വലിയ രാഷ്ട്രീയ ചലനങ്ങൾ സൃഷ്ടിച്ച സിഎംആർഎൽ-എക്സാലോജിക് സാമ്പത്തിക ഇടപാട് കേസിൽ മുൻ മുഖ്യമന്ത്രിയും സി.പി.എം പോളിറ്റ് ബ്യൂറോ അംഗവുമായ പിണറായി വിജയൻ, അദ്ദേഹത്തിന്റെ മകൾ വീണ വിജയൻ, മുൻ മന്ത്രിയും സി.പി.എം നേതാവുമായ പി.എ. മുഹമ്മദ് റിയാസ് എം.എൽ.എ എന