശക്തമായി വിശ്വസിക്കുന്നു.

അധ്യാപനവും മെന്ററിങ്ങും താങ്കളുടെ ഹൃദയത്തോട് ഏറെ ചേർന്നുനിൽക്കുന്നതായി തോന്നുന്നു. യുവ ശസ്ത്രക്രിയാ വിദഗ്ധരെ പരിശീലിപ്പിക്കുമ്പോൾ താങ്കളെ ഏറ്റവും സന്തോഷിപ്പിക്കുന്നതെന്താണ്?

ഒരു നല്ല ഡോക്ടർ ഒരേ സമയം ഒരു നല്ല അധ്യാപകനുമായിരിക്കണമെന്ന് ഞാൻ ഉറച്ചുവിശ്വസിക്കുന്നു. ഒരു ഡോക്ടറുടെ ഉത്തരവാദിത്വം രോഗചികിത്സയ്ക്കപ്പുറം ആരോഗ്യകരമായ ജീവിതത്തിലേക്ക് പൊതുജനങ്ങളെ നയിക്കുകയും അതോടൊപ്പം ബോധവൽക്കരിക്കുകയുംചെയ്യുന്നതിൽ ഉൾപ്പെടുന്നു.

ജൂനിയർ ഡോക്ടർമാരെ പരിശീലിപ്പിക്കുമ്പോൾ, നമ്മുടെ സ്വന്തം ഗുരുക്കന്മാർ നമുക്ക് പകർന്നുനൽകിയ അറിവും മാർഗ്ഗനിർദ്ദേശങ്ങളും മൂല്യങ്ങളും നാം കൈമാറണം. ഏതൊരു മേഖലയിലും ഏറ്റവും മികച്ച അധ്യാപകൻ കഴിവുള്ളവരും ധാർമ്മികരുമായ വിദ്യാർത്ഥികളെ സൃഷ്ടിക്കുന്നവനാണ്. നമ്മുടെ കീഴിൽ പരിശീലനം നേടിയ യുവ ഡോക്ടർമാർ നമ്മിൽ നിന്നും പ്രചോദനം ഉൾക്കൊണ്ട് നമ്മെ മാതൃകകളായി കാണുകയും ചെയ്യുന്നുവെങ്കിൽ, ഡോക്ടർമാർ എന്ന നിലയിലും അധ്യാപകർ എന്ന നിലയിലും നമ്മൾ വിജയിച്ചു എന്ന് ഞാൻ വിശ്വസിക്കുന്നു.
ഏറ്റവും ഉത്തരവാദിത്വവും സമ്മർദ്ദവും ഉള്ള ഒന്നാണ് ശസ്ത്രക്രിയ. ഇത്തരം സാഹചര്യങ്ങളിൽ താങ്കൾ ഈ സമ്മർദ്ദങ്ങളെ നിയന്ത്രിച്ച്

ഓപ്പറേഷൻ തിയേറ്ററിൽ ഏകാഗ്രമായി ശസ്ത്രക്രിയ നിർവഹിക്കാൻ താങ്കളെ സഹായിക്കുന്ന ഘടകം എന്താണെന്ന് വ്യക്തമാക്കാമോ?

എല്ലാ ബഹുമാനത്തോടെയും ഞാൻ വ്യക്തമാക്കാനാഗ്രഹിക്കുന്നത് ശസ്ത്രക്രിയ സമ്മർദ്ദകരമായിരിക്കണമെന്ന ധാരണയോട് ഞാൻ പൂർണ്ണമായും യോജിക്കുന്നില്ലയെന്നതാണ്. ഒരു തൊഴിൽ അഭിനിവേശത്തോടെയും സമർപ്പണത്തോടെയും തിരഞ്ഞെടുക്കുമ്പോൾ അതിലുളവാകുന്ന സമ്മർദ്ദം പ്രചോദനമായും ആത്മസംതൃപ്തിയായും മാറുന്നു. ഇത് ശസ്ത്രക്രിയയ്ക്ക് മാത്രമല്ല ഏത് തൊഴിലിനും ബാധകമാണ്. ഉയർന്ന തലങ്ങളിലെത്താൻ, കഠിനാധ്വാനവും സ്ഥിരോത്സാഹവും അത്യാവശ്യമാണ്. ഈ പ്രക്രിയയ്ക്കിടെ സമ്മർദ്ദത്തെക്കുറിച്ച് പരാതിപ്പെടുന്നത്, എന്റെ അഭിപ്രായത്തിൽ, പ്രതീക്ഷകൾക്കും പ്രതിബദ്ധതയ്ക്കും ഇടയിലുള്ള ഒരു പൊരുത്തക്കേടിനെ പ്രതിഫലിപ്പിക്കുന്നു.
ശസ്ത്രക്രിയയിൽ, ശരിയായ പരിശീലനവും മതിയായ സൗകര്യങ്ങളും കഴിവും ഉള്ള ഒരു സ്ഥാപനപരമായ അന്തരീക്ഷവും ഒരാളുടെ മാനസിക സന്തുലിതാവസ്ഥ നിലനിർത്തുന്നതിന് നിർണ്ണായകമാണ്. അഭിനിവേശത്തിലായാലും, ജോലി നൈതികതയിലായാലും, പരിസ്ഥിതിയിലായാലും, ഉദ്ദേശ്യത്തിലായാലും വിട്ടുവീഴ്ചകൾ സംഭവിക്കുമ്പോഴാണ്, സമ്മർദ്ദം ശക്തമായും അനുഭവപ്പെടുന്നത്.
സമ്മർദ്ദം ജീവിതത്തിന്റെ ഒരു ഭാഗമാണ്. അതിനെ ഒഴിവാക്കുന്നതിനുപകരം അത് സ്വീകരിക്കുന്നതും ആസ്വദിക്കാൻ പഠിക്കുന്നതും അതിനെ അതിജീവിക്കാൻ ഏറ്റവും നല്ല മാർഗ്ഗമാണ്.

ആശുപത്രിയിലെ തിരക്കുകളിൽ നിന്ന് വിശ്രമിക്കാനും ഊർജ്ജസ്വലത കൈവരിക്കാനും സഹായിക്കുന്ന കാര്യങ്ങൾ എന്തൊക്കെയാണ്?

യാത്രകൾ ചെയ്യാനും പുസ്തകങ്ങൾ വായിക്കാനും സംഗീതം കേൾക്കാനും എനിക്ക് ഇഷ്ടമാണ്. യാത്രകൾ ഒരാളുടെ കാഴ്ചപ്പാടിനെ വിശാലമാക്കുകയും വ്യക്തിത്വത്തെ സമ്പന്നമാക്കുകയും ചെയ്യുന്നു. മൃദുവായ സംഗീതത്തോടൊപ്പമുള്ള ദീർഘദൂര ഡ്രൈവുകൾ എനിക്ക് പ്രത്യേകിച്ച് ഉന്മേഷദായകമായ അനുഭവമാണ്. വായനയിലും എനിക്ക് വളരെ താല്പര്യമാണ്. മനുഷ്യപരിണാമം, ചരിത്രം, ഇന്ത്യൻ സംസ്കാരം, നാഗരികത, സാമൂഹ്യശാസ്ത്രം, മനുഷ്യമനഃശാസ്ത്രം എന്നിവയാണ് എന്റെ വായനയിൽ പ്രധാനമായും ഉൾപ്പെട്ടിട്ടുള്ളത്. ഇത്തരത്തിലുള്ള വായനകൾ സമൂഹത്തെക്കുറിച്ചും മനുഷ്യരെക്കുറിച്ചും ആഴത്തിലുള്ള അറിവ് നേടാൻ സഹായിക്കുന്നു.
അന്താരാഷ്ട്രവേദികളിൽ തത്സമയശാസ്ത്രക്രിയകൾ അവതരിപ്പിക്കാനും അതിനെക്കുറിച്ച് വിശദമാക്കാനും താങ്കളെ ക്ഷണിക്കാറുണ്ടല്ലോ. ഇത്തരം സെഷനുകൾക്കായി താങ്കൾ നടത്തുന്ന തയ്യാറെടുപ്പുകൾ എന്താണെന്ന് വിശദമാക്കാമോ?
എത്ര അനുഭവം ഉണ്ടെങ്കിലും, ഒരു തുറന്നവേദിയിൽ നിരവധിപേർ നിരീക്ഷിക്കുന്ന സാഹചര്യത്തിലാണ് പ്രവർത്തിക്കുന്നുവെന്ന ബോധം സ്വാഭാവികമായും ഉണ്ടാകും. ഓരോ രോഗിയും വ്യത്യസ്തമായ വെല്ലുവിളികൾ ഉയർത്തുന്നതിനാൽ, തത്സമയ ശസ്ത്രക്രിയാ സമ്മേളനങ്ങൾ നിരോധിക്കാനുള്ള മെഡിക്കൽ കൗൺസിലുകളുടെ സമീപകാലനീക്കത്തെ ഞാൻ അഭിനന്ദിക്കുന്നു. മുൻകൂട്ടി ആസൂത്രണം ചെയ്ത ഒരു രീതിയിൽ നിന്നുള്ള വ്യതിയാനങ്ങൾ സമ്മർദ്ദം വർദ്ധിപ്പിക്കുകയും പ്രകടനത്തെ ബാധിക്കുകയും ചെയ്യും, ഇത് രോഗിയുടെ സുരക്ഷയ്ക്ക് പ്രത്യാഘാതങ്ങൾ ഉണ്ടാക്കിയേക്കാം. ഇക്കാരണങ്ങൾ കൊണ്ട് തത്സമയ ശസ്ത്രക്രിയകൾക്ക് ഞാൻ സമ്മതിക്കുമ്പോൾ, എനിക്ക് ആത്മവിശ്വാസമുള്ളതും സുപരിചിതവുമായ നടപടിക്രമങ്ങളാണ് തെരഞ്ഞെടുക്കുന്നതെന്നത് ഞാൻ ഉറപ്പാക്കുന്നു. അത്തരം സാഹചര്യങ്ങളിൽ പുതിയ സാങ്കേതിക വിദ്യകളോ അപരിചിതമായ സാങ്കേതികവിദ്യകളോ പ്രദർശിപ്പിക്കുന്നത് ഞാൻ ഒഴിവാക്കുന്നു.

