കേരളത്തിലെ പ്രകൃതിസൗന്ദര്യത്തിന്റെ മകുടോദാഹരണങ്ങളിലൊന്നാണ് കുറുമ്പാലക്കോട്ട. പ്രകൃതി സൗന്ദര്യത്തോടൊപ്പം ചരിത്രപരമായ കൗതുകവും സമന്വയിപ്പിക്കുന്ന ഒരു ആകർഷകമായ കുന്നിൻപ്രദേശമാണിത്. ഒരുകാലത്ത് പ്രാദേശിക ഗോത്രവർഗ്ഗങ്ങളായ കുറുമ്പ സമൂഹത്തിന്റെ താമസകേന്ദ്രമായിരുന്നതിനാലാണ് “കുറുമ്പാലക്കോട്ട” എന്ന പേര് ഈ സ്ഥലത്തിന് ലഭിച്ചതെന്നാണ് വിശ്വാസം. മലയുടെ ചില ഭാഗങ്ങളിൽ പുരാതന കോട്ടയുടെ അവശിഷ്ടങ്ങൾ ഉണ്ടായിരുന്നുവെന്നും പറയപ്പെടുന്നു. ബ്രിട്ടീഷ് കൊളോണിയൽ ഭരണത്തിനെതിരായ ഐതിഹാസികപോരാട്ടം നടത്തിയ വീരപഴശ്ശി രാജയുടെ ഒളിത്താവളമായിരുന്നു കുറുമ്പാലക്കോട്ട. വയനാട്ടിന്റെ അതിമനോഹരമായ ഭൂപ്രകൃതിയുടെ ഒരു അപൂർവ്വ സമ്മാനമാണ് ഈ സ്ഥലം. പുലർച്ചെ മൂടൽമഞ്ഞിൽ മൂടിയിരിക്കുന്ന കുറുമ്പാലക്കോട്ടയുടെ ദൃശ്യം, ഒരു സ്വപ്നലോകത്തിലേക്ക് കടന്നുപോകുന്നതുപോലെയാണ്. മലമുകളിലേക്ക് കയറുമ്പോൾ, ഓരോ ചുവടും ശാന്തതയിലേക്കും ആത്മസംതൃപ്തിയിലേക്കും നയിക്കുന്നു. പച്ചപ്പിൽ മുങ്ങിയ കുന്നുകളും അകലെ പരന്നുകിടക്കുന്ന താഴ്വരകളും ഇവയെല്ലാം ചേർന്ന് ഏതോ ചിത്രകാരൻ ക്യാൻവാസിൽ പകർത്തിയ ഒരു മനോഹരചിത്രം പോലെ മനസിൽ പതിയുന്നു.

സമുദ്രനിരപ്പിൽ നിന്ന് ഏകദേശം 3,200 അടി ഉയരത്തിലാണ് കുറുമ്പാലക്കോട്ട സ്ഥിതിചെയ്യുന്നത്. ഈ മലയുടെ പ്രധാന പ്രത്യേകത അതിന്റെ ടേബിൾ ടോപ്പ് രൂപമാണ്. മലമുകളിലെ സമതലപ്രദേശം 360° ദൃശ്യവിസ്മയമൊരുക്കുന്നു. ഇവിടെ നിന്ന് നോക്കിയാൽ കേരളത്തിലെ ഏറ്റവും പ്രശസ്തമായ ട്രെക്കിംഗ് സ്പോട്ടുകളിലൊന്നായ ചെമ്പ്ര പീക്, ബാണാസുര സാഗർ ഡാം എന്നിവയുടെ വിദൂരദൃശ്യം കാണാവുന്നതാണ്. മലമുകളിൽനിന്ന് മേഘങ്ങൾ താഴെ നീങ്ങുന്ന കാഴ്ച ഇവിടെ നിന്നു കാണുന്നത് അത്യപൂർവ്വ അനുഭവമാണ്.
കുറുമ്പാലക്കോട്ടയുടെ ഏറ്റവും പ്രശസ്തമായ കാഴ്ചയാണ് “മേഘങ്ങളുടെ സമുദ്രം (sea of clouds)”. പുലർച്ചെ 5.30 മുതൽ 7 മണിവരെ, താഴ്വര മുഴുവൻ മേഘങ്ങൾ നിറഞ്ഞ് സമുദ്രം പോലെ തോന്നും. ഈ സമയത്ത് സൂര്യന്റെ ആദ്യകിരണങ്ങൾ മേഘങ്ങളിലൂടെ കടന്നുവരുന്നത് കാണേണ്ട കാഴ്ചയാണ്. ആകാശം ഓറഞ്ച്, പിങ്ക് നിറങ്ങളാൽ വർണ്ണാഭമാകുമ്പോൾ, പ്രകൃതി ഒരുക്കുന്ന മായാജാലം ഒരിക്കലും മറക്കില്ല. സൂര്യോദയം പോലെ അസ്തമയവും ഇവിടെ വർണ്ണകാഴ്ച്ചയൊരുക്കുന്നു.

