2029-ലെ ലോക്‌സഭാ തെരഞ്ഞെടുപ്പിൽ രാഹുൽ ഗാന്ധിയെ പ്രധാനമന്ത്രി സ്ഥാനാർത്ഥിയായി തമിഴക വെട്രി കഴകം (ടി.വി.കെ) പിന്തുണച്ചില്ലെങ്കിൽ തമിഴ്‌നാട് മന്ത്രിസഭയിൽ നിന്ന് കോൺഗ്രസ് മന്ത്രിമാർ രാജിവെക്കുമെന്ന് ടൂറിസം മന്ത്രി എസ്. രാജേഷ് കുമാർ. കന്യാകുമാരി വെസ്റ്റ് ജില്ലാ കോൺഗ്രസ് കമ്മിറ്റി പ്രസിഡന്റായി ജോർജ് റോബിൻസൺ ചുമതലയേൽക്കുന്ന ചടങ്ങിൽ സംസാരിക്കവെയാണ് മന്ത്രി ഈ മുന്നറിയിപ്പ് നൽകിയത്. 2029-ൽ രാഹുൽ ഗാന്ധി രാജ്യത്തിന്റെ പ്രധാനമന്ത്രിയാകുമെന്നും അദ്ദേഹം വ്യക്തമാക്കി.

1967-ന് ശേഷം ആദ്യമായി കോൺഗ്രസ് തമിഴ്‌നാട് ഭരണത്തിന്റെ ഭാഗമായ ഘട്ടത്തിലാണ് സഖ്യകക്ഷിയായ ടി.വി.കെയ്ക്ക് സമ്മർദ്ദം സൃഷ്ടിച്ച് മന്ത്രിയുടെ ഈ പ്രസ്താവന വന്നിരിക്കുന്നത്. മുഖ്യമന്ത്രി സി. ജോസഫ് വിജയ് നേതൃത്വം നൽകുന്ന സർക്കാരിൽ നിലവിൽ കോൺഗ്രസിന് രണ്ട് മന്ത്രിസ്ഥാനങ്ങളാണുള്ളത്.

234 അംഗ നിയമസഭയിൽ കേവലഭൂരിപക്ഷത്തിന് 118 സീറ്റുകൾ വേണമെന്നിരിക്കെ, 108 സീറ്റുകൾ നേടി ഏറ്റവും വലിയ ഒറ്റക്കക്ഷിയായ ടി.വി.കെ കോൺഗ്രസിന്റെയും മറ്റ് സഖ്യകക്ഷികളുടെയും പിന്തുണയോടെയാണ് സർക്കാർ രൂപീകരിച്ചത്. ഈ സാഹചര്യത്തിൽ മുന്നണിക്കുള്ളിൽ നിന്നുള്ള കോൺഗ്രസ് മന്ത്രിയുടെ പരസ്യനിലപാട് തമിഴ്‌നാട് രാഷ്ട്രീയത്തിൽ വലിയ ചർച്ചകൾക്ക് വഴിവെച്ചിരിക്കുകയാണ്.

Photo Courtesy: Google/ images are subject to copyright