ബിജെപി ദേശീയ ഭാരവാഹികളുടെ പുതിയ പട്ടിക പ്രഖ്യാപിച്ചു. സംഘടനാ അഴിച്ചുപണിയുടെ ഭാഗമായി കേരളത്തിൽ നിന്നുള്ള പ്രമുഖ നേതാക്കളായ അനിൽ ആന്റണിയെയും കെ. സുരേന്ദ്രനെയും ദേശീയ സെക്രട്ടറിമാരായി നിയമിച്ചു. 13 വൈസ് പ്രസിഡന്റുമാരും എട്ട് ജനറൽ സെക്രട്ടറിമാരും അടങ്ങുന്ന വിപുലമായ ഭാരവാഹി പട്ടികയാണ് പാർട്ടി കേന്ദ്ര നേതൃത്വം പുറത്തിറക്കിയത്.

പുതിയ പട്ടികയിൽ അനിൽ ആന്റണി ദേശീയ സെക്രട്ടറിയായി തുടരുമ്പോൾ, കെ. സുരേന്ദ്രനും സംഘടനാ തലപ്പത്ത് സുപ്രധാന ചുമതല ലഭിച്ചു. അതേസമയം, നിലവിലെ ദേശീയ വൈസ് പ്രസിഡന്റ് സ്ഥാനത്തുനിന്ന് അബ്ദുള്ളക്കുട്ടിയെ ഒഴിവാക്കിയിട്ടുണ്ട്. ബി.എൽ. സന്തോഷ് സംഘടനാ ചുമതലയുള്ള ജനറൽ സെക്രട്ടറിയായി തുടരും. കേന്ദ്രമന്ത്രി പീയുഷ് ഗോയലിനെ പാർട്ടിയുടെ പുതിയ ദേശീയ ട്രഷററായി നിയമിച്ചപ്പോൾ യുവമോർച്ച അധ്യക്ഷനായി ഡോ. ഹേമന്ത് ജോഷിയെ തിരഞ്ഞെടുത്തു.

വസുന്ധര രാജെ സിന്ധ്യ, രാം മാധവ് എന്നിവർ ദേശീയ ഉപാധ്യക്ഷന്മാരാകും. സ്മൃതി ഇറാനിയെ ദേശീയ ജനറൽ സെക്രട്ടറിയായും ചുമതലപ്പെടുത്തിയിട്ടുണ്ട്.വരാനിരിക്കുന്ന നിർണായക നിയമസഭാ തിരഞ്ഞെടുപ്പുകൾ മുൻനിർത്തി അനുഭവസമ്പത്തും യുവത്വവും ഒരുപോലെ സംയോജിപ്പിച്ചാണ് പാർട്ടി ഘടന പുനഃസംഘടിപ്പിച്ചിരിക്കുന്നത്. സ്ത്രീ പ്രാതിനിധ്യത്തിനും പ്രാദേശിക സംതുലനത്തിനും വ്യക്തമായ പ്രാധാന്യം നൽകുന്നതാണ് ബിജെപിയുടെ ഈ പുതിയ സംഘടനാ ചുവടുവെപ്പ്.

Photo Courtesy: Google/ images are subject to copyright