അസ്തമയസൂര്യന്റെ കിരണങ്ങൾ പൊൻവർണ്ണചാരുതയേകിയ പെരിയാറിന്റെ തീരത്തുള്ള അപ്പാർട്ട്മെന്റിന്റെ ഒൻപതാം നിലയിലെ സ്വീകരണമുറിയിൽ വച്ച് എവിഎ ഗ്രൂപ്പ് ഓഫ് കമ്പനീസിന്റെ ചെയർമാനും മാനേജിംഗ് ഡയറക്ടറുമായ എ വി അനൂപിനെ കണ്ടുമുട്ടുമ്പോൾ ആത്മവിശ്വാസത്തിന്റെ നേർക്കാഴ്ചയതന്നെയായിരുന്നുവത്. ആയൂർവേദത്തെ ലോകജനതയ്ക്ക് മുന്നിൽ എത്തിക്കാൻ അക്ഷീണം പ്രവർത്തിച്ച് വിജയപഥത്തിലെത്തിച്ച വ്യക്തി എന്നതിലുപരി തൊട്ടതെല്ലാം പൊന്നാക്കുന്ന സമ്പൂർണ്ണ സംരംഭകൻ. മെഡിമിക്‌സിൽ തുടങ്ങി ഇന്ന് നൂറ്റാണ്ടുകൾ പഴക്കമുള്ള നീലഗിരി ബ്രാൻഡ് സ്വന്തമാക്കുമ്പോളത് ജനങ്ങൾക്കിടയിൽ സംസാരവിഷയമായി.
*വിപുലീകരണത്തിലൂടെ*
നീലഗിരി സൂപ്പർമാർക്കറ്റ് ശൃംഖലയുടെ 67 കോടിയുടെ ഈ ഏറ്റെടുക്കൽ അദ്ദേഹത്തിന്റെ നേട്ടങ്ങളുടെ കിരീടത്തിലെ പൊൻതൂവലാണെന്നുള്ളത് സംശയലേശമന്യേ പറയാം. ഈ ഏറ്റെടുക്കലിലേക്കെത്തപ്പെട്ടതിനെക്കുറിച്ചുള്ള ചോദ്യത്തിന് അദ്ദേഹത്തിന്റെ മറുപടിയിതായിരുന്നു. “ചില്ലറ വ്യാപാരമാണ് ഞങ്ങളുടെ ബിസിനസിന്റെ ആണിക്കല്ല്, അതിനാൽ അതിന്റെ വിപുലീകരണമാണ് ഈ ഏറ്റെടുക്കലിന് എന്നെ പ്രേരിപ്പിച്ച പ്രധാന ഘടകം.” “വ്യക്തിഗത പരിചരണോൽപ്പന്നങ്ങൾ ഞങ്ങളുടെ പ്രത്യേകതയാണ്, അവയിൽ ബാഹ്യമായ ഉപയോഗത്തിന് വേണ്ടിയുള്ള ഉൽപ്പന്നങ്ങൾ മാത്രമല്ല ആന്തരികോപയോഗത്തിനുള്ളവയും ഉൾപ്പെടുന്നു. നീലഗിരി ബ്രാൻഡ് ഉൽപ്പന്നങ്ങളിൽ ജനപ്രിയമായ പാലുൽപ്പന്നങ്ങളും ബേക്കറിയും ഉൾപ്പെടെ അവരുടെ സ്വന്തം എക്സ്ക്ലൂസീവ് ഉൽപ്പന്നങ്ങളുണ്ട്.
