രാജ്യതലസ്ഥാനത്തെ തന്ത്രപ്രധാന മേഖലകളെയും സുരക്ഷാ ഉദ്യോഗസ്ഥരെയും ലക്ഷ്യമിട്ട് വൻ ആക്രമണങ്ങൾക്ക് പദ്ധതിയിട്ട ഒമ്പത് ഭീകരരെ ദില്ലി പൊലീസിന്റെ പ്രത്യേക സെൽ അറസ്റ്റ് ചെയ്തു. പാക് ചാര സംഘടനയായ ഐഎസ്ഐയുടെയും മുംബൈ അധോലോക ശൃംഖലയുടെയും സഹായത്തോടെ പ്രവർത്തിച്ചിരുന്ന വലിയൊരു ഭീകരവാദ ഗ്രൂപ്പാണ് ഇതോടെ പിടിയിലായിരിക്കുന്നത്. പ്രതികളിൽ നിന്ന് വൻതോതിൽ ആയുധങ്ങളും സ്ഫോടക വസ്തുക്കളും പൊലീസ് കണ്ടെടുത്തിട്ടുണ്ട്. ദില്ലിയിലെ സുപ്രധാന സ്ഥാപനങ്ങൾക്ക് നേരെയും സുരക്ഷാ സേനയ്ക്ക് നേരെയും ആക്രമണം നടത്തുകയായിരുന്നു ഇവരുടെ പ്രധാന ലക്ഷ്യമെന്ന് അന്വേഷണ സംഘം വ്യക്തമാക്കി.

ഓപ്പറേഷൻ സിന്ദൂരിനെത്തുടർന്ന് രാജ്യതലസ്ഥാനത്ത് സുരക്ഷാ ആശങ്കകൾ വർധിച്ച സാഹചര്യത്തിലാണ് ഈ നിർണായക അറസ്റ്റ് നടന്നിരിക്കുന്നത്. വിദേശത്ത് നിന്ന് പ്രവർത്തിക്കുന്ന ഭീകര സംഘടനകൾ രാജ്യത്ത് പുതിയ ആളുകളെ റിക്രൂട്ട് ചെയ്യുന്നതിനും തീവ്രവാദ ആശയങ്ങൾ പ്രചരിപ്പിക്കുന്നതിനുമായി എൻക്രിപ്റ്റ് ചെയ്ത ഓൺലൈൻ പ്ലാറ്റ്‌ഫോമുകളും സോഷ്യൽ മീഡിയയും പ്രാദേശിക സ്ലീപ്പർ സെല്ലുകളും വ്യാപകമായി ഉപയോഗിക്കുന്നുണ്ടെന്ന ഇന്റലിജൻസ് റിപ്പോർട്ടുകൾ നേരത്തെ പുറത്തുവന്നിരുന്നു.

ഈ വിവരങ്ങളുടെ അടിസ്ഥാനത്തിൽ ദില്ലി പൊലീസ് തങ്ങളുടെ തീവ്രവാദ വിരുദ്ധ സേനയിൽ വലിയ മാറ്റങ്ങൾ വരുത്തിയിട്ടുണ്ട്. എല്ലാ പൊലീസ് സ്റ്റേഷനുകളിലും താഴെത്തട്ടിലുള്ള ഇന്റലിജൻസ് വിവര ശേഖരണം ശക്തിപ്പെടുത്തുന്നതിനും വരാനിരിക്കുന്ന ഭീഷണികൾ മുൻകൂട്ടി തിരിച്ചറിയുന്നതിനുമായി പ്രത്യേക തീവ്രവാദ വിരുദ്ധ യൂണിറ്റുകൾ (സിടിയു) രൂപീകരിക്കാൻ പോലീസ് കമ്മീഷണർ സതീഷ് ഗോൾച്ച ഉത്തരവിട്ടിരുന്നു. സുരക്ഷാ മുൻകരുതലുകൾ ശക്തമാക്കിയ പശ്ചാത്തലത്തിൽ ദില്ലിയിൽ അതീവ ജാഗ്രതാ നിർദ്ദേശമാണ് നിലവിലുള്ളത്.

Photo Courtesy: Google/ images are subject to copyright