കേദാര്നാഥ് ക്ഷേത്രത്തിൽ പുനഃര്നിര്മ്മിച്ച 12 അടി ഉയരമുള്ള ആദി ശങ്കരാചാര്യരുടെ പ്രതിമ പ്രധാനമന്ത്രി നരേന്ദ്ര മോദി രാജ്യത്തിന് സമര്പ്പിച്ചു.
ഉത്തരാഖണ്ഡിലെ കേദാര്നാഥ് ക്ഷേത്രത്തിലാണ് 35 ടണ് ഭാരമുള്ള പ്രതിമ സ്ഥിതി ചെയ്യുന്നത്. ഇന്ന് രാവിലെ 8.30ന് കേഥാര്നാഥിലെത്തിയ പ്രധാനമന്ത്രി ക്ഷേത്രത്തില് പ്രവേശിച്ച് പൂജകള് നടത്തിയ ശേഷമാണ് ആദി ശങ്കരന്റെ പ്രതിമ അനാച്ഛാദനം ചെയ്തത്. ശങ്കരാചാര്യരുടെ ജന്മനാടായ കാലടിയിലും ചടങ്ങുകള് നടന്നു. കാലടിയിലെ മഹാസമ്മേളനത്തില് കേന്ദ്രമന്ത്രി കിഷന് റെഡ്ഡി പങ്കെടുത്തു. 2013 ലെ വെള്ളപ്പൊക്കത്തില് ആദി ഗുരു ശങ്കരാചാര്യരുടെ സമാധി ഒലിച്ചുപോയിരുന്നു. തുടര്ന്ന് കേദാര്നാഥ് ധാമിന്റെ പുനഃര്നിര്മ്മാണ പ്രവര്ത്തനങ്ങള്ക്ക് കീഴില് പ്രത്യേക രൂപരേഖയിലാണ് പുതിയ പ്രതിമ തയ്യാറാക്കിയത്. കേദാര്നാഥ് ക്ഷേത്രത്തിന് തൊട്ടുപിറകിലും സമാധി പ്രദേശത്തിന് നടുവിലും ഭൂമി കുഴിച്ചാണ് പ്രതിമയുടെ നിര്മ്മാണം. മൈസൂരിലെ അതിപ്രഗല്ഭനായ ശില്പി, യോഗിരാജാണ് നിര്മ്മാണം പ്രവര്ത്തനങ്ങള്ക്ക് നേതൃത്വം നല്കിയത്. മകന് അരുണും സഹായിയായി ഇദ്ദേഹത്തിനൊപ്പം ഉണ്ടായിരുന്നു. ക്ലോറൈറ്റ് ഷിസ്റ്റ് എന്ന പാറയില് നിന്ന് നിര്മ്മിച്ച പ്രതിമയ്ക്ക് തിളക്കം കൂട്ടാനായി തേങ്ങാവെള്ളമാണ് ഉപയോഗിച്ചിട്ടുള്ളത്.പ്രളയം ഉള്പ്പടെയുള്ള പ്രകൃതിദുരന്തങ്ങളെ അതിജീവിക്കാന് കഴിയുന്ന തരത്തിലാണ് ഇതിന്റെ നിര്മ്മിതി.
130 കോടി രൂപ ചെലവിട്ടാണ് കേദാര്നാഥിലെ പുനഃര്നിര്മ്മാണപ്രവര്ത്തികള് പൂര്ത്തിയാക്കിയിരിക്കുന്നത്. പ്രതിമയുടെ പുനഃര്നിര്മ്മാണത്തിന് പുറമെ പുരോഹിതരുടെ താമസസ്ഥലങ്ങള്, വിവിധ സ്നാനഘട്ടങ്ങള്, നദിയുടെ പാര്ശ്വഭിത്തികള്, പൊലീസ് സ്റ്റേഷന്, ആശുപത്രി, ഗസ്റ്റ് ഹൗസുകള് എന്നിവയും പുനഃര്നിര്മ്മിച്ചവയില് ഉള്പ്പെടും. മന്ദാകിനി നദിക്ക് കുറുകെയുണ്ടായിരുന്ന പാലവും പുനഃര്നിര്മ്മിച്ചിട്ടുണ്ട്. ഇതിന് പുറമെ 400 കോടി രൂപ ചെലവ് പ്രതീക്ഷിക്കുന്ന കേദാര്പുരി പുനഃര്നിര്മ്മാണ പ്രവര്ത്തിയുടെ ഉദ്ഘാടനവും പ്രധാനമന്ത്രി നിര്വഹിക്കും.
Photo Courtesy : Google/ images are subject to copyright
കോവിഡ് മഹാമാരിയുടെ രണ്ടാംവരവിൻറെ ഈ കാലത്ത് എല്ലാവരും മാസ്ക് ധരിച്ചും സാനിട്ടൈസ് ചെയ്തും സാമൂഹിക അകലം പാലിച്ചും വാക്സിനെടുത്തും കോവിഡ് പ്രതിരോധത്തിന് തയ്യാറാവണമെന്ന് യൂണിക്ടൈംസ് അഭ്യർത്ഥിക്കുന്നു. ഒത്തൊരുമയോടെ നിന്നാൽ നമുക്കീ മഹാമാരിയെ തോൽപ്പിക്കാനാവും.
# Break the chain #Indian Fighters Corona