ബോളിവുഡിലെ നീലചിത്ര നിര്‍മ്മാണവുമായി ബന്ധപ്പെട്ട് സംവിധായകന്‍ അഭിജീത് ബോംബലെ അറസ്‌റ്റിൽ .
ബോളിവുഡിലെ നീലചിത്ര നിര്‍മ്മാണവുമായി ബന്ധപ്പെട്ട് 41കാരനായ സംവിധായകന്‍ അറസ്റ്റില്‍. സംവിധായകന്‍ അഭിജീത് ബോംബലെയെയാണ് മുംബൈ ക്രൈം ബ്രാഞ്ച് പൊലീസ് അറസ്റ്റ് ചെയ്തത്. നീലചിത്ര നിര്‍മ്മാണവിതരണ കേസുമായി ബന്ധപ്പെട്ട് നേരത്തേ അറസ്റ്റിലായ വ്യവസായിയും ബോളിവുഡ് താരം ശില്‍പ്പ ഷെട്ടിയുടെ ഭര്‍ത്താവുമായ രാജ് കുന്ദ്രയുമായുള്ള അഭിജീതിന്‍റെ ബന്ധം അന്വേഷിക്കുകയാണ് പൊലീസ്. മാല്‍വാനി പൊലീസ് സ്റ്റേഷനില്‍ ലഭിച്ച യുവതിയുടെ പരാതിയില്‍ പ്രത്യേക എഫ്.ഐ.ആര്‍ രജിസ്റ്റര്‍ ചെയ്താണ് അഭിജീതിനെതിരായ അന്വേഷണം. മുംബൈയില്‍വെച്ച്‌ ഇയാള്‍ നീലചിത്രങ്ങള്‍ നിര്‍മ്മിച്ചതായി പൊലീസ് കണ്ടെത്തി. മാല്‍വാനി പൊലീസില്‍നിന്ന് കേസ് പിന്നീട് ക്രൈം ബ്രാഞ്ചിന് കൈമാറുകയായിരുന്നു. കോടതിയില്‍ ഹാജരാക്കിയ അഭിജീതിനെ പൊലീസ് കസ്റ്റഡിയില്‍ വിട്ടു. നാലുപേര്‍ക്കെതിരെയാണ് പോലീസ് എഫ്.ഐ.ആര്‍ രജിസ്റ്റര്‍ ചെയ്തത്. രാജ്കുന്ദ്രയുടെ ആപ്പുമായി ബന്ധപ്പെട്ട് പ്രവര്‍ത്തിച്ച ഗെഹ്ന വസിഷ്ഠ് ഉള്‍പ്പെടെ മൂന്നുപേരാണ് മറ്റു പ്രതികള്‍. രാജ് കുന്ദ്രയുടെ ആപ്പുമായി ബന്ധപ്പെട്ട് പ്രവര്‍ത്തിച്ച രണ്ടു നിര്‍മ്മാതാക്കളാണ് ഇതില്‍ രണ്ടുപേര്‍. ഇതാണ് രാജ് കുന്ദ്രയുമായുള്ള ബന്ധം അന്വേഷിക്കാന്‍ കാരണം.
അഭിജീതിന്‍റെ നേതൃത്വത്തിലുള്ള സംഘം ഭീഷണിപ്പെടുത്തുകയും നീലചിത്രത്തില്‍ അഭിനയിക്കാന്‍ നിര്‍ബന്ധിച്ചുവെന്നുമാണ് യുവതിയുടെ പരാതി. രാജ് കുന്ദ്രയുടെ കമ്പനിയില്‍ ജോലി ചെയ്യണമെന്നാവശ്യപ്പെട്ടാണ് ഇയാള്‍ യുവതിയെ സമീപിച്ചത്. ഇത് ബോളിവുഡില്‍ വലിയ മുന്നേറ്റമുണ്ടാക്കുമെന്നും യുവതിയെ വിശ്വസിപ്പിച്ചു. ഇതിന് ശേഷമാണ് നീലചിത്രത്തില്‍ അഭിനയിക്കാന്‍ യുവതിയെ നിര്‍ബന്ധിച്ചത്. യുവതി ആവശ്യം നിരസിച്ചതോടെ കരിയര്‍ ഇല്ലാതാക്കുമെന്ന് സംഘം ഭീഷണിപ്പെടുത്തി. തുടര്‍ന്ന് മുഖം മറച്ച്‌ പ്രദര്‍ശിപ്പിക്കുമെന്ന ഉറപ്പോടെ യുവതി ചിത്രത്തില്‍ അഭിനയിച്ചു. എന്നാല്‍ മുഖം മറയ്ക്കാന്‍ ഇവര്‍ കൂട്ടാക്കിയില്ല. കൂടാതെ ഒരു ലക്ഷം രൂപ വാഗ്ദാനം ചെയ്തെങ്കിലും 35,000 രൂപ മാത്രമാണ് നല്‍കിയതെന്നും യുവതി പരാതിയില്‍ പറയുന്നു.
Photo Courtesy : Google/ images are subject to copyright
