സിനിമാ തിയറ്ററുകളുടെ വിനോദ നികുതി ഒഴിവാക്കാൻ സംസ്ഥാന സർക്കാർ തീരുമാനിച്ചു.
2021 ജനുവരി മുതൽ മാർച്ച് വരെയുള്ള സിനിമാ തിയറ്ററുകളുടെ വിനോദ നികുതി ഒഴിവാക്കാൻ സംസ്ഥാന സർക്കാർ തീരുമാനിച്ചു. മുഖ്യമന്ത്രി പിണറായി വിജയൻ്റെ അധ്യക്ഷതയിൽ ചേർന്ന യോഗത്തിലാണ് തീരുമാനം. കൂടാതെ തിയറ്ററുകള് അടഞ്ഞ് കിടന്ന 10 മാസത്തെ വൈദ്യുതി ഫിക്സഡ് ചാര്ജ് 50 ശതമാനമാക്കി കുറയ്ക്കും.
2020 മാര്ച്ച് 31നുള്ളില് അടക്കേണ്ട വസ്തു നികുതി ഗഡുക്കളായി അടക്കാൻ അനുവദിക്കും. തിയേറ്ററുമായി ബന്ധപ്പെട്ട ലൈസന്സുകളുടെ കാലാവധി മാര്ച്ച് 31 വരെ ദീര്ഘിപ്പിച്ചു. തദ്ദേശ സ്വയംഭരണം, ഇലക്ട്രിക്കല് ഇന്സ്പെക്ടറേറ്റ്, ഫിലിംസ് ഡിവിഷന്, ബില്ഡിംഗ് ഫിറ്റ്നസ്, ആരോഗ്യം, ഫയര്ഫോഴ്സ് എന്നിവയുമായി ബന്ധപ്പെട്ട വിവിധ ലൈസന്സുകളുടെ കാലാവധിയാണ് നീട്ടിയത്.
തിയറ്ററുകള് തുറക്കാന് അനുമതി ലഭിച്ചിരുന്നെങ്കിലും ഇളവുകള് ലഭിക്കാതെ തുറക്കാന് കഴിയില്ലെന്ന നിലപാടിലായിരുന്നു തിയറ്റര് ഉടമകള്ക്ക്. വിവിധ ആവശ്യങ്ങളുന്നയിച്ച് കേരള ഫിലിം ചേംബര് ഓഫ് കൊമേഴ്സ് ഭാരവാഹികള് മുഖ്യമന്ത്രിയുമായി കൂടിക്കാഴ്ച നടത്തിയിരുന്നു. തുടര്ന്ന് മുഖ്യമന്ത്രിയുടെ അധ്യക്ഷതയില് വൈദ്യുതി വകുപ്പ് മന്ത്രി എം.എം. മണി, തദ്ദേശ സ്വയംഭരണ വകുപ്പ് മന്ത്രി എ.സി. മൊയ്തീന്, കെ.എസ്.ഇ.ബി ചെയര്മാന് എന്.എസ് പിള്ള തുടങ്ങിയവര് പങ്കെടുത്ത യോഗത്തിലാണ് ഇളവുകള് പ്രഖ്യാപിച്ചത്.
എന്ന് തിയറ്ററുകള് തുറക്കുമെന്ന് ഇന്ന് ചേരുന്ന തിയറ്റര് ഉടമകളുടെ യോഗത്തില് തീരുമാനിക്കും. മറ്റന്നാളോടെ തന്നെ തുറക്കാനാണ് സാധ്യത.
Photo Courtesy : Google/ images are subject to copyright