വാണിജ്യ ആവശ്യങ്ങൾക്കുള്ള എൽപിജി സിലിണ്ടറുകളുടെ വില കുത്തനെ കൂട്ടിയതിൽ പ്രതിഷേധിച്ച് സംസ്ഥാനത്തെ ഹോട്ടലുകളും റെസ്റ്റോറന്റുകളും ബേക്കറികളും ഇന്ന് അടച്ചിടും. ഓൺലൈൻ ഭക്ഷണ വിതരണവും പൂർണ്ണമായും നിർത്തിവയ്ക്കുമെന്ന് ഭാരവാഹികൾ അറിയിച്ചു.

ഹോട്ടൽ ആൻഡ് റെസ്റ്റോറന്റ്സ് അസോസിയേഷൻ, കേരള വ്യാപാരി വ്യവസായി സമിതി, വ്യാപാരി വ്യവസായി ഏകോപന സമിതി, ഓൾ കേരള കാറ്ററേഴ്സ് അസോസിയേഷൻ, ഹോസ്റ്റൽ ഓണേഴ്സ് ഫെഡറേഷൻ തുടങ്ങി ഈ മേഖലയിലെ പ്രമുഖ സംഘടനകളെല്ലാം പണിമുടക്കിൽ പങ്കാളികളാകുന്നുണ്ട്. സമരത്തിന്റെ ഭാഗമായി കേന്ദ്ര സർക്കാർ ഓഫീസുകളിലേക്ക് പ്രതിഷേധ പ്രകടനങ്ങളും സംഘടിപ്പിച്ചിട്ടുണ്ട്.

19 കിലോ തൂക്കമുള്ള വാണിജ്യ സിലിണ്ടറിന് ഒറ്റയടിക്ക് 993 രൂപയാണ് പൊതുമേഖലാ എണ്ണക്കമ്പനികൾ വർധിപ്പിച്ചത്. ഇതോടെ സംസ്ഥാനത്ത് ഒരു സിലിണ്ടറിന്റെ വില 3000 രൂപ കടന്നു. നേരത്തെ നൂറും നൂറ്റമ്പതും രൂപ വീതം വർധിപ്പിച്ചിരുന്ന സ്ഥാനത്താണ് ഇപ്പോൾ ആയിരത്തിനടുത്ത് രൂപ വർധിപ്പിച്ചിരിക്കുന്നത്. കോവിഡ് നിയന്ത്രണങ്ങൾ മാറി ഹോട്ടൽ മേഖല തിരിച്ചുപിടിക്കാനൊരുങ്ങുന്നതിനിടെയാണ് ഈ കനത്ത പ്രഹരം.

“ഒരു തരത്തിലും അംഗീകരിക്കാൻ കഴിയാത്ത വർധനവാണിത്. ഇത് ഹോട്ടൽ വ്യവസായത്തെ തകർക്കും. പ്രവർത്തനച്ചെലവ് ക്രമാതീതമായി കൂടുന്നത് ഭക്ഷണ സാധനങ്ങളുടെ വില വർധിപ്പിക്കാൻ ഹോട്ടലുടമകളെ നിർബന്ധിതരാക്കുമെന്നും അസോസിയേഷൻ ഭാരവാഹികൾ അഭിപ്രായപ്പെട്ടു.

ഹോട്ടലുകൾക്ക് പുറമെ ചെറുകിട ഹോട്ടലുകൾ, തട്ടുകടകൾ, കാറ്ററിങ് സ്ഥാപനങ്ങൾ എന്നിവയെല്ലാം പ്രതിസന്ധിയിലാണ്. ഭക്ഷണവില വർധിപ്പിക്കേണ്ടി വരുന്നത് സാധാരണക്കാരായ ഉപഭോക്താക്കൾക്കും വലിയ തിരിച്ചടിയാകും. പണിമുടക്ക് പ്രഖ്യാപിച്ച സാഹചര്യത്തിൽ ഇന്ന് വീടിന് പുറത്തുനിന്നും ഭക്ഷണം കഴിക്കുന്നവരും വിദ്യാർത്ഥികളും ഉൾപ്പെടെയുള്ളവർ പ്രയാസപ്പെടാൻ സാധ്യതയുണ്ട്.

Photo Courtesy: Google/ images are subject to copyright