സംസ്ഥാനത്തെ സ്കൂളുകളിലെ 2026-27 അധ്യയന വര്‍ഷത്തെ ഔദ്യോഗിക അക്കാദമിക് കലണ്ടർ വിദ്യാഭ്യാസ വകുപ്പ് പുറത്തിറക്കി. വിദ്യാഭ്യാസ വകുപ്പിന്‍റെ വരാനിരിക്കുന്ന വിവിധ അക്കാദമിക് പ്രവര്‍ത്തനങ്ങൾ, പൊതുപരീക്ഷകൾ, അവധികൾ, പ്രാക്ടിക്കൽ-മാതൃക പരീക്ഷകൾ, വാര്‍ഷിക പരീക്ഷകൾ എന്നിവയെല്ലാം കൃത്യമായി ഉൾപ്പെടുത്തി തയ്യാറാക്കിയ കലണ്ടര്‍ മുഖ്യമന്ത്രി വി. ഡി. സതീശനും വിദ്യാഭ്യാസ മന്ത്രി എൻ. ഷംസുദ്ദീനും ചേര്‍ന്നാണ് പ്രകാശനം ചെയ്തത്. കൃത്യമായ ആസൂത്രണത്തോടെ അധ്യയന വർഷം മുന്നോട്ട് കൊണ്ടുപോകാൻ സഹായിക്കുന്ന രീതിയിലാണ് കലണ്ടർ ക്രമീകരിച്ചിരിക്കുന്നത്.

പുതിയ കലണ്ടറിലെ പ്രധാന പ്രഖ്യാപന പ്രകാരം സംസ്ഥാനത്തെ എൽ.പി (ലോവർ പ്രൈമറി) സ്കൂളുകളിലെ ശനിയാഴ്ചകളിലെ പ്രവൃത്തിദിനം പൂർണ്ണമായും ഒഴിവാക്കിയിട്ടുണ്ട്. എന്നാൽ യു.പി (അപ്പർ പ്രൈമറി), എച്ച്.എസ് (ഹൈസ്കൂൾ) വിഭാഗങ്ങളിൽ അഞ്ച് ശനിയാഴ്ചകൾ അധിക പ്രവൃത്തിദിനങ്ങളായിരിക്കുമെന്ന് കലണ്ടറിൽ വ്യക്തമാക്കുന്നുണ്ട്. വിദ്യാർത്ഥികളുടെ പഠനഭാരം കുറയ്ക്കുന്നതിനൊപ്പം നിശ്ചിത അധ്യയന ദിനങ്ങൾ ഉറപ്പുവരുത്താനും പുതിയ പരിഷ്കാരത്തിലൂടെ ലക്ഷ്യമിടുന്നു.

ഈ വർഷത്തെ ഓണപ്പരീക്ഷകൾ ഓഗസ്റ്റ് 10 മുതൽ 21 വരെയാണ് നിശ്ചയിച്ചിരിക്കുന്നത്. പരീക്ഷകൾ പൂർത്തിയാക്കി ഓഗസ്റ്റ് 21-ന് ഓണാവധിക്കായി സ്കൂളുകൾ അടയ്ക്കും. പത്ത് ദിവസത്തെ അവധിക്ക് ശേഷം ഓഗസ്റ്റ് 31-നായിരിക്കും സ്കൂളുകൾ വീണ്ടും തുറക്കുക. തുടർന്ന് വരുന്ന രണ്ടാം പാദ വാർഷിക പരീക്ഷകൾ അഥവാ ക്രിസ്മസ് പരീക്ഷകൾ ഡിസംബര്‍ 10-ന് തുടങ്ങി 18-ന് അവസാനിക്കും. ഡിസംബര്‍ 18-ന് ക്രിസ്മസ് അവധിക്കായി സ്കൂൾ അടയ്ക്കുകയും പത്ത് ദിവസത്തിന് ശേഷം ഡിസംബര്‍ 28-ന് അധ്യയനം പുനരാരംഭിക്കുകയും ചെയ്യും.

വരും വർഷത്തെ പൊതുപരീക്ഷകളുടെ തീയതികളും കലണ്ടറിൽ പ്രഖ്യാപിച്ചിട്ടുണ്ട്. പ്ലസ് ടു വിഭാഗത്തിലെ പ്രാക്ടിക്കൽ പരീക്ഷകൾ 2027 ജനുവരി 20 മുതൽ ആരംഭിക്കും. ഏറെ സുപ്രധാനമായ എസ്.എസ്.എൽ.സി പരീക്ഷകൾ 2027 മാർച്ചിലായിരിക്കും നടക്കുക. ഹയർ സെക്കൻഡറി വിഭാഗത്തിലെ പ്ലസ് വൺ, പ്ലസ് ടു പൊതുപരീക്ഷകൾ 2027 മാർച്ച് രണ്ടിന് ആരംഭിച്ച് മാർച്ച് 29-ഓടെ അവസാനിക്കുന്ന രീതിയിലാണ് ക്രമീകരിച്ചിരിക്കുന്നത്. കൃത്യമായ സമയപരിധിക്കുള്ളിൽ പരീക്ഷകളും ക്ലാസുകളും പൂർത്തിയാക്കാൻ പുതിയ കലണ്ടർ സഹായിക്കുമെന്ന് വിദ്യാഭ്യാസ വകുപ്പ് അറിയിച്ചു.

Photo Courtesy: Google/ images are subject to copyright