വ്യാഴാഴ്ച ബാങ്കുകള് പ്രവര്ത്തിക്കില്ല; നവംബര് 26ന് നടക്കുന്ന ദേശീയ പണിമുടക്കില് ബാങ്ക് ജീവനക്കാര് പങ്കെടുക്കും.
നവംബര് 26 ൽ നടക്കുന്ന ദേശീയ പണിമുടക്കില് ബാങ്ക് ജീവനക്കാരും പങ്കെടുക്കും. പൊതുമേഖല ബാങ്കുകള്, സ്വകാര്യ ബാങ്കുകള്, പുതുതലമുറ ബാങ്കുകള്, സഹകരണ ഗ്രാമീണ ബാങ്കുകള് എന്നിവിടങ്ങളിലെ ജീവനക്കാരാണ് പണിമുടക്ക് പ്രഖ്യാപിച്ചത്.
ബാങ്ക് എംപ്ലോയീസ് ഫെഡറേഷന് ഓഫ് ഇന്ത്യ (ബെഫി), എഐബിഇഎ, എഐബിഇഒ എന്നീ സംഘടനകള് കേന്ദ്രസര്ക്കാര് നയങ്ങള്ക്കെതിരെ നടത്തുന്ന പണിമുടക്കില് പങ്കെടുക്കും. ഗ്രാമീണ ബാങ്കിങ് മേഖലകളിലെ യുണൈറ്റഡ് ഫോറം ഓഫ് റീജിയണല് റൂറല് ബാങ്ക് എപ്ലോയീസ് യൂണിയൻ്റെ നേതൃത്വത്തില് ജീവനക്കാരും ഓഫിസര്മാരും പണിമുടക്കും.
ഇതുകൂടാതെ റിസര്വ് ബാങ്കില് എഐആര്ബിഇഎ, എഐആര്ബിഡബ്ല്യു, ആര്ബിഇഎ എന്നീ സംഘടനകളും പണിമുടക്കിന് ആഹ്വാനം ചെയ്തിട്ടുണ്ട്. അവശ്യസേവന മേഖലകളില് ഒഴികെയുള്ള തൊഴിലാളികളും കര്ഷകരും പങ്കെടുക്കുമെന്നും വ്യാപാര സ്ഥാപനങ്ങള് തുറക്കില്ലെന്നും പൊതുഗതാഗതം ഉണ്ടാകില്ലെന്നും സംയുക്ത സമരസമിതി അറിയിച്ചു.
കേന്ദ്ര സര്ക്കാര് തുടരുന്ന തൊഴിലാളി കര്ഷക വിരുദ്ധ നടപടികള്ക്കെതിരെ സംയുക്ത ട്രേഡ് യൂണിയന് ആഹ്വാനം ചെയ്ത ദേശീയ പണിമുടക്ക് 25ന് അര്ധരാത്രി 12 മുതല് 26ന് രാത്രി 12 വരെയാണ്. സ്വകാര്യ വാഹനങ്ങളോടും പണിമുടക്കുമായി സഹകരിക്കണമെന്ന് അഭ്യര്ഥിച്ചിട്ടുണ്ട്. ടൂറിസം മേഖല, പാല്-പത്ര വിതരണം, ആശുപത്രി എന്നിവ ഒഴിവാക്കി. തെരഞ്ഞെടുപ്പ് കമീഷന് ഓഫീസുകളുടെ പ്രവര്ത്തനങ്ങളെയും ഉദ്യോഗസ്ഥരുടെ അവശ്യ യാത്രകളെയും ബാധിക്കില്ല.
Photo Courtesy : Google/ images are subject to copyright