വ്യക്തി-വ്യാപാര യുപിഐ ഇടപാടുകൾക്ക് മെർച്ചന്റ് ഡിസ്കൗണ്ട് റേറ്റ് ഈടാക്കുന്നത് വരാനിരിക്കുന്ന ഉത്സവ സീസൺ പ്രമാണിച്ച് ദീപാവലിക്ക് ശേഷത്തേക്ക് മാറ്റിവെച്ചു. ഒക്ടോബർ 13-ന് ചേർന്ന യുപിഐ ആൻഡ് സർവീസസ് സ്റ്റിയറിങ് കമ്മിറ്റി യോഗത്തിലാണ് ഈ തീരുമാനമുണ്ടായതെന്ന് നാഷണൽ പേയ്‌മെന്റ് കോർപ്പറേഷൻ ഓഫ് ഇന്ത്യ (NPCI) അറിയിച്ചു. പരിഷ്കരിച്ച തീയതി പിന്നീട് അറിയിക്കുമെന്നും അധികൃതർ വ്യക്തമാക്കി.

മുൻ തീരുമാനപ്രകാരം ഒക്ടോബർ 15 മുതൽ ₹2,000-ന് മുകളിലുള്ള തിരഞ്ഞെടുത്ത വ്യാപാരി ഇടപാടുകൾക്ക് 0.4% MDR നിരക്ക് ഈടാക്കാനായിരുന്നു പദ്ധതി. എന്നാൽ ഉത്സവ സീസണിലെ കച്ചവടത്തെയും വ്യാപാരികളുടെ പ്രതികരണങ്ങളെയും കണക്കിലെടുത്താണ് തീരുമാനം ദീപാവലിക്കു ശേഷത്തേക്ക് മാറ്റിയത്.

ഇത് വ്യാപാരികൾ നൽകേണ്ട തുകയാണ്, അല്ലാതെ സാധാരണ ഉപഭോക്താക്കൾ നൽകേണ്ടതില്ല. കൂടാതെ, വ്യക്തികൾ തമ്മിലുള്ള (P2P) സാധാരണ പണമിടപാടുകളും ചെറുകിട വ്യാപാരികളുടെ ഇടപാടുകളും തുടർന്നും തികച്ചും സൗജന്യമായിരിക്കും.

യുപിഐ സംവിധാനത്തിന്റെ ഡിജിറ്റൽ അടിസ്ഥാന സൗകര്യ വികസനം, സൈബർ സുരക്ഷ, തട്ടിപ്പുകൾ തടയൽ തുടങ്ങിയ പ്രവർത്തനങ്ങൾക്കുള്ള ഉയർന്ന സാമ്പത്തിക ചെലവ് കണ്ടെത്താനാണ് MDR നിരക്കുകൾ ഏർപ്പെടുത്തുന്നത്.

Photo Courtesy: Google/ images are subject to copyright