ഭീകരവാദത്തെ സഹായിക്കുകയും പ്രോത്സാഹിപ്പിക്കുകയും ചെയ്യുന്നവർക്കെതിരെ ഷാങ്ഹായ് സഹകരണ ഉച്ചകോടിയിൽ (SCO) രൂക്ഷ വിമർശനവുമായി പ്രധാനമന്ത്രി നരേന്ദ്ര മോദി. ഭീകരവാദത്തിനെതിരെ ലോകരാജ്യങ്ങൾ ഒറ്റക്കെട്ടായി നിലപാടെടുക്കണമെന്നും ഇക്കാര്യത്തിൽ യാതൊരുവിധ ഇരട്ടത്താപ്പും പാടില്ലെന്നും അദ്ദേഹം വ്യക്തമാക്കി. ഭീകരർക്ക് സുരക്ഷിത താവളങ്ങളും സാമ്പത്തിക സഹായവും ലഭിക്കുന്നത് തടയണമെന്നും, ഭീകരവാദത്തെ തന്ത്രപ്രധാന നയമാക്കുന്ന രാജ്യങ്ങളെ ഒറ്റപ്പെടുത്തണമെന്നും പാക് പ്രധാനമന്ത്രി ഷെഹ്ബാസ് ഷെരീഫിന്റെ സാന്നിധ്യത്തിൽ മോദി ആവശ്യപ്പെട്ടു. മതമൗലികവാദവും മയക്കുമരുന്ന് മാഫിയയും ചെറുക്കാൻ കൂട്ടായ നീക്കം അനിവാര്യമാണെന്നും ഭീകരവാദം തുടച്ചുനീക്കേണ്ടത് മാനവരാശിയുടെ നിലനിൽപ്പിന് അത്യാവശ്യമാണെന്നും അദ്ദേഹം ഓർമ്മിപ്പിച്ചു.

ഉച്ചകോടിക്കിടെ ചൈനീസ് പ്രസിഡന്റ് ഷീ ജിൻപിങ്, റഷ്യൻ പ്രസിഡന്റ് വ്ലാദിമിർ പുടിൻ എന്നിവരുമായി ഹസ്തദാനം നൽകി സൗഹൃദം പങ്കുവെച്ച മോദി, പാക് പ്രധാനമന്ത്രിയെ പൂർണ്ണമായും അവഗണിച്ചു. വികസന പദ്ധതികൾ നടപ്പാക്കുമ്പോൾ രാജ്യങ്ങളുടെ പരമാധികാരവും പ്രാദേശിക അഖണ്ഡതയും സംരക്ഷിക്കപ്പെടണമെന്ന് വ്യക്തമാക്കിയതിലൂടെ പാക് അധീന കശ്മീരിലൂടെയുള്ള ചൈനയുടെ നിർമ്മാണ പ്രവർത്തനങ്ങൾക്കെതിരെ പ്രധാനമന്ത്രി പരോക്ഷ മുന്നറിയിപ്പ് നൽകി. ഇന്ത്യ-ചൈന-റഷ്യ സഹകരണത്തിന്റെ പ്രാധാന്യം വ്യക്തമാക്കിയ ഉച്ചകോടിയിലെ കാഴ്ചകൾ, ഈ മാസം ദില്ലിയിൽ നടക്കുന്ന ബ്രിക്സ് ഉച്ചകോടിയിൽ ഷീ ജിൻപിങ്ങിന്റെയും വ്ലാദിമിർ പുടിന്റെയും സാന്നിധ്യം ഉണ്ടാകുമെന്ന ശക്തമായ സൂചനയും നൽകുന്നുണ്ട്.

Photo Courtesy: Google/ images are subject to copyright