ഇറാനിലെ നിലവിലെ സുരക്ഷാ സാഹചര്യം അതീവ ഗുരുതരമായി തുടരുന്ന പശ്ചാത്തലത്തിൽ, അവിടെയുള്ള ഇന്ത്യൻ പൗരന്മാരോട് എത്രയും വേഗം രാജ്യം വിടണമെന്ന് കേന്ദ്ര വിദേശകാര്യ മന്ത്രാലയം അടിയന്തര നിർദേശം നൽകി. ബുധനാഴ്ച പുറപ്പെടുവിച്ച ജാഗ്രതാ നിർദേശത്തിലാണ് മേഖലയിലെ സുരക്ഷാ സാഹചര്യം അനിശ്ചിതത്വത്തിലാണെന്നും പൗരന്മാർ സ്വന്തം സുരക്ഷ മുൻനിർത്തി മടങ്ങണമെന്നും കേന്ദ്ര സർക്കാർ ആവശ്യപ്പെട്ടത്. ഇറാനിലുള്ളവർ ഇന്ത്യൻ എംബസിയുമായി നിരന്തരം സമ്പർക്കം പുലർത്തണമെന്നും ഔദ്യോഗിക നിർദേശങ്ങൾ കർശനമായി പാലിക്കണമെന്നും റിപ്പോർട്ടിൽ വ്യക്തമാക്കുന്നു.

സുരക്ഷാ ഭീഷണി നിലനിൽക്കുന്നതിനാൽ അതിർത്തി പ്രദേശങ്ങളിലേക്കുള്ള യാത്രകൾ ഒഴിവാക്കണമെന്നും സൈനിക കേന്ദ്രങ്ങൾക്കോ തന്ത്രപ്രധാനമായ ഇടങ്ങൾക്കോ സമീപം പോകരുതെന്നും മന്ത്രാലയം അറിയിച്ചു. പൗരന്മാരെ സഹായിക്കുന്നതിനായി ഇറാനിലെ ഇന്ത്യൻ എംബസി പ്രത്യേക ഹെൽപ്പ്‌ലൈൻ നമ്പറുകളും ഇമെയിൽ സംവിധാനവും സജ്ജമാക്കിയിട്ടുണ്ട്. അടിയന്തര സാഹചര്യമുണ്ടായാൽ ഉടൻ എംബസിയെ വിവരമറിയിക്കണമെന്നും, മേഖലയിലെ സ്ഥിതിഗതികൾ സർക്കാർ സൂക്ഷ്മമായി നിരീക്ഷിച്ചു വരികയാണെന്നും വിദേശകാര്യ മന്ത്രാലയം വാർത്താക്കുറിപ്പിൽ കൂട്ടിച്ചേർത്തു.

ഇറാനിലെ ഇന്ത്യൻ എംബസി നിർദേശിച്ചിട്ടുള്ള സുരക്ഷിത പാതകൾ ഉപയോഗിച്ച് മാത്രമേ മടക്കം സാധ്യമാക്കാവൂ എന്നും എംബസിയുമായി മുൻകൂട്ടി ആലോചിക്കാതെ അന്താരാഷ്ട്ര കര അതിർത്തികളിലേക്ക് പോകാൻ ശ്രമിക്കരുതെന്നും പൗരന്മാർക്ക് കർശന മുന്നറിയിപ്പ് നൽകിയിട്ടുണ്ട്.

Photo Courtesy: Google/ images are subject to copyright