കേരളത്തിന്റെ വികസന ചരിത്രത്തിൽ പുതിയ നാഴികക്കല്ല് കുറിച്ചുകൊണ്ട് വിഴിഞ്ഞം അന്താരാഷ്ട്ര തുറമുഖ വികസനത്തിനായി വൻ വിദേശ നിക്ഷേപമെത്തുന്നു. ആഗോള ഷിപ്പിംഗ് ഭീമന്മാരായ മെഡിറ്ററേനിയൻ ഷിപ്പിംഗ് കമ്പനി (MSC) ഗ്രൂപ്പുമായി അദാനി പോർട്സ് തന്ത്രപരമായ പങ്കാളിത്തത്തിൽ ഏർപ്പെട്ടു കഴിഞ്ഞു. പുതിയ കരാർ പ്രകാരം അദാനി ഗ്രൂപ്പിന്റെ വിഴിഞ്ഞത്തെ 49 ശതമാനം ഓഹരികളാണ് എം.എസ്.സി ഗ്രൂപ്പ് ഏറ്റെടുക്കുന്നത്. ആകെ 27,000 കോടി രൂപയുടെ ഈ വൻകിട പദ്ധതിയിൽ 13,000 കോടി രൂപയാണ് എം.എസ്.സി ഗ്രൂപ്പ് നിക്ഷേപിക്കുക. സംസ്ഥാനത്തെ സംബന്ധിച്ചിടത്തോളം ചരിത്രത്തിലെ തന്നെ ഏറ്റവും വലിയ വിദേശ നിക്ഷേപമാണിത്.

ഈ തന്ത്രപരമായ നിക്ഷേപത്തിലൂടെ വിഴിഞ്ഞം തുറമുഖത്തിന്റെ സ്ഥാപിത ശേഷിയിൽ വലിയ തോതിലുള്ള വർദ്ധനവാണ് ഉണ്ടാകാൻ പോകുന്നത്. നിലവിൽ 16 ലക്ഷം ടി.ഇ.യു (TEU) വാർഷിക കൈകാര്യം ചെയ്യൽ ശേഷിയുള്ള തുറമുഖം, ഈ വികസന പ്രവർത്തനങ്ങളിലൂടെ മൂന്നര മടങ്ങ് ഉയർന്ന് 57 ലക്ഷം ടി.ഇ.യു ശേഷിയിലേക്ക് കുതിച്ചുയരും. 2024 ഡിസംബറിൽ കമ്മീഷൻ ചെയ്ത, ഇന്ത്യയിലെ ആദ്യത്തെ ഡീപ് ഡ്രാഫ്റ്റ് മെഗാ ട്രാൻസ്ഷിപ്പ്മെന്റ് തുറമുഖമായ വിഴിഞ്ഞത്തെ 2028 ഡിസംബറോടെ ഈ പുതിയ ലക്ഷ്യത്തിലേക്ക് എത്തിക്കാനാണ് കമ്പനി ലക്ഷ്യമിടുന്നത്.

വിഴിഞ്ഞം തുറമുഖം ഇതിനകം തന്നെ ഒരു പ്രധാന ട്രാൻസ്ഷിപ്പ്മെന്റ് ഹബ്ബായി ഉയർന്നുവരുകയും അഭൂതപൂർവമായ വേഗതയിൽ കുതിച്ചുയരുകയും ചെയ്തിട്ടുണ്ടെന്ന് അദാനി പോർട്സ് ആൻഡ് സ്പെഷ്യൽ ഇക്കണോമിക് സോൺ സി.ഇ.ഒ അശ്വനി ഗുപ്ത വ്യക്തമാക്കി. പ്രവർത്തനമാരംഭിച്ച് വെറും 18 മാസത്തിനുള്ളിൽ 2 ദശലക്ഷം ടി.ഇ.യു എന്ന അതുല്യമായ നേട്ടം കൈവരിക്കുന്ന ആദ്യത്തെ ഇന്ത്യൻ തുറമുഖമായി വിഴിഞ്ഞം മാറുമെന്നും അദ്ദേഹം കൂട്ടിച്ചേർത്തു. ഈ പുതിയ അന്താരാഷ്ട്ര സഹകരണത്തിലൂടെ കിഴക്കൻ ആഫ്രിക്കയിലെ വ്യാപാര റൂട്ടുകളിൽ ശക്തമായ സാന്നിധ്യം ഉറപ്പിക്കാനും, ബംഗ്ലാദേശിൽ നിന്നുള്ള ചരക്കുനീക്കവും റിലേ കാർഗോ വോളിയവും ഗണ്യമായി വർദ്ധിപ്പിക്കാനും സാധിക്കുമെന്നാണ് കമ്പനി പ്രതീക്ഷിക്കുന്നത്.