കോവിഡ് പ്രത്യാഘാതം ദശാബ്ദങ്ങള് നിലനില്ക്കുമെന്ന മുന്നറിയിപ്പുമായി ഡബ്ല്യുഎച്ച്ഒ
ജനീവ: കോവിഡിന്റെ പ്രത്യാഘാതങ്ങള് ദശാബ്ദങ്ങളോളം നിലനില്ക്കുമെന്ന് ലോകാരോഗ്യസംഘടന. വൈറസ് വ്യാപനമുണ്ടായി ആറു മാസത്തിനു ശേഷമുള്ള സ്ഥിതിഗതികള് വിലയിരുത്തിയ ശേഷമാണ് 18 അംഗങ്ങളും 12 ഉപദേശകരും അടങ്ങുന്ന ഡബ്ല്യൂഎച്ച്ഒ അടിയന്തരസമിതി ഈ മുന്നറിയിപ്പു നല്കിയത്. ചൈനയില് കഴിഞ്ഞ ഡിസംബറില് പൊട്ടിപ്പുറപ്പെട്ടതു മുതല് ലോകമമെമ്പാടും 17.3 ദശലക്ഷം ആളുകള്ക്കാണു കോവിഡ് ബാധിച്ചത്.
ഇത് നാലാം തവണയാണ് ഡബ്ല്യൂഎച്ച്ഒ അടിയന്തരസമിതി കോവിഡ് കാലത്ത് ചേരുന്നത്. ചൈനയ്ക്ക് പുറത്ത് നൂറു കേസുകളും ഒറ്റ മരണം പോലും ഇല്ലാതിരിക്കുകയും ചെയ്തപ്പോഴാണ് പൊതുആരോഗ്യഅടിയന്തരാവസ്ഥ പ്രഖ്യാപിച്ചതെന്ന് ഡബ്ല്യൂഎച്ച്ഒ മേധാവി ടെഡ്രോസ് അദാനം പറഞ്ഞു. നൂറ്റാണ്ടില് ഒരിക്കല് സംഭവിക്കുന്ന മഹാമാരിയാണിത്. ദശാബ്ദങ്ങള് ഇതിന്റെ പ്രത്യാഘാതങ്ങള് നീണ്ടുനില്ക്കുമെന്നും അദ്ദേഹം പറഞ്ഞു. ഏറെ സമയം വൈകിയാണ് ഡബ്ല്യൂഎച്ച്ഒ ആരോഗ്യഅടിയന്തരാവസ്ഥ പ്രഖ്യാപിതെന്ന് വിവിധ കോണുകളില്നിന്ന് ആരോപണം ഉയര്ന്നിരുന്നു.
പുതിയ സാഹചര്യത്തില് കോവിഡ് മാനദണ്ഡങ്ങളില് മാറ്റം വരുത്തുന്നതിനെക്കുറിച്ചും സമിതി ആലോചിക്കുന്നുണ്ട്. എത്രയും പെട്ടെന്നു വാക്സിന് വികസിപ്പിക്കുന്നതു മാത്രമാണു കോവിഡ് നിയന്ത്രിക്കാനുള്ള ദീര്ഘകാല പരിഹാരമെന്നും ടെഡ്രോസ് പറഞ്ഞു. വാക്സിന് പരീക്ഷണങ്ങള് പുരോഗമിക്കുന്നുണ്ടെങ്കിലും കോവിഡിനൊപ്പം ജീവിക്കാന് പഠിക്കണമെന്നും ലഭ്യമായ മാര്ഗങ്ങള് ഉപയോഗിച്ച് വൈറസിനെ ചെറുക്കാന് സജ്ജരാകണമെന്നും അദ്ദേഹം അഭിപ്രായപ്പെട്ടു.
Photo Courtesy : Google/ images are subject to copyright