വാഹനത്തില്‍ ഒരാള്‍ മാത്രമേ ഉള്ളുവെങ്കിലും മാസ്‌ക് നിര്‍ബന്ധമായി വയ്ക്കണമെന്ന് ഡല്‍ഹി ഹൈക്കോടതി.
രാജ്യത്ത് കോവിഡ് വ്യാപനം രൂക്ഷമായി തുടരുന്ന പശ്ചാത്തലത്തില്‍ വാഹനത്തില്‍ ഒരാള്‍ മാത്രമേ ഉള്ളുവെങ്കിലും മാസ്‌ക് നിര്‍ബന്ധമായി വയ്ക്കണമെന്ന് ഡല്‍ഹി ഹൈക്കോടതി. സ്വകാര്യ വാഹനം ഒറ്റയ്ക്ക് ഓടിക്കുമ്പോഴും മാസ്‌ക് ധരിക്കാത്തതിൻ്റെ പേരില്‍ പിഴ ചുമത്താനുള്ള ഡല്‍ഹി സര്‍ക്കാര്‍ തീരുമാനം ചോദ്യം ചെയ്ത് സമര്‍പ്പിച്ച റിട്ട് ഹര്‍ജി തള്ളിക്കൊണ്ടാണ് ഡല്‍ഹി ഹൈക്കോടതിയുടെ നിര്‍ദേശം.
കോവിഡില്‍ നിന്ന് സംരക്ഷണം നല്‍കുന്ന കവചമാണ് മാസ്‌ക് എന്ന് ഡല്‍ഹി ഹൈക്കോടതി സിംഗിള്‍ ബെഞ്ച് അഭിപ്രായപ്പെട്ടു. മാസ്‌ക് ധരിക്കുന്നയാളെയും ചുറ്റുമുള്ള ആളുകളെയും ഇത് കോവിഡില്‍ നിന്ന് സംരക്ഷിക്കും. വിദഗ്ധരും രാജ്യാന്തര സംഘടനകളും മാസ്‌ക് ധരിക്കാനാണ് നിര്‍ദേശിക്കുന്നത്. മഹാമാരി സൃഷ്ടിച്ച വെല്ലുവിളി വലുതാണ്. വാക്‌സിന്‍ സ്വീകരിച്ചോ ഇല്ലയോ എന്നതൊന്നും പ്രശ്‌നമല്ല. എല്ലാവരും മാസ്‌ക് ധരിക്കണമെന്ന് ജസ്റ്റിസ് പ്രതിഭ എം സിങ് നിര്‍ദേശിച്ചു.
സ്വകാര്യ വാഹനം ഒറ്റയ്ക്ക് ഓടിക്കുമ്പോള്‍ കൂടി മാസ്‌ക് ധരിക്കാത്തതിൻ്റെ പേരില്‍ വിവിധ ഭാഗങ്ങളില്‍ പിഴ ചുമത്തുന്നതിനെ ചോദ്യം ചെയ്ത് നിരവധിപേരാണ് കോടതിയെ സമീപിച്ചത്. വാദത്തിനിടെ, വാഹനത്തില്‍ ഒറ്റയ്ക്കാണെങ്കില്‍ കൂടി മാസ്‌ക് ധരിക്കണമെന്ന തരത്തില്‍ നിര്‍ദേശം ഒന്നും നല്‍കിയിട്ടില്ല എന്ന് കേന്ദ്രസര്‍ക്കാര്‍ കോടതിയെ ബോധിപ്പിച്ചു. കൂടാതെ ആരോഗ്യം സംസ്ഥാന വിഷയമാണെന്നും കേന്ദ്രം ധരിപ്പിച്ചു. വാഹനം ഓടിക്കുമ്പോഴും മാസ്‌ക് ധരിക്കണമെന്ന് നിര്‍ദേശിക്കുന്ന ഉത്തരവ് കഴിഞ്ഞവര്‍ഷം ഏപ്രിലില്‍ ഇറക്കിയിരുന്നു. ഇത് ഇപ്പോഴും പ്രാബല്യത്തില്‍ ഉണ്ടെന്ന് ഡല്‍ഹി സര്‍ക്കാര്‍ അറിയിച്ചു. ഇതിൻ്റെ അടിസ്ഥാനത്തിലാണ് കോടതി വിധി.
Photo Courtesy : Google/ images are subject to copyright
