നേപ്പാൾ-ടിബറ്റ് അതിർത്തിയിലെ തടാകം തകർന്നതിനെ തുടർന്ന് മേഖലയിൽ വീണ്ടും അതിശക്തമായ പ്രളയസാധ്യത. അപകടസാധ്യത കണക്കിലെടുത്ത് ദുരന്തബാധിത പ്രദേശങ്ങളിൽ രക്ഷാപ്രവർത്തനത്തിൽ ഏർപ്പെട്ടിരിക്കുന്ന സുരക്ഷാ സേനാംഗങ്ങളോടും വളന്റിയർമാരോടും അതീവ ജാഗ്രത പാലിക്കാനും സുരക്ഷിത സ്ഥാനങ്ങളിലേക്ക് മാറാനും നേപ്പാൾ പോലീസ് കർശന നിർദേശം നൽകി.

രണ്ടു ദിവസം മുൻപുണ്ടായ മിന്നൽ പ്രളയത്തിന്റെ നടുക്കത്തിൽ നിന്ന് നേപ്പാൾ ഇനിയും മുക്തമായിട്ടില്ല. നേപ്പാളിലും ടിബറ്റിലുമായി ഇതിനകം 469 പേർ മരണപ്പെടുകയും 1,500-ലധികം ആളുകളെ കാണാതാവുകയും ചെയ്തിട്ടുണ്ട്. ഈ വൻ ദുരന്തത്തിൽ രക്ഷാപ്രവർത്തനം പുരോഗമിക്കുന്നതിനിടെയാണ് അടുത്ത പ്രഹരമായി തടാകം തകർന്ന വാർത്ത പുറത്തുവന്നത്. തടാകം തകർന്നുണ്ടായ വെള്ളപ്പാച്ചിൽ പുതിയ വെള്ളപ്പൊക്കത്തിന് വഴിവെച്ചേക്കുമെന്നതിനാലാണ് രക്ഷാപ്രവർത്തകർക്ക് അടിയന്തര മുന്നറിയിപ്പ് നൽകിയത്.

ആയിരക്കണക്കിന് സുരക്ഷാ സേനാംഗങ്ങളും ദുരന്തനിവാരണ പ്രവർത്തകരുമാണ് നിലവിൽ പ്രദേശത്ത് രക്ഷാപ്രവർത്തനം നടത്തുന്നത്. അതേസമയം, തുടർ പ്രളയസാധ്യത വിലയിരുത്തുന്നതിനും നിരീക്ഷിക്കുന്നതിനുമായി നേപ്പാൾ സൈന്യം ഭോട്ടെ കോശി നദീതീരത്തേക്ക് പ്രത്യേക നിരീക്ഷണ സംഘത്തെ അയച്ചിട്ടുണ്ട്.

Photo Courtesy: Google/ images are subject to copyright