ഫിഫ ലോകകപ്പിന്റെ ആവേശകരമായ പ്രീ ക്വാർട്ടർ പോരാട്ടത്തിൽ പോർച്ചുഗലിനെ ഏകപക്ഷീയമായ ഒരു ഗോളിന് തകർത്ത് സ്പെയിൻ ക്വാർട്ടർ ഫൈനലിൽ പ്രവേശിച്ചു. ഡാലസിലെ കരുത്തരുടെ പോരാട്ടത്തിൽ ഇഞ്ചുറി ടൈമിൽ പകരക്കാരനായി എത്തിയ മിക്കേൽ മെറീനൊ നേടിയ ഗോളാണ് സ്പാനിഷ് പടയ്ക്ക് ഉജ്ജ്വല വിജയം സമ്മാനിച്ചത്. ഇതോടെ വലിയ താരനിരയുമായി കിരീടം ലക്ഷ്യമിട്ടെത്തിയ പോർച്ചുഗൽ ക്വാർട്ടർ പോലും കാണാതെ പുറത്തായി. ഈ തോൽവിയോടെ തന്റെ ആറാം ലോകകപ്പിലും കിരീടമില്ലാതെ സൂപ്പർ താരം ക്രിസ്റ്റ്യാനോ റൊണാൾഡോയ്ക്ക് നിരാശയോടെ മടങ്ങേണ്ടി വന്നു.

മത്സരത്തിന്റെ തുടക്കം മുതൽ തന്നെ ആക്രമിച്ച് കളിച്ച സ്പെയിൻ പോർച്ചുഗൽ ഗോൾമുഖത്ത് നിരന്തരം സമ്മർദ്ദം ചെലുത്തിയിരുന്നു. കളിയുടെ എട്ടാം മിനിറ്റിൽ ലഭിച്ച സുവർണ്ണാവസരം മിക്കേൽ ഒയർസബാൽ പാഴാക്കിയെങ്കിലും വലത് വിങ്ങിലൂടെ യുവതാരം ലമീൻ യമാൽ നടത്തിയ മുന്നേറ്റങ്ങൾ പോർച്ചുഗൽ പ്രതിരോധത്തെ വിറപ്പിച്ചു. ഗോൾകീപ്പർ ഡീയോഗോ കോസ്റ്റയുടെ മിന്നുന്ന സേവുകളാണ് ആദ്യപകുതിയിൽ പോർച്ചുഗലിനെ തുണച്ചത്. രണ്ടാം പകുതിയിൽ താളം കണ്ടെത്താൻ പോർച്ചുഗൽ ശ്രമിച്ചെങ്കിലും ഫിനിഷിങ്ങിലെ പിഴവുകൾ അവർക്ക് തിരിച്ചടിയായി.

55-ാം മിനിറ്റിൽ പരുക്കേറ്റ് പ്രതിരോധ താരം നൂനോ മെൻഡിസ് കളം വിട്ടതോടെ സ്പെയിൻ ആക്രമണം വീണ്ടും ശക്തമാക്കി. 74-ാം മിനിറ്റിൽ ലമീൻ യമാൽ എടുത്ത ഫ്രീക്കിക്ക് പോർച്ചുഗൽ കീപ്പർ തട്ടിയകറ്റി. മത്സരം അധികസമയത്തേക്ക് നീളുമെന്ന് ഉറപ്പായ ഘട്ടത്തിലാണ് ഡാനി ഓൽമോയ്ക്ക് പകരക്കാരനായി മിക്കേൽ മെറീനൊ കളത്തിലെത്തുന്നത്. ഒടുവിൽ ഇഞ്ചുറി ടൈമിൽ ഫെറാൻ ടോറസ് നൽകിയ കൃത്യമായ പാസ് മിക്കേൽ മെറീനൊ ലക്ഷ്യത്തിലെത്തിച്ചതോടെ പോർച്ചുഗലിന്റെ ലോകകപ്പ് സ്വപ്നങ്ങൾ പൂർണ്ണമായും തകരുകയായിരുന്നു.

Photo Courtesy: Google/ images are subject to copyright