സിന്ധു നദീജല കരാറുമായി (IWT) ബന്ധപ്പെട്ട് ഇന്ത്യക്കെതിരെ വീണ്ടും കടുത്ത പ്രകോപനവും ഭീഷണിയുമായി പാകിസ്ഥാൻ. തങ്ങളുടെ വിഹിതമായ വെള്ളത്തിന്മേൽ അവകാശവാദം ഉന്നയിക്കാൻ ശ്രമിക്കുന്നവരുടെ ‘കൈകൾ വെട്ടിമാറ്റും’ എന്നാണ് പാകിസ്ഥാൻ കാലാവസ്ഥ വ്യതിയാന വകുപ്പ് മന്ത്രി മുസാദിക് മാലിക് ഭീഷണിപ്പെടുത്തിയിരിക്കുന്നത്. 2025-ൽ 26 പേർ കൊല്ലപ്പെട്ട പഹൽഗാം ഭീകരാക്രമണത്തെ തുടർന്ന് പതിറ്റാണ്ടുകൾ പഴക്കമുള്ള ഈ ജലക്കരാർ താൽക്കാലികമായി നിർത്തിവെക്കാൻ ഇന്ത്യ തീരുമാനിച്ചിരുന്നു. ഇതിന് പിന്നാലെയാണ് ഇരുരാജ്യങ്ങളും തമ്മിലുള്ള ജലതർക്കം പുതിയ തലത്തിലെത്തിച്ചുകൊണ്ട് പാക് മന്ത്രിയുടെ ഭാഗത്തുനിന്ന് ഈ കടുത്ത പരാമർശം ഉണ്ടായിരിക്കുന്നത്.

ഇസ്ലാമാബാദിൽ വാർത്താസമ്മേളനത്തിൽ സംസാരിക്കവെ, അയൽരാജ്യത്തെ പ്രധാനമന്ത്രിയാണ് ഈ ജലത്തിന്റെ ടാപ്പ് നിയന്ത്രിക്കുന്നതെന്നും പാകിസ്ഥാനിലേക്ക് ഒരു തുള്ളി വെള്ളം പോലും ഒഴുക്കില്ലെന്ന് അദ്ദേഹം പറയുകയാണെന്നും മുസാദിക് മാലിക് ആരോപിച്ചു. രാജ്യത്തെ 50 ശതമാനത്തോളം വരുന്ന ജനങ്ങൾ ഉപജീവനത്തിനായി കൃഷിയെ ആശ്രയിക്കുന്ന സാഹചര്യത്തിൽ, പാകിസ്ഥാന്റെ ഭക്ഷ്യസുരക്ഷയെയും സമ്പദ്‌വ്യവസ്ഥയെയും പൂർണ്ണമായി നിയന്ത്രിക്കാനാണ് ഇന്ത്യ ശ്രമിക്കുന്നതെന്നും അദ്ദേഹം കുറ്റപ്പെടുത്തി. തങ്ങളുടെ ജലവിഹിതം തടസ്സപ്പെടുത്താൻ ആരെയും അനുവദിക്കില്ലെന്നും, അതിന് തുനിയുന്നവർക്ക് കടുത്ത പ്രത്യാഘാതങ്ങൾ നേരിടേണ്ടി വരുമെന്നും പാക് മാധ്യമമായ ‘ഡോൺ’ റിപ്പോർട്ട് ചെയ്ത വാർത്താസമ്മേളനത്തിൽ മാലിക് വ്യക്തമാക്കി.

അതേസമയം, ഭീകരതയും ചർച്ചകളും ഒരുമിച്ച് പോകില്ലെന്ന ശക്തമായ നിലപാടിലാണ് ഇന്ത്യ ഉറച്ചുനിൽക്കുന്നത്. പാകിസ്ഥാൻ അതിർത്തികടന്നുള്ള ഭീകരവാദം പൂർണ്ണമായും നിർത്തലാക്കുന്നത് വരെ കരാർ പുനഃസ്ഥാപിക്കില്ലെന്ന് ഇന്ത്യൻ പ്രതിരോധ മന്ത്രാലയം നേരത്തെ വ്യക്തമാക്കിയിരുന്നു. 1960-ൽ ഒപ്പുവെച്ച ഈ കരാർ ഏകപക്ഷീയമായി റദ്ദാക്കാനോ താൽക്കാലികമായി നിർത്താനോ കഴിയില്ലെന്നും, വിഷയം അന്താരാഷ്ട്ര തലത്തിൽ ഉന്നയിക്കുമെന്നുമാണ് പാകിസ്ഥാൻ വാർത്താസമ്മേളനത്തിൽ അറിയിച്ചിട്ടുള്ളത്.

Photo Courtesy: Google/ images are subject to copyright