രാജ്യത്തിന്റെ സാമ്പത്തികവളർച്ചയുടെ കണക്കുകൾ ഉയരുമ്പോഴും, വിലവർദ്ധനവ് കാരണം സാധാരണ ജനങ്ങളുടെ ദൈനംദിനജീവിതം കൂടുതൽ കഠിനമാകുകയാണ്. ഇടത്തരം കുടുംബങ്ങളെയാണ് ഇത് കൂടുതൽ ബാധിക്കുക. വരുമാനവർദ്ധനവില്ലാതെ ചെലവുകൾ മാത്രം കൂടുമ്പോൾ, അവർക്കു സാമ്പത്തിക മാനേജ്‌മെന്റ് ഒരു വലിയ വെല്ലുവിളിയായി മാറുന്നു. ഈ സാഹചര്യം മറികടക്കാൻ വിലസ്ഥിരത ഉറപ്പാക്കുകയെന്നത് ഏതു സർക്കാരിന്റെയും അടിസ്ഥാനബാധ്യതയാണ്. കൂടാതെ വിപണിയിൽ ആവശ്യ-വിതരണ സന്തുലിതാവസ്ഥ ഉറപ്പാക്കുകയും, അനാവശ്യ നികുതിഭാരം കുറയ്ക്കുകയും ചെയ്യേണ്ടതും അനിവാര്യമാണ്. ഒപ്പം പൊതുവിതരണ സംവിധാനങ്ങൾ ശക്തിപ്പെടുത്തുകയും, വിലനിയന്ത്രണത്തിന് ഫലപ്രദമായ നയങ്ങൾ നടപ്പിലാക്കുകയും വേണം.
അമൂർത്തമായ ആശയങ്ങൾക്കല്ല, മികച്ച ഗുണം നൽകുന്ന ഉൽപ്പന്നങ്ങൾക്കും, കൃത്യമായി ലഭിക്കുന്ന സേവനങ്ങൾക്കുമാണ് പ്രാധാന്യം എന്ന തത്വം പ്രാവർത്തികമാക്കി ബിസിനസ്സിൽ വിജയം നേടിയ, ക്ലാമി കോസ്മെറ്റിക്സിന്റെ മാനേജിങ് ഡയറക്ടർ അനീഷ് കെ ജോയിയുടെ വിശേഷങ്ങളാണ് ഇത്തവണത്തെ കവർസ്റ്റോറിയിൽ.
മണപ്പുറം ഫിനാൻസ് എം.ഡി ആൻഡ് സി.ഇ.ഒ വി.പി. നന്ദകുമാർ തന്റെ സ്ഥിരം പംക്തിയിൽ “വർക്ക്ഫോഴ്‌സ് പുനർരൂപകൽപ്പന: ജോലികളിൽ നിന്ന് നൈപുണ്യ വാസ്തുവിദ്യയിലേക്ക്” എന്ന വിഷയത്തെക്കുറിച്ച് വിശകലനം ചെയ്യുന്നു. കൂടാതെ പതിവ് പംക്തികളും വായനക്കാർക്കായി ഒരുക്കിയിരിക്കുന്നു. എല്ലാ വായനക്കാർക്കും നല്ലൊരു വായനാനുഭവം ആശംസിക്കുന്നു!

Thank you
Sd/-
Ajit Ravi