ഈയടുത്ത ദിവസങ്ങളിൽ കേരളത്തിന്റെ മനഃസാക്ഷിയെ വേദനിപ്പിച്ച ഒരു വിഷയമാണ് എഡിഎം നവീൻ ബാബുവിന്റെ മരണം. അദ്ദേഹത്തിന്റെ  യാത്രയയപ്പുവേദിയിൽ കടന്നുവന്ന്  അധികാരഗർവ്വിന്റെയും ധാർഷ്ട്യത്തിന്റെയും വിഷം വമിപ്പിച്ച് ഇറങ്ങിപ്പോയപ്പോൾ ഒരു വ്യക്തി എന്ന നിലയിൽ നവീൻ ബാബുവിന്റെ  ആത്മാഭിമാനത്തിനേറ്റ അടിയായിരുന്നുവത്. അതിന് അദ്ദേഹം തന്റെ ജീവൻ കൊണ്ട്   മറുപടിനൽകിയത് അത്യന്തം വേദനാജനകമാണ്. എഡിഎം  അഴിമതി തീണ്ടാത്ത ഉദ്യോഗസ്ഥനാണെന്നു വകുപ്പു മന്ത്രിയും റവന്യു വകുപ്പ് ജീവനക്കാരും സഹപ്രവർത്തകരും രാഷ്ട്രീയവ്യത്യാസമില്ലാതെ ഉറപ്പിച്ചു പറയുകയും പെ‍ാതുവികാരം അതിനെ‍ാപ്പമാവുകയും ചെയ്യുമ്പോൾ നിരപരാധിയായ ഒരു മനുഷ്യനെ യാതൊരു പരിഗണനയും നൽകാതെ  മരണത്തിലേക്ക് തള്ളിവിട്ട ജനപ്രതിനിധിയുടെ നീചപ്രവൃത്തി യാതൊരുവിധ ന്യായീകരണവുമർഹിക്കുന്നില്ല. ഇനിയും ഇത്തരം സംഭവങ്ങൾ പ്രബുദ്ധകേരളത്തിൽ ആവർത്തിക്കാതിരിക്കട്ടെ. 

 ഏറ്റവും മികച്ച ടെക്നോളോജിയും  ആധുനികതയും കലയും ചേർന്ന അതുല്യതയുടെ  ബ്രാൻഡും പ്രൗഢിയുടെ ലോകത്തെ  പുത്തൻ താരവുമായ അൽകാസർ വാച്ചുകളുടെ  വിശേഷങ്ങളാണ് ഇത്തവണത്തെ കവർസ്റ്റോറിയിൽ. മണപ്പുറം ഫിനാൻസ് എം ഡി ആൻഡ് സി ഇ ഒ  വി പി നന്ദകുമാർ തന്റെ  സ്ഥിരം പംക്തിയിൽ ‘”എയ്ഞ്ചൽ ടാക്സ്”  ഒരു വിശകലനം ‘ എന്ന വിഷയത്തെക്കുറിച്ച്   വിശകലനം ചെയ്യുന്നു. ദീപാവലി മധുരങ്ങളുമായി പാചകപ്പുരയും കൂടാതെ പതിവ് പംക്തികളും വായനക്കാർക്കായി ഒരുക്കിയിരിക്കുന്നു. എല്ലാ വായനക്കാർക്കും ദീപാവലി ആശംസകൾ!

നല്ലൊരു വായനാനുഭവം ആശംസിക്കുന്നു !