ശബരിമലയില് തിരക്കേറുന്നു
ശബരിമല ദര്ശനത്തിനെത്തിയവരുടെ എണ്ണം 15 ലക്ഷം പിന്നിട്ടു. ഡിസംബര് ഒന്നാം ആഴ്ച വരെ ദിനംപ്രതി ശരാശരി എണ്പതിനായിരത്തോളം ഭക്തന്മാരാണ് ദര്ശനത്തിനെത്തിയിരുന്നത്. എന്നാല് രണ്ടാമത്തെ ആഴ്ചയായതോടെ ഭക്തരുടെ എണ്ണം ക്രമേണ വര്ധിച്ചു വരുകയാണ്. ഡിസംബര് 9 ന് (വെള്ളിയാഴ്ച) 1,07,695 പേരാണ് ദര്ശനത്തിനായി ഓണ്ലൈന് ബുക്ക് ചെയ്തിരുന്നത്.
പത്താം തീയതിയും ഒരു ലക്ഷത്തിനടുത്താണ് ബുക്കിംഗ്. വരും ദിവസങ്ങളിലും തിരക്ക് ഇതുപോലെ തുടരാനാണ് സാധ്യതയെന്ന് അധികൃതര് വിലയിരുത്തുന്നു.തിരക്ക് വര്ധിച്ച സാഹചര്യത്തില് പ്രത്യേക ജാഗ്രതയിലാണ് സന്നിധാനം.ഓരോ വകുപ്പുകളും തങ്ങളുടെ പ്രവര്ത്തനം കൂടുതല് കാര്യക്ഷമമാക്കി. തിരക്ക് കൂടുമ്പോള് പമ്പമുതല് സന്നിധാനം വരെ ഘട്ടം ഘട്ടമായി പ്രത്യേക ക്രമീകരണം ഏര്പ്പെടുത്തിയാണ് ദര്ശനം സജ്ജമാക്കുന്നത്.
Photo Courtesy : Google/ images are subject to copyright