കേരള നിയമസഭാ തിരഞ്ഞെടുപ്പിന്റെ പരസ്യപ്രചാരണം അവസാന ലാപ്പിലേക്ക് കടന്നിരിക്കെ, വോട്ടർമാരെ ആവേശത്തിലാഴ്ത്തി പ്രമുഖ നേതാക്കൾ ഇന്ന് സംസ്ഥാനത്തെ വിവിധ മണ്ഡലങ്ങളിൽ പര്യടനം നടത്തും. പ്രധാനമന്ത്രി നരേന്ദ്ര മോദിയും ലോക്‌സഭാ പ്രതിപക്ഷ നേതാവ് രാഹുൽ ഗാന്ധിയും ഇന്ന് കേരളത്തിലെത്തുന്നുണ്ട്. ഉച്ചയ്ക്ക് 2.30-ന് തിരുവനന്തപുരത്ത് എത്തുന്ന പ്രധാനമന്ത്രി, വൈകിട്ട് 4 മണിയ്ക്ക് തിരുവല്ല പബ്ലിക് സ്റ്റേഡിയത്തിൽ എൻ.ഡി.എ.യുടെ പൊതുസമ്മേളനം ഉദ്ഘാടനം ചെയ്യും. തുടർന്ന് തിരികെ തലസ്ഥാനത്തെത്തി റോഡ് ഷോയിലും അദ്ദേഹം പങ്കെടുക്കും.

യു.ഡി.എഫ് പ്രചാരണത്തിനായി എത്തുന്ന രാഹുൽ ഗാന്ധി ആലപ്പുഴ, കട്ടപ്പന, കൊച്ചി എന്നിവിടങ്ങളിലെ പരിപാടികളിലാണ് പങ്കെടുക്കുന്നത്. നേരത്തെ, ശബരിമല സ്വർണക്കൊള്ളയും ഇന്ധന പ്രതിസന്ധിയും ഉയർത്തി എൽ.ഡി.എഫിനെയും കേന്ദ്ര സർക്കാരിനെയും അദ്ദേഹം രൂക്ഷമായി വിമർശിച്ചിരുന്നു.

മറുഭാഗത്ത്, മുഖ്യമന്ത്രി പിണറായി വിജയന്റെ നേതൃത്വത്തിൽ എൽ.ഡി.എഫും ശക്തമായ പ്രചാരണവുമായി മുന്നിലുണ്ട്. സ്വന്തം മണ്ഡലമായ കണ്ണൂർ ധർമടത്താണ് മുഖ്യമന്ത്രി ഇന്ന് വോട്ടഭ്യർത്ഥിക്കുന്നത്. മുതിർന്ന നേതാക്കൾ ആരോപണ പ്രത്യാരോപണങ്ങളുമായി കളം നിറഞ്ഞതോടെ, വോട്ടെടുപ്പിന് ദിവസങ്ങൾ മാത്രം ബാക്കി നിൽക്കെ കേരളം രാഷ്ട്രീയ പോരാട്ടത്തിന്റെ അത്യന്തം ആവേശകരമായ ഘട്ടത്തിലാണ്. ഏപ്രിൽ 9-നാണ് സംസ്ഥാനത്ത് വോട്ടെടുപ്പ് നടക്കുന്നത്.

Photo Courtesy: Google/ images are subject to copyright