ഹോർമുസ് കടലിടുക്കിലെ ഇറാന്റെ തന്ത്രപ്രധാനമായ ക്വിഷം (Qeshm) ദ്വീപിന് നേരെ അമേരിക്കൻ സൈന്യം നടത്തിയ അപ്രതീക്ഷിത ആക്രമണത്തിന് തൊട്ടുപിന്നാലെ, മിഡിൽ ഈസ്റ്റിൽ കനത്ത തിരിച്ചടിയുമായി ഇറാൻ. കുവൈറ്റിലെയും ബഹ്‌റൈനിലെയും യു.എസ് സൈനിക താവളങ്ങൾക്ക് നേരെ ഇറാൻ വൻതോതിൽ ബാലിസ്റ്റിക് മിസൈലുകളും ഡ്രോണുകളും ഉപയോഗിച്ച് വ്യോമാക്രമണം നടത്തി. ആക്രമണത്തെത്തുടർന്ന് ഗൾഫ് മേഖലയിലാകെ അതീവ ജാഗ്രതാ നിർദ്ദേശം (High Alert) പുറപ്പെടുവിച്ചിരിക്കുകയാണ്. മേഖലയിൽ യുദ്ധസമാനമായ സാഹചര്യമാണ് നിലവിലുള്ളതെന്നാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്.

ക്വിഷം ദ്വീപിലെ തങ്ങളുടെ മിലിട്ടറി ഗ്രൗണ്ട് കൺട്രോൾ സ്റ്റേഷന് നേരെ അമേരിക്ക നടത്തിയ ആക്രമണത്തിന് കൃത്യമായ പ്രതികാരമായാണ് കുവൈറ്റിലെയും ബഹ്‌റൈനിലെയും യു.എസ് താവളങ്ങളെ ലക്ഷ്യമിട്ടതെന്ന് ഇറാന്റെ ഇസ്‌ലാമിക് റെവല്യൂഷണറി ഗാർഡ് കോർപ്സ് (IRGC) ഔദ്യോഗികമായി സ്ഥിരീകരിച്ചു. ‘അമേരിക്കൻ ഭീകരസേനയുടെ കടുത്ത അഹങ്കാരത്തിനും അധിനിവേശ ശ്രമങ്ങൾക്കും നൽകിയ ശക്തമായ മറുപടിയാണിത്’ എന്ന് ഇറാൻ വ്യക്തമാക്കി. തങ്ങളുടെ പരമാധികാരത്തിന്മേൽ കടന്നുകയറാൻ ശ്രമിച്ചാൽ ഇനിയും കടുത്ത പ്രത്യാഘാതങ്ങൾ നേരിടേണ്ടിവരുമെന്ന മുന്നറിയിപ്പും ഇറാൻ നൽകിയിട്ടുണ്ട്.

ഇരുവിഭാഗവും സൈനിക നീക്കങ്ങൾ ശക്തമാക്കിയതോടെ പശ്ചിമേഷ്യയിൽ വൻ സുരക്ഷാ പ്രതിസന്ധിയാണ് ഉടലെടുത്തിരിക്കുന്നത്. യു.എസ് താവളങ്ങളിലുണ്ടായ നാശനഷ്ടങ്ങളുടെയോ ആളപായത്തിന്റെയോ കൃത്യമായ വിവരങ്ങൾ ഇതുവരെ പുറത്തുവിട്ടിട്ടില്ല. ആക്രമണത്തിന്റെ പശ്ചാത്തലത്തിൽ ഗൾഫ് രാജ്യങ്ങൾ തങ്ങളുടെ വ്യോമാതിർത്തികളിൽ നിരീക്ഷണം ശക്തമാക്കുകയും, സുരക്ഷാ മുൻകരുതലുകൾ ഊർജ്ജിതമാക്കുകയും ചെയ്തിട്ടുണ്ട്. വരും മണിക്കൂറുകളിൽ അമേരിക്കയുടെ ഭാഗത്തുനിന്നുണ്ടാകുന്ന പ്രതികരണത്തെ ആശ്രയിച്ചായിരിക്കും മേഖലയുടെ ഭാവി സുരക്ഷ നിലനിൽക്കുന്നത്.

Photo Courtesy: Google/ images are subject to copyright