കേരള ഭരണവർഗത്തിനിടയിലും പൊതുസമൂഹത്തിലും ഏറെ ചർച്ച ചെയ്യപ്പെട്ട രണ്ട് മുതിർന്ന ഐ.എ.എസ് ഉദ്യോഗസ്ഥരുടെ സസ്‌പെൻഷൻ നടപടികൾ ഒടുവിൽ പിൻവലിച്ചു. ഡോ. ബി. അശോക്, എൻ. പ്രശാന്ത് എന്നിവരെയാണ് സർവീസിലേക്ക് തിരിച്ചെടുക്കാൻ മുഖ്യമന്ത്രി വി.ഡി. സതീശന്റെ നേതൃത്വത്തിലുള്ള സർക്കാർ തീരുമാനിച്ചത്. ഭരണകൂടത്തിന്റെ തെറ്റായ നയങ്ങളെയും ഉന്നത ഉദ്യോഗസ്ഥരുടെ വീഴ്ചകളെയും സമൂഹമാധ്യമങ്ങളിലൂടെയും മാധ്യമങ്ങളിലൂടെയും പരസ്യമായി വിമർശിക്കാൻ മടി കാണിക്കാത്ത ട്രാക്ക് റെക്കോർഡുള്ള ഉദ്യോഗസ്ഥരാണ് ഇരുവരും. മുൻ പിണറായി സർക്കാരിന്റെ കാലത്തുണ്ടായ കടുത്ത ഭിന്നതകളെത്തുടർന്നായിരുന്നു ഇരുവർക്കുമെതിരെ നടപടിയുണ്ടായിരുന്നത്.

ഇതിൽ മുൻ കളക്ടർ കൂടിയായ എൻ. പ്രശാന്ത് കഴിഞ്ഞ രണ്ട് വർഷത്തോളമായി സസ്‌പെൻഷനിലാണെന്നതും തന്റെ ഔദ്യോഗിക ജീവിതത്തിൽ ഒൻപതോളം തവണ സസ്‌പെൻഷൻ നേരിട്ടിട്ടുണ്ടെന്നതും ശ്രദ്ധേയമാണ്. സീനിയർ ഉദ്യോഗസ്ഥനായ ഡോ. ബി. അശോകിനെ നിയമസഭാ തിരഞ്ഞെടുപ്പ് ഫലം വരുന്നതിന് തൊട്ടുമുമ്പായിരുന്നു മുൻ സർക്കാർ സസ്‌പെൻഡ് ചെയ്തിരുന്നത്. തുടർഭരണം ഫാസിസത്തിലേക്ക് നയിക്കുമെന്ന രീതിയിൽ മാധ്യമങ്ങളിലൂടെ വിമർശനം ഉന്നയിച്ചതായിരുന്നു അശോകിനെതിരെയുള്ള അച്ചടക്ക നടപടിക്ക് കാരണമായത്. എന്നാൽ, നിയമസഭാ തിരഞ്ഞെടുപ്പ് ഫലം പുറത്തുവരുന്നതിന് തൊട്ടുമുമ്പ് കാവൽ സർക്കാരിന്റെ കാലത്തുണ്ടായ ഈ നടപടിക്ക് നിയമസാധുതയില്ലെന്നും ഉത്തരവ് മേശപ്പുറത്ത് കിടക്കട്ടെയെന്നുമായിരുന്നു അന്ന് അശോക് പ്രതികരിച്ചത്. 

മുൻപ് കേര പദ്ധതിയിലെ അഴിമതിയെക്കുറിച്ചുള്ള വാർത്തകൾ പുറത്തുവന്നതിന് പിന്നാലെ അശോകിനെ കൃഷിവകുപ്പിൽ നിന്ന് മാറ്റിയിരുന്നു. തുടർന്ന് കെ.ടി.ഡി.എഫ്.സി സി.എം.ഡി, തദ്ദേശ കമ്മീഷണർ, ഉദ്യോഗസ്ഥ ഭരണവകുപ്പ് പ്രിൻസിപ്പൽ സെക്രട്ടറി തുടങ്ങിയ പല അപ്രധാന തസ്തികകളിലേക്കും മാറ്റാൻ ശ്രമമുണ്ടായെങ്കിലും അദ്ദേഹം ട്രൈബ്യൂണലിനെ സമീപിച്ച് ഇത്തരം അപ്രധാന വകുപ്പുകളിലേക്കുള്ള മാറ്റങ്ങൾ തടയുകയായിരുന്നു. പൊതുജനങ്ങൾക്കിടയിൽ ‘ബ്രോ പ്രശാന്ത്’ എന്ന പേരിൽ അറിയപ്പെടുന്ന എൻ. പ്രശാന്ത് തന്റെ നിലപാടുകൾ തുറന്നുപറയാൻ പ്രധാനമായും ആശ്രയിച്ചിരുന്നത് സമൂഹമാധ്യമങ്ങളെയായിരുന്നു. 

തനിക്കെതിരെ ഉണ്ടാകുന്ന അച്ചടക്ക നടപടികൾക്ക് ട്രോളുകളിലൂടെ മറുപടി നൽകുന്നതായിരുന്നു പ്രശാന്തിന്റെ വേറിട്ട ശൈലി. ഒടുവിൽ ചീഫ് സെക്രട്ടറിക്കെതിരെ പരസ്യമായി വിമർശനം ഉന്നയിച്ചതിനെത്തുടർന്നാണ് പ്രശാന്തിനെതിരെ അവസാനമായി സസ്‌പെൻഷൻ നടപടിയുണ്ടാകുന്നത്. തനിക്കെതിരെയുള്ള വകുപ്പുതല ഹിയറിങ് നടപടികൾ തത്സമയം സംപ്രേഷണം (ലൈവ് സ്ട്രീം) ചെയ്യണമെന്ന് പോലും അദ്ദേഹം ആവശ്യപ്പെട്ട് രംഗത്തുവന്നിരുന്നു. ഭരണപക്ഷത്തെ ചില കോൺഗ്രസ് നേതാക്കൾ ഉദ്യോഗസ്ഥരുടെ ഇത്തരം പരസ്യമായ തുറന്നടിക്കലുകളിലെ വിയോജിപ്പ് ചൂണ്ടിക്കാണിച്ചിരുന്നെങ്കിലും, ഭരണപരമായ തീരുമാനങ്ങളുടെ ഭാഗമായി ഇരുവരെയും തിരിച്ചെടുക്കാൻ മുഖ്യമന്ത്രി നേരിട്ട് തീരുമാനിക്കുകയായിരുന്നു.

Photo Courtesy: Google/ images are subject to copyright