മിന്നൽ പ്രളയം വിതച്ച നാശനഷ്ടങ്ങളിൽ വിറങ്ങലിച്ച് നേപ്പാൾ. രാജ്യത്ത് പ്രളയക്കെടുതിയിൽ മരിച്ചവരുടെ എണ്ണം കുത്തനെ ഉയർന്ന് 538 ആയി. ദുരന്തബാധിത മേഖലകളിൽ നിന്ന് 85 ഇന്ത്യൻ വിനോദസഞ്ചാരികൾ ഉൾപ്പെടെ 121 വിദേശ പൗരന്മാരെ ഇതുവരെ സുരക്ഷിതമായി രക്ഷപ്പെടുത്തിയതായി നേപ്പാൾ ടൂറിസം ബോർഡ് വ്യക്തമാക്കി. ദുരന്തത്തിൽ എട്ട് മലയാളികളെ കാണാതായതായും ഇവരെക്കുറിച്ചുള്ള വിവരങ്ങൾ തുടർനടപടികൾക്കായി കേന്ദ്ര വിദേശകാര്യ മന്ത്രാലയത്തിന് കൈമാറിയതായും നോർക്ക അറിയിച്ചു.

തുടർച്ചയായ മൂന്നാം ദിവസവും മേഖലയിൽ യുദ്ധകാലാടിസ്ഥാനത്തിൽ രക്ഷാപ്രവർത്തനം പുരോഗമിക്കുകയാണ്. ദുരന്തത്തിൽ ആകെ 320 ഇന്ത്യക്കാരെ കാണാതായതായി വിദേശകാര്യ മന്ത്രാലയം സ്ഥിരീകരിച്ചു. നേപ്പാളിന് കൂടുതൽ സഹായമെത്തിക്കുന്നതിനായി ഇന്ത്യൻ വ്യോമസേനയുടെ ഒരു വിമാനം കൂടി ഇന്ന് ദുരിതാശ്വാസ സാമഗ്രികളുമായി പുറപ്പെടും. ഇന്ത്യൻ സേനയും നേപ്പാൾ സുരക്ഷാ വിഭാഗങ്ങളും ചേർന്ന് സംയുക്തമായാണ് തെരച്ചിലും രക്ഷാപ്രവർത്തനവും ഏകോപിപ്പിക്കുന്നത്.

Photo Courtesy: Google/ images are subject to copyright