കൈയ്യെത്തും ദൂരത്തെന്നപോലെ കടൽ പോലെ പരന്നു കിടക്കുന്ന കോടമഞ്ഞ്. സൂര്യന്റെ കിരണങ്ങളേറ്റ് സുവർണ്ണപ്രഭയും ശുഭ്രവർണ്ണവും ചേർന്ന പഞ്ഞിക്കെട്ടുകൾ പോലെ തെന്നിമാറുന്ന കോടക്കൂട്ടങ്ങൾ, ഇതൊക്കെയാണ് കുറുമ്പാലക്കോട്ടയിലെ പ്രഭാത കാഴ്ചകൾ. കോട മാറിക്കഴിഞ്ഞാൽ വയനാട് ജില്ലയുടെ ഭൂരിഭാഗവും ഇവിടെനിന്ന് കാണാൻ കഴിയും. ഇവിടുത്തെ അസ്തമയവും വളരെ മനോഹരമായ കാഴ്ച തന്നെയാണ് മലനിരകളിൽ ഒളിച്ചിറങ്ങുന്ന സൂര്യൻ സഞ്ചാരികളുടെ മനസ്സ് നിറയ്ക്കും.

വയനാട്ടിലെ മറ്റു ഹിൽ സ്റ്റേഷനുകളെക്കാൾ കുറുമ്പാലക്കോട്ടയുടെ ആകർഷണം അതിന്റെ നിശ്ശബ്ദതയും തിരക്കില്ലായ്മയും ആണ്. കാറ്റിന്റെ സംഗീതം, പക്ഷികളുടെ കളകൂജനം എന്നിങ്ങനെ പ്രകൃതിയുടെ ശബ്ദങ്ങൾ മാത്രമേ ഇവിടെ ശ്രവിക്കാനാകുള്ളൂ.കുറുമ്പാലക്കോട്ടയിലെ ട്രെക്ക് ഏകദേശം 1.5 മുതൽ 2 കിലോമീറ്റർ വരെ ദൈർഘ്യമുള്ളതാണ്. കഠിനമല്ലാത്ത, എന്നാൽ ആവേശകരമായ ഒരു യാത്ര അനുഭവിക്കാനാകുന്നതിനാൽ ട്രെക്കിംഗ് പ്രിയർക്ക് ഇത് ഒരു ചെറിയ സ്വർഗ്ഗമാണ്. കുറുമ്പാലക്കോട്ടയിലേക്കുള്ള യാത്ര പ്രകൃതിയോട് അടുത്തിടപഴകാനുള്ള അവസരമാണ് നൽകുന്നത്. വഴിയിലുടനീളം പച്ചപ്പും ശുദ്ധവായുവും യാത്രയെ കൂടുതൽ മനോഹരമാക്കുന്നു.
കൽപ്പറ്റയിൽ നിന്ന് ഏകദേശം 15–20 കിലോമീറ്റർ ദൂരത്തിലാണ് കുറുമ്പാലക്കോട്ട. കമ്പളക്കാട് നിന്നുമാണ് ട്രെക്കിങ്ങ് ആരംഭിക്കുന്നത്. തണുത്ത കാലാവസ്ഥയും വ്യക്തമായ കാഴ്ചയും ലഭിക്കുമെന്നതിനാൽ ഒക്ടോബർ മുതൽ ഫെബ്രുവരി വരെയാണ് ഇവിടം സന്ദർശിക്കാൻ ഏറ്റവും അനുയോജ്യമായ സമയം. പ്രകൃതിയെ സംരക്ഷിക്കേണ്ടതിനാൽ യാത്രികർ പ്ലാസ്റ്റിക് ഒഴിവാക്കേണ്ടത് അത്യാവശ്യമാണ്. സൂര്യോദയത്തിന് മുൻപ് മലമുകളിൽ എത്തുവാൻ ശ്രദ്ധിച്ചാൽ ഏറ്റവും അവിസ്മരണീയമായ കാഴ്ച അനുഭവിക്കാം. യാത്രകളെ സ്നേഹിക്കുന്നവർക്കായി, കുറുമ്പാലക്കോട്ട ഒരു ലക്ഷ്യസ്ഥാനം എന്നത് മാത്രമല്ല അതൊരു മറക്കാനാകാത്ത അനുഭവം തന്നെയാണ്. ഒരിക്കൽ ഇവിടെ എത്തി ഈ ശാന്തത അനുഭവിച്ചാൽ, നഗരജീവിതത്തിന്റെ തിരക്കിലേക്ക് തിരികെ പോകുമ്പോഴും ഈ മലയുടെ ഓർമ്മകൾ പിന്തുടർന്നുകൊണ്ടേയിരിക്കും.

Photo Courtesy: Google/ images are subject to copyright