വൈദ്യശാസ്ത്രവും സാങ്കേതികവിദ്യയും അതിവേഗം മുന്നേറുന്ന ഇക്കാലത്ത് ഓർത്തോപീഡിക്സിന്റെ ഭാവിയെക്കുറിച്ച് താങ്കളെ ഏറ്റവും ആവേശഭരിതന്ന മുന്നേറ്റങ്ങൾ എന്തൊക്കെയാണ്?
എഞ്ചിനീയറിംഗ് തത്വങ്ങൾ, മെറ്റലർജി, ബയോമെക്കാനിക്സ് എന്നിവ സമന്വയിപ്പിക്കുന്ന ഒരു വൈദഗ്ധ്യ-തീവ്ര സ്പെഷ്യാലിറ്റിയാണ് ഓർത്തോപീഡിക്സ്. ഈ മേഖലകളിലെ പുരോഗതി സ്വാഭാവികമായും ഓർത്തോപീഡിക് ചികിത്സയെ സ്വാധീനിക്കുന്നു. കൃത്രിമ ടിഷ്യുകൾ, ബോൺ സബ്സ്റ്റിറ്റ്യൂട്ടുകൾ, സ്റ്റെം സെൽ തെറാപ്പികൾ, കമ്പ്യൂട്ടർ നാവിഗേഷൻ, റോബോട്ടിക്സ്, ഓഗ്മെന്റഡ് റിയാലിറ്റി, മെഷീൻ ലേണിംഗ് തുടങ്ങിയ സാങ്കേതികവിദ്യകൾ ഈ മേഖലയെ പുനർനിർമ്മിക്കുന്നു. ഇന്ന് മിക്ക മസ്കുലോസ്കെലെറ്റൽ രോഗങ്ങളിൽ ഏറിയ പങ്കിനും ചികിത്സാമാർഗ്ഗങ്ങൾ ഉണ്ടെങ്കിലും എല്ലാം 100% വിജയകരമാണെന്ന് പറയാൻ കഴിയില്ല. ഭാവിയിലെ കണ്ടുപിടുത്തങ്ങൾ ചികിത്സയുടെ വിജയ നിരക്കുകളും രോഗികളുടെ അനുഭവവും മെച്ചപ്പെടുത്താൻ സാധ്യതയുണ്ട്. ആത്യന്തിക ലക്ഷ്യം വേഗത്തിലുള്ള വ്യക്തിപരവും സാമൂഹികവും തൊഴിൽപരവുമായ പുനരധിവാസമാണ്, ഇത് വ്യക്തികൾക്ക് എത്രയും വേഗം ജീവിതനിലവാരം വീണ്ടെടുക്കാൻ പ്രാപ്തമാക്കുന്നു. ഇത്തരത്തിൽ നമ്മൾ ശരിയായ ദിശയിലേക്ക് മുന്നേറുന്നുവെന്ന് ഞാൻ വിശ്വസിക്കുന്നു.

തിരിഞ്ഞുനോക്കുമ്പോൾ, താങ്കളുടെ കരിയർ രൂപപ്പെടുത്തുന്നതിൽ നിർണ്ണായക പങ്ക് വഹിച്ച എന്തെങ്കിലും തിരിച്ചടികളോ വെല്ലുവിളിനിറഞ്ഞ ഘട്ടങ്ങളോ ഉണ്ടായിരുന്നോ?
അതെ, തീർച്ചയായും. വ്യക്തികളുടെ പേര് പരാമർശിക്കാതെതന്നെ, ചിലരിലെ അസൂയയിൽ നിന്നോ അരക്ഷിതാവസ്ഥയിൽ നിന്നോ ഉടലെടുത്ത ഗുരുതരമായ പ്രൊഫഷണൽ തിരിച്ചടികളും എതിർപ്പുകളും ഞാൻ നേരിട്ടിട്ടുണ്ട്. എന്റെ കരിയറിന്റെ തുടക്കത്തിൽ, ഈ അനുഭവങ്ങൾ എന്നെ വൈകാരികമായി ബാധിച്ചു. എന്നിരുന്നാലും, ഭഗവദ്ഗീതയിൽ പറഞ്ഞിരിക്കുന്നതുപോലെ, ഓരോ അനുഭവവും ഒരു ലക്ഷ്യത്തിനായി വർത്തിക്കുന്നു. തിരിഞ്ഞുനോക്കുമ്പോൾ, ഈ വെല്ലുവിളികളാണ് എന്റെ വ്യക്തിത്വത്തെയും പ്രതിരോധശേഷിയെയും രൂപപ്പെടുത്തിയതെന്ന് ഞാൻ മനസ്സിലാക്കുന്നു. ഇന്ന്, ആ അനുഭവങ്ങൾക്ക് ഞാൻ നന്ദിയുള്ളവനാണ്, കാരണം ജീവിതത്തിൽ ഞാൻ ആസ്വദിക്കുന്ന പൂർത്തീകരണത്തിനും സന്തുലിതാവസ്ഥയ്ക്കും അവയും കാരണമായി.

ഒരു സർജൻ ആയിരുന്നില്ലെങ്കിൽ, താങ്കൾ മറ്റേതു മേഖല തെരഞ്ഞെടുക്കുമായിരുന്നു? എന്തുകൊണ്ട്?
ഒരു സർജൻ ആയിരുന്നില്ലെങ്കിൽ ഞാൻ സിനിമയിലേക്കോ രാഷ്ട്രീയത്തിലേക്കോ കടന്നിരുന്നേനെ. തിരക്കഥ എഴുതുന്നതും സംവിധാനം ചെയ്യുന്നതും ചെറിയ നാടകങ്ങളിൽ അഭിനയിക്കുന്നതും എനിക്ക് ഏറെ ഇഷ്ടമാണ്, ആശുപത്രിയിലും പ്രൊഫഷണൽ അസോസിയേഷൻ പരിപാടികളിലും ഞാൻ സൃഷ്ടിപരമായ പ്രവർത്തനങ്ങൾ തുടരാൻ ശ്രമിക്കാറുണ്ട് . ഇത് എന്റെ ജീവിതത്തിൽ ഒരു സർഗ്ഗാത്മകവഴിയായും സമ്മർദ്ദം കുറയ്ക്കാനുള്ള നല്ലൊരു മാർഗ്ഗമായും പ്രവർത്തിക്കുന്നു.
രാഷ്ട്രീയത്തോടും എനിക്ക് ആഴത്തിലുള്ള താൽപ്പര്യമുണ്ട്. നമ്മുടെ രാഷ്ട്രീയ വെല്ലുവിളികളിൽ പലതും ഉടലെടുക്കുന്നത് അക്കാദമികമായി ശക്തരായ വിദ്യാർത്ഥികളെ പ്രൊഫഷണൽ കരിയറുകളിലേക്ക് മാത്രം നയിക്കുന്ന ഒരു വിദ്യാഭ്യാസ സമ്പ്രദായത്തിൽ നിന്നാണ്, അതേസമയം നേതൃത്വവും ഭരണവും പലപ്പോഴും വേണ്ടത്ര തയ്യാറെടുപ്പില്ലാത്തവരുടെ കൈകളിലാണ്. എന്നിരുന്നാലും, കൂടുതൽ പ്രൊഫഷണലുകളും ബുദ്ധിജീവികളും രാഷ്ട്രീയത്തിലേക്ക് പ്രവേശിക്കുന്ന ഇന്ത്യൻ സമൂഹത്തിലെ സമീപകാല മാറ്റങ്ങൾ എന്നെ പ്രോത്സാഹിപ്പിക്കുന്നു. ഈ മാറ്റം ഇന്ത്യ അതിന്റെ ശരിയായ ആഗോള പദവി വീണ്ടെടുക്കുന്നതിന് കാരണമാകുമെന്ന് എനിക്ക് ഉറപ്പുണ്ട്.