തമിഴ്‌നാട്ടിലെ കർഷകർക്കായി വൻ ജനപ്രിയ പ്രഖ്യാപനവുമായി മുഖ്യമന്ത്രി ജോസഫ് വിജയ്. സഹകരണ ബാങ്കുകളിൽ നിന്ന് എടുത്തിട്ടുള്ള 75,000 രൂപ വരെയുള്ള കാർഷിക വായ്പകൾ പൂർണമായി എഴുതിത്തള്ളുമെന്ന് അദ്ദേഹം നിയമസഭയിൽ പ്രഖ്യാപിച്ചു.

75,000 രൂപ മുതൽ ഒരു ലക്ഷം രൂപ വരെയുള്ള വായ്പകൾക്ക് 75,000 രൂപ വരെ ഇളവ് നൽകുമെന്നും മുഖ്യമന്ത്രി കൂട്ടിച്ചേർത്തു. സർക്കാരിന്റെ ഈ സുപ്രധാന തീരുമാനം സംസ്ഥാനത്തെ 13.34 ലക്ഷം കർഷകർക്ക് നേരിട്ട് ഗുണകരമാകുമെന്നാണ് കണക്കാക്കുന്നത്.

കഴിഞ്ഞ മേയ് മാസത്തിൽ അധികാരമേറ്റെടുത്തതിന് പിന്നാലെ, തന്റെ സർക്കാർ 50,000 രൂപ വരെയുള്ള കാർഷിക വായ്പകൾ എഴുതിത്തള്ളിയിരുന്നതായി അദ്ദേഹം ഓർമിപ്പിച്ചു. “കൃഷി സംസ്ഥാനത്തിന്റെ നട്ടെല്ലാണ്. കർഷകർക്ക് നൽകുന്ന പിന്തുണയെ ആശ്രയിച്ചായിരിക്കും രാജ്യത്തിന്റെ സമൃദ്ധി നിലനിൽക്കുന്നത്,” എന്ന് വിജയ് നിയമസഭയിൽ പറഞ്ഞു.

സംസ്ഥാനം കടുത്ത സാമ്പത്തിക ബുദ്ധിമുട്ടുകൾ നേരിടുന്നുണ്ടെങ്കിലും കർഷകരുടെ ക്ഷേമം മുൻനിർത്തി 953.06 കോടി രൂപയുടെ അധികസഹായം നൽകാൻ സർക്കാർ തീരുമാനിക്കുകയായിരുന്നു.

Photo Courtesy: Google/ images are subject to copyright