ഏഷ്യൻ ഗെയിംസ് അത്‌ലറ്റിക്സിൽ ഇന്ത്യ കാത്തിരുന്ന ആദ്യ സ്വർണ നേട്ടത്തിൽ മുങ്ങി. വനിതകളുടെ 4×400 മീറ്റർ റിലേയിൽ 3:29.69 മിനിറ്റിൽ ഫിനിഷ് ചെയ്താണ് ഇന്ത്യൻ സംഘം ചരിത്ര സ്വർണം കഴുത്തിലണിഞ്ഞത്. കിരൺ, മചെതിര പൂവമ്മ, പ്രാചി, വിദ്യ രാംരാജ് എന്നിവരടങ്ങിയ ടീമാണ് ഇന്ത്യയ്ക്കായി ഈ മിന്നുന്ന വിജയം നേടിയെടുത്തത്. 400 മീറ്റർ റിലേയിൽ കരുത്തരായ ബഹ്റൈൻ വെള്ളി മെഡൽ നേടിയപ്പോൾ ചൈന വെങ്കലം കൊണ്ട് തൃപ്തിപ്പെട്ടു.

അത്‍ലറ്റിക്സിലെ മറ്റു പോരാട്ടങ്ങളിലും ഭാരതീയ താരങ്ങൾ മികച്ച പ്രകടനം പുറത്തെടുത്തു. 5000 മീറ്റർ ഓട്ടത്തിൽ ഇന്ത്യയുടെ ഗുൽവീർ സിങ് വെങ്കല മെഡൽ നേടി. ഗെയിംസിൽ നേരത്തേ 1500 മീറ്ററിലും 10,000 മീറ്ററിലും വെള്ളി കരസ്ഥമാക്കിയ ഗുൽവീറിന്റെ ഈ ടൂർണമെന്റിലെ മൂന്നാം മെഡലാണിത്. 4×100 മീറ്റർ മിക്സഡ് റിലേയിൽ 41.06 സെക്കൻഡെന്ന ദേശീയ റെക്കോർഡ് തിരുത്തിക്കുറിച്ചാണ് ഇന്ത്യ വെങ്കലം സ്വന്തമാക്കിയത്. ഗുർവീന്ദർ സിങ്, സ്നേഹ, അനിമേഷ് കുജൂർ, ഹരിത ഭദ്ര എന്നിവരാണ് മിക്സഡ് റിലേ ടീമിൽ അണിനിരന്നത്. കൂടാതെ, വനിതാ ഹൈജംപിൽ ഇന്ത്യയുടെ പൂജ സിങ് വെങ്കല മെഡലും വിജയിച്ചു.

ഷൂട്ടിങ് റേഞ്ചിലും ഇന്ത്യ സ്വർണത്തിളക്കം തുടർന്നു. വനിതാ വിഭാഗം ട്രാപ് ഷൂട്ടിങ്ങിൽ ഇന്ത്യയുടെ നീരു ദണ്ഡ ഗെയിംസിലെ ആദ്യ വ്യക്തിഗത സ്വർണം നേടി. ഏഷ്യൻ റെക്കോർഡോടെ 28 പോയിന്റുകൾ നേടിയാണ് നീരു ഒന്നാമതെത്തിയത്. ചൈനയുടെ സൺ യുനോങ് വെള്ളിയും കുവൈറ്റിന്റെ അബ്ദുൽ മാലിക് ഹജർ വെങ്കലവും സ്വന്തമാക്കി. ഇതിനുപുറമേ വനിതാ ഷൂട്ടിങ് ട്രാപ് ടീം ഇനത്തിൽ 328 പോയിന്റുകളോടെ ഇന്ത്യ വെള്ളി മെഡലും കരസ്ഥമാക്കി. ഈ വിഭാഗത്തിൽ ചൈന സ്വർണവും കുവൈറ്റ് വെങ്കലവും നേടി.

Photo Courtesy: Google/ images are subject to copyright