നാല് പതിറ്റാണ്ടിന്റെ അനുഭവസമ്പത്തും, അദ്ദേഹത്തിന്റെ അമ്മാവനും ഗുരുവുമായ ഡോക്ടർ സിദ്ധൻ പകർന്നുനൽകിയ വിലപ്പെട്ട പാഠങ്ങളും ഉൾക്കൊണ്ട് ദീർഘവീക്ഷണമുള്ള അനൂപ്, തങ്ങളുടെ മേളം പലവ്യഞ്ജനങ്ങളുടെ ഫാക്ടറികൾ നീലഗിരി ബ്രാൻഡിന്റെ നേട്ടത്തിനായി ഉപയോഗിക്കാമെന്ന തികഞ്ഞ ശുഭാപ്തി വിശ്വാസത്തിലാണ്. ഇവ ഇ-കൊമേഴ്സ് പ്ലാറ്റ്ഫോമിലേക്ക് കൊണ്ടുവന്ന് ഇവയ്ക്ക് കൂടുതൽ വ്യാപ്തി നൽകുന്നതിനും സ്വപരിശ്രമത്തിലൂടെ അതിന്റെ ബ്രാൻഡ് മൂല്യം 300 കോടി രൂപയാക്കാൻ കഴിയുമെന്ന് ഉറപ്പുണ്ടെന്നും അദ്ദേഹം വ്യക്തമാക്കുന്നു. ലോകത്തിലെ ഏറ്റവും കൂടുതൽ വിൽപ്പനയുള്ള ആയുർവേദ ബാത്ത് സോപ്പ് മെഡിമിക്സിന്റെ നിർമ്മാതാക്കൾ എന്നുള്ള നിലയിൽ ആയുർവേദവുമായി ഒരു അഭേദ്യബന്ധമുള്ളതിനാൽ ആഗോള തലത്തിൽ ആയുർവേദത്തെ പ്രോത്സാഹിപ്പിക്കുന്നതിൽ മുഴുകിയിരിക്കുന്നത് സ്വാഭാവികമാണ്. എ വി എ ഗ്രൂപ്പിന്റെ അടുത്ത പ്രോജക്ടുകളെക്കുറിച്ചാരാഞ്ഞപ്പോൾ അദ്ദേഹം തന്റെ സ്വപ്നങ്ങളിലൊന്ന് വെളിപ്പെടുത്തുന്നു. ആതിഥ്യമര്യാദയും, രോഗശാന്തിയും, ക്ഷേമവുമെല്ലാം ഒരു കുടക്കീഴിൽ സമന്വയിപ്പിക്കുന്ന ഒരു ‘ആയുർവേദ ഗ്രാമം’. ആധുനികലോകത്തെ അലട്ടുന്ന രോഗങ്ങളുടെ പെരുപ്പം നേരിടാൻ ഈ പ്രാചീനമായ ആയുർവേദത്തിന്റെ അനന്തസാധ്യതകൾ വെളിവാക്കുന്നതിനായി വിദേശസർവ്വകലാശാലകളുമായി ബന്ധപ്പെടുത്തി ഒരു ആയുർവേദഗവേഷണകേന്ദ്രം കൊണ്ടുവരാനും അദ്ദേഹം ആഗ്രഹിക്കുന്നു.

*ബ്രാൻഡ് മൂല്യം ഉയരങ്ങളിലെത്തുമ്പോൾ*
തന്റെ 40 വർഷത്തെ സംരംഭകയാത്രയിൽ തടസ്സങ്ങളും ബുദ്ധിമുട്ടുകളും തരണം ചെയ്ത പരിചയസമ്പന്നനായ വ്യവസായിക്ക് തന്റെ ബിസിനസ്സ് സാമ്രാജ്യത്തിന്റെ വളർച്ച എങ്ങനെ ചാർട്ട് ചെയ്യാമെന്ന് വ്യക്തമായും അറിയാം. കണ്ണിമചിമ്മുന്ന നേരം കൊണ്ട് മറ്റൊരു അംബാനിയാകണമെന്ന് ഞാൻ സ്വപ്നം കാണുന്നില്ല,” അദ്ദേഹം ഉറച്ച ശബ്ദത്തിൽ പറയുന്നു. “എന്റെ പ്രധാന മേഖലയിൽ നിന്ന് വ്യതിചലിക്കാതിരിക്കാനാണ് ഞാൻ ഇഷ്ടപ്പെടുന്നത്. ബിസിനസ്സ് വിറ്റുവരവ് എന്നതിലുപരി, ബ്രാൻഡ് മൂല്യം കെട്ടിപ്പടുക്കുന്നതിലും ഗുണമേന്മയുള്ള ഉൽപ്പന്നങ്ങൾ നൽകുന്നതുവഴി ഉപഭോക്തൃ അടിത്തറ നിലനിർത്തുന്നതിലും ഞാൻ ഉത്കണ്ഠാകുലനാണ്. കൊച്ചിയിൽ സ്ഥിതി ചെയ്യുന്ന ആയുർവേദവും പ്രകൃതിചികിത്സയും യോഗയും സമന്വയിപ്പിക്കുന്ന സഞ്ജീവനം എന്ന ഹോളിസ്റ്റിക് ചികിത്സാ കേന്ദ്രത്തിന്റെ വിശേഷങ്ങൾ ഉദാഹരണമായി അദ്ദേഹം ഉദ്ധരിക്കുന്നു. “100 വർഷത്തിനുശേഷവും, സഞ്ജീവനം അതിന്റെ ഗുണനിലവാരം നിലനിർത്തുകയും കാലത്തിന്റെ പരീക്ഷണമായി നിലകൊള്ളുകയും ചെയ്യുമെന്ന് എനിക്ക് ഉറപ്പുണ്ട്. അത് ഒരു മാതൃകയായി നിലനിൽക്കും. ഇത് ആയുർവേദത്തെ ഒരു പ്രൊഫഷണൽ തലത്തിലേക്ക് ഉയർത്തുകയും അത് സ്വദേശികൾക്കൊപ്പം വിദേശത്തുള്ളവർക്കും ആകർഷകവും രുചികരവുമാക്കുന്നു, ”അദ്ദേഹം നിറപുഞ്ചിരിയോടെ വ്യക്തമാക്കുന്നു. അനൂപിന്റെ അഭിപ്രായത്തിൽ, വിപുലീകരണം മന്ദഗതിയിലുള്ളതും എന്നാൽ സുസ്ഥിരവുമായ ഒരു പ്രക്രിയയാണ്. “ഞങ്ങൾ ഞങ്ങളുടെ പരിമിതികളിലും വിഭവങ്ങളിലും തുടരുന്നു. ഞങ്ങളുടെ പരിധികൾ കവിയുന്ന ഗംഭീരമായ പദ്ധതികളിലേക്ക് ഞങ്ങൾ പോകുന്നില്ല. അതുകൊണ്ടാണ് ഈ കഴിഞ്ഞ വർഷങ്ങളിലെല്ലാം ഞങ്ങളുടെ ബ്രാൻഡുകൾ അവയുടെ മൂല്യം നിലനിർത്തിയത്, അദ്ദേഹം പറയുന്നു.
*ഒരു സംരംഭകന്റെ ഉത്ഭവം*
ഒരു സംരംഭകനെന്ന നിലയിൽ അനൂപിന്റെ വിജയഗാഥ അനായാസമായിരുന്നില്ല. അത് പുതുതലമുറ ബിസിനസുകാരെയും അഭിലാഷകരെയും ആശ്ചര്യപ്പെടുത്തും. അനൂപിന്റെ വിധിയെ മാറ്റിമറിച്ചത് അനിഷ്ട സംഭവങ്ങളുടെ പരമ്പരയാണെന്ന് പറഞ്ഞാൽ തെറ്റില്ല. എല്ലായ്പോഴും ഒരു സർക്കാർ ജോലിയാണ് ലക്ഷ്യമിടേണ്ടതെന്നും ഒരിക്കലും ബിസിനസ്സിലേക്ക് കടക്കരുതെന്നുമുള്ള കർശ്ശനമായ ഉപദേശത്തോടെയാണ് അനൂപിനെ അച്ഛൻ വളർത്തിയത്. പ്രീഡിഗ്രിയ്ക്ക് പഠിക്കുന്ന സമയത്ത് ഫിഷറീസ് ഡയറക്ടറായി സേവനമനുഷ്ഠിച്ചിരുന്ന അച്ഛൻ എ.ജി.വാസവന്റെ ആകസ്മികമരണവും അതേത്തുടർന്ന് ആശ്രിതനിയമനത്തിനും, പിതാവിന്റെ ഇൻഷുറൻസ് തുക ലഭിക്കുന്നതിനും നേരിടേണ്ടിവന്ന ശ്രമങ്ങളും ചുവപ്പുനാടയിൽ കുടുങ്ങിയ കയ്പേറിയ അനുഭവങ്ങൾ ഒരു സർക്കാർ ജോലി ലഭിക്കാനുള്ള അദ്ദേഹത്തിന്റെ ചിരകാലാഭിലാഷത്തിന് വിലങ്ങുതടിയായി. ജീവിതത്തിന്റെ രണ്ടറ്റവും കൂട്ടിമുട്ടിക്കാനുള്ള ഓട്ടപ്പാച്ചിലിൽ അദ്ദേഹം ഒരു വാൻ ഡ്രൈവറായി. ഞാൻ ജോലിക്ക് പോകുമ്പോൾ, പലപ്പോഴും സർക്കാരിൽ നിന്നുള്ള ഉദ്യോഗസ്ഥരുടേയോ അല്ലെങ്കിൽ എന്റെ വാഹനം ബുക്ക് ചെയ്യാൻ ആഗ്രഹിക്കുന്ന ഉപഭോക്താക്കളുടെയോ ഫോൺ കോളുകൾക്ക് മറുപടി നൽകാൻ വീട്ടിൽ ആരുമുണ്ടായിരുന്നില്ല. അദ്ദേഹം പറയുന്നു. ആ സമയത്താണ് കമ്മീഷൻ വ്യവസ്ഥയിൽ വാഹനം ഓടിക്കാൻ സമ്മതിച്ച വിശ്വസ്തനായ ഒരാളെ പരിചയപ്പെട്ടത്. “ഞാൻ അയാളെ ജോലിക്കെടുത്തപ്പോൾ, അധികാരവും ഉത്തരവാദിത്തങ്ങളും ഏൽപ്പിക്കുക എന്നതിന്റെ അർത്ഥമെന്താണെന്ന് ഞാൻ മനസ്സിലാക്കി, അത് എൻറെ ജീവിതത്തിലെ ഒരു വഴിത്തിരിവായി. ക്രമേണ, യാത്രകൾക്കുള്ള ബുക്കിംഗ് ആവശ്യപ്പെട്ട് അയാൾക്ക് ഒരു ദിവസം 10 ഫോൺ കോളുകൾ വരെ ലഭിക്കാൻ തുടങ്ങി. എനിക്ക് ട്രാവൽ ഏജന്റുമാർക്ക് ലഭിച്ച ഓർഡറുകൾക്ക് അവരിൽ നിന്ന് കമ്മീഷൻ വാങ്ങാൻ തുടങ്ങി. ഡ്യൂട്ടി ഡെലിഗേഷൻ ആയിരുന്നു വിജയമന്ത്രം.” അക്കാലത്ത്, അദ്ദേഹത്തിന്റെ അമ്മാവൻ ചെന്നൈയിൽ നിന്ന് വരികയും അനൂപിൻറെ പ്രവർത്തനങ്ങൾ കണ്ടുമനസ്സിലാക്കുകയും ചെയ്തു. തൊഴിലാളി പ്രശ്നങ്ങൾ കാരണം അദ്ദേഹത്തിന്റെ മെഡിമിക്സ് സോപ്പ് ഫാക്ടറി അടച്ചുപൂട്ടേണ്ടിവന്നത് ബുദ്ധിമുട്ടുള്ള ഘട്ടമായിരുന്നു. ചെന്നൈയിലേക്ക് മടങ്ങിയെത്തിയ ശേഷം, യുവാവായ അനൂപിന് തന്റെ സംരംഭകത്വ സാധ്യതയെക്കുറിച്ച് ബോധ്യപ്പെടുത്തി ഫാക്ടറി ഏറ്റെടുക്കാൻ ക്ഷണിച്ചുകൊണ്ട് അദ്ദേഹം ഒരു നീണ്ട കത്ത് അയച്ചു. 1983-ൽ, അമ്മയെയും ബന്ധുക്കളെയും വിഷമിപ്പിച്ചുകൊണ്ട് അദ്ദേഹം ചെന്നൈയിലേക്ക് ട്രെയിനിൽ കയറി. അത് തന്റെ ജീവിതത്തിലെ ഒരു യുഗനിർമ്മാണതീരുമാനമാകുമെന്ന് അനൂപ് മനസ്സിലാക്കിയിരുന്നില്ല.

*എക്കാലത്തും പ്രചോദിപ്പിക്കുന്ന ദുബായും ഖത്തറും*
ഒരു ബിസിനസുകാരനെന്ന നിലയിൽ എപ്പോഴും പ്രചോദനം നൽകുന്നതെന്തെന്ന ചോദ്യത്തിന്, മിഡിൽ ഈസ്റ്റിലെ ദുബായും ഖത്തറും മാതൃകാപരമായ ബിസിനസ്സ് മോഡലിന്റെ മികച്ച ഉദാഹരണങ്ങളാണെന്ന് അനൂപ് ആവേശത്തോടെ പറയുന്നു. തൊണ്ണൂറുകളുടെ തുടക്കത്തിൽ താൻ ആദ്യമായി എമിറേറ്റ് സന്ദർശിച്ചപ്പോൾ ദുബായ് എങ്ങനെ വരണ്ടതും മണൽ നിറഞ്ഞതുമായ പ്രദേശമായിരുന്നുവെന്ന് അദ്ദേഹം ആവേശത്തോടെ വിവരിക്കുന്നു. “ഇന്ന് ലോകത്തിന്റെ നെറുകയിലാണ് ഈ രണ്ട് രാജ്യങ്ങളും. അക്കാലത്ത്, ലോകത്തിലെ ഏറ്റവും വലിയ മാളും ഏറ്റവും മികച്ച തുറമുഖവും വിമാനത്താവളവും ഈ വരണ്ട പ്രദേശത്ത് എങ്ങനെ വരാൻ പോകുന്നു എന്ന് ഞങ്ങൾ അത്ഭുതപ്പെടുമായിരുന്നു. എന്നാൽ ചുരുങ്ങിയ സമയത്തിനുള്ളിൽ അവർ അത് നേടിയെടുത്തു, അതിനെയാണ് ഞാൻ ഒരു ബിസിനസ്സ് കാഴ്ചപ്പാട് എന്ന് വിളിക്കുന്നത്, ”ഫിഫ ലോകകപ്പിന് മുൻപ് വളരെ ചുരുങ്ങിയ സമയത്തിനുള്ളിൽ ഖത്തറും അചിന്തനീയമായത് ചെയ്തുവെന്ന് അദ്ദേഹം കൂട്ടിച്ചേർത്തു.
*നാടകത്തോടുള്ള പ്രണയം*
അനൂപിനെ സംരംഭകർക്കിടയിൽ അദ്വിതീയനാക്കുന്നത് അദ്ദേഹത്തിൻറെ അഭിനയമികവും നാടകത്തോടുള്ള സ്നേഹവുമാണ്. തിരുവനന്തപുരത്തെ കോളേജ് കാലഘട്ടം മുതൽ അദ്ദേഹം ശ്രദ്ധാപൂർവം വളർത്തിയെടുത്ത ഒരു വികാരമാണിത്. വാസ്തവത്തിൽ, സമാനചിന്താഗതിക്കാരായ സുഹൃത്തുക്കളോടൊപ്പം അവരുടെ താമസസ്ഥലത്ത് അവതരിപ്പിച്ച ഒരു നാടകം കണ്ട് യുവാവായിരുന്ന അനൂപിന്റെ അഭിനയമികവിന് അംഗീകാരം നൽകിയത് ആകാശവാണി തിരുവനന്തപുരം മുൻ ഡയറക്ടർ ആയിരുന്ന കോനിയൂർ നരേന്ദ്രൻ ആയിരുന്നു. “അദ്ദേഹം സ്റ്റേജിൽ വന്ന് എനിക്ക് ഒരു മെഡൽ സമ്മാനിച്ചു, ‘നീ അഭിനയം തുടരണമെന്നും തനിക്ക് അഭിനയ സാധ്യതയുണ്ടെന്നും എന്നോട് ആദ്യമായി പറഞ്ഞത് അദ്ദേഹമാണ്,” അനൂപ് ഓർമ്മിക്കുന്നു. ചെന്നൈയിലേക്ക് താമസം മാറിയതിനുശേഷവും അനൂപ് തന്റെ അഭിനയ കഴിവുകൾ വികസിപ്പിക്കാൻ സമയം കണ്ടെത്തി, ധാരാളം മലയാളിക്ലബ്ബുകൾ അദ്ദേഹത്തിന് അതിനുള്ള അവസരങ്ങൾ നൽകി. എല്ലാ വർഷവും ഒരു നാടകം ചെയ്യുകയെന്ന അതുല്യമായ പ്രത്യേകത അദ്ദേഹത്തിനുണ്ട്. പാൻഡെമിക് ലോക്ക്ഡൗണിന്റെ പ്രയാസകരമായ ദിവസങ്ങളിൽ നിരവധി നാടക ശിൽപശാലകൾ നടത്തുന്നതിനും നാടക കലാകാരന്മാരെ പിന്തുണയ്ക്കുന്നതിനും അദ്ദേഹം പ്രധാന പങ്കുവഹിച്ചു.
*സിനിമ നിർമ്മാണവും അഭിനയവും*
അഭിനയത്തോടുള്ള അനൂപിന്റെ അഭിനിവേശം നാടകങ്ങളിൽ മാത്രം ഒതുങ്ങുന്നതല്ല. AVA പ്രൊഡക്ഷൻസ് എന്ന സിനിമനിർമ്മാണകമ്പനിയുടെ സാരഥി എന്നുള്ള നിലയിൽ ഈ ബഹുമുഖനടൻ മോളിവുഡിലും ശ്രദ്ധേയനായ വ്യക്തിയാണ്, 25 ഫീച്ചർ ഫിലിമുകളും ഡോക്യുമെന്ററികളും ഈ കമ്പനിയുടെ പുറത്തിറങ്ങിയിട്ടുണ്ട്. 2007 ൽ ആദ്യ സിനിമ പ്രണയകാലം പരീക്ഷിച്ചതിനുശേഷം പിന്നീട് തിരിഞ്ഞുനോക്കേണ്ടി വന്നിട്ടില്ല. “എന്റെ ക്രെഡിറ്റിൽ 25 ഫീച്ചർ ഫിലിമുകളും നിരവധി ഡോക്യുമെന്ററികളും ഹ്രസ്വചിത്രങ്ങളും ഉണ്ടെന്നതിൽ ഞാൻ സന്തുഷ്ടനാണ്. ഫീച്ചർ ഫിലിം, ഡോക്യുമെന്ററി, ഷോർട്ട് ഫിലിം എന്നീ വിഭാഗങ്ങളിൽ പനോരമ സെലക്ഷൻ ലഭിച്ച ചുരുക്കം ചില നിർമ്മാതാക്കളിൽ ഒരാളാണ് ഞാൻ, അത് അദ്വിതീയവുമാണ്,” അവാർഡ് ജേതാവായ നിർമ്മാതാവും നടനുമായ അനുപ് ആാദത്തോടെ വെളിപ്പെടുത്തുന്നു. 2019-ൽ, റഷ്യയിലെവോട്ട്കിൻസ്ക് ആൻഡ് നാഡിം ഇന്റർനാഷണൽ ഫിലിം ഫെസ്റ്റിവലിലും യുണൈറ്റഡ് സ്റ്റേറ്റ്സിലെ സാൻ ഡീഗോ ഇന്റർനാഷണൽ കിഡ്സ് ഫിലിം ഫെസ്റ്റിവലിലും അദ്ദേഹത്തിന്റെ ‘അപ്പു ഇൻ സെർച്ച് ഓഫ് ട്രൂത്ത്’ ഇരട്ട അംഗീകാരങ്ങൾ നേടി. 2008-ൽ നോൺ-ഫീച്ചർ വിഭാഗത്തിൽ മികച്ച കുടുംബമൂല്യങ്ങളെക്കുറിച്ചുള്ള മികച്ച ചിത്രത്തിനുള്ള ദേശീയ അവാർഡ് നേടിയ ‘അപ്പുവിൻ നായകൻ—സ്പോട്ടി’യുടെ നിർമ്മാതാവ് കൂടിയാണ് അനൂപ്. അടുത്ത വർഷം അദ്ദേഹത്തിന്റെ ചിത്രം ‘പാലേരി മാണിക്യം ഒരു പാതിരാ കൊലപാതകം’ കേരള സംസ്ഥാന ചലച്ചിത്ര പുരസ്കാരത്തിനർഹമായി. സിനിമകളിൽ അദ്ദേഹം ചെയ്തിട്ടുള്ളതിൽ ഏറ്റവും അവിസ്മരണീയമായ വേഷങ്ങളെക്കുറിച്ചുള്ള ചോദ്യത്തിന് മറുപടിയായി അനൂപ് താൻ അവതരിപ്പിച്ച രണ്ട് ശ്രദ്ധേയമായ വേഷങ്ങളിലേക്ക് വിരൽ ചൂണ്ടുന്നു. അതിലൊന്നാണ് ‘അപ്പുവിന്റെ സത്യാന്വേഷണ’ത്തിലെ ഗാന്ധിയൻ കഥാപാത്രം. “അത് അസാധ്യമായ ഒരു വേഷമായിരുന്നു. സ്വന്തം മകന്റെ ദുഷ്പ്രവൃത്തികൾ ഉൾപ്പെടെ സമൂഹത്തിൽ സംഭവിക്കുന്ന എല്ലാ മോശം കാര്യങ്ങളിൽ നിന്നും പ്രതിരോധശേഷിയുള്ള ഒരു ഗാന്ധിയൻ,” മറ്റൊന്ന് ‘അച്ചനൊരു വാഴ വെച്ചു’ എന്ന ചിത്രത്തിലെ എന്റെ കഥാപാത്രമായിരുന്നു. അത് ഗാന്ധിയൻ വേഷത്തിൽ നിന്ന് തികച്ചും വ്യത്യസ്തമാണ്. ഈ രണ്ട് വേഷങ്ങളും എന്നും ഓർമ്മയിൽ മായാതെ നിൽക്കും.
*സ്വപ്ന പദ്ധതികൾ*
വ്യത്യസ്തമായ എന്തെങ്കിലും ചെയ്യാനുള്ള അടങ്ങാത്ത ദാഹമാണ് അനൂപിനെ മറ്റുള്ളവരിൽ നിന്ന് വ്യത്യസ്തനാക്കുന്നത്. ആയുർവേദത്തെയും അതിന്റെ ക്ലിനിക്കൽ ഗവേഷണത്തെയും അടിസ്ഥാനമാക്കി ഒരു ഡോക്യുമെന്ററി നിർമ്മിക്കണമെന്ന് അദ്ദേഹം ഇപ്പോൾ സ്വപ്നം കാണുന്നു. പ്രാചീനമായ ഈ ചികിത്സാരീതിയുടെ മഹത്വം ലോകത്തിനുമുമ്പിൽ പ്രദർശിപ്പിക്കുക എന്ന ലക്ഷ്യത്തോടെയാണിത്. “വിവിധ രോഗങ്ങളെക്കുറിച്ചും ആയുർവേദചികിത്സകളുടെ ഫലപ്രാപ്തിയെക്കുറിച്ചും വൈദ്യശാസ്ത്രപരമായി തെളിയിക്കപ്പെട്ട ഗവേഷണങ്ങളിൽ ഇത് ശ്രദ്ധ കേന്ദ്രീകരിക്കും. ചികിത്സയുടെ മറ്റ് സ്രോതസ്സുകളുമായി ഇത് എങ്ങനെ സംയോജിപ്പിക്കാമെന്നത് ഡോക്യുമെന്ററിയിൽ വിശകലനം ചെയ്യും. ഗവേഷണം പൂർത്തിയാകാൻ ഇനിയും ഒരു വർഷമെടുക്കും,” അനൂപ് പറയുന്നു.
കേരളത്തിലെ പ്രമുഖ സാമൂഹികപരിഷ്കർത്താവും ആത്മീയനേതാവുമായ ശ്രീനാരായണ ഗുരുവിനെ അടിസ്ഥാനമാക്കിയുള്ള ഒരു വെബ് സീരീസുമുണ്ട്. “അദ്ദേഹത്തിന്റെ ആദ്യകാല ശിഷ്യന്മാരുടെയും സഹകാരികളുടെയും വീക്ഷണകോണിൽ നിന്നുള്ള ദർശകന്റെ ചിത്രീകരണമായിരിക്കുമിത് എന്ന അർത്ഥത്തിൽ ഇത് വ്യത്യസ്തമായിരിക്കും,” ഗുരുവിന്റെ ഉപദേശങ്ങൾ ജീവിതത്തിൽ അനുകരിക്കാൻ ശ്രമിക്കുന്ന അനൂപ് വ്യക്തമാക്കുന്നു.
*തൊഴിലും ജീവിതവും സന്തുലിതമാകുമ്പോൾ*
ആളുകളുടെ കഴിവ് വിലയിരുത്തിയ ശേഷം ഉത്തരവാദിത്തങ്ങൾ ഏൽപ്പിക്കുന്നതാണ് മനസ്സമാധാനത്തിന്റെയും ബിസിനസ്സും കുടുംബകാര്യങ്ങളും സന്തുലിതമാക്കുന്നതിന്റെ രഹസ്യമാണെന്ന് അദ്ദേഹം പറയുന്നു. സമ്മർദ്ദം കുറയ്ക്കുന്നതിനും പുനഃരുജ്ജീവിപ്പിക്കുന്നതിനുമുള്ള ഒരു മികച്ച ചികിത്സാ ഉപകരണം കൂടിയാണ് പുല്ലാങ്കുഴൽ. എല്ലാ ദിവസവും അനൂപ് ഓടക്കുഴൽ വായിക്കാൻ സമയം ചിലവഴിക്കുന്നു. ഒരു ഭക്തിഗാനമോ വാക്യമോ വായിക്കാൻ കഴിയുന്നതിനാൽ ഇതിന് ആത്മീയമായ ഒരു മാനം കൂടിയുണ്ട്, എഴുത്തുകാരൻ കൂടിയായ അദ്ദേഹം പറയുന്നു. തന്റെ ജീവിതാനുഭവങ്ങളും രസകരമായ കഥകളും മറ്റും വിവരിച്ച് അദ്ദേഹം ഒരു പുസ്തകം എഴുതിയിട്ടുണ്ട്. “സംരംഭകൻ, ചലച്ചിത്രനിർമ്മാതാവ്, സാമൂഹിക പ്രവർത്തകൻ എന്നീ നിലകളിൽ എന്റെ ജീവിതത്തിൽ നിന്നുള്ള വശങ്ങൾ ഉൾക്കൊള്ളുന്നതിനാൽ ഇത് തീർച്ചയായും പ്രചോദനകരമാണ്,” അനൂപ് പറയുന്നു. ഡിസി ബുക്‌സാണ് പുസ്തകം പുറത്തിറക്കുന്നത്, നവംബറിൽ നടക്കുന്ന ഷാർജാഅന്താരാഷ്ട്ര പുസ്തകമേളയിൽ വച്ച് പുസ്തകപ്രകാശനം നടക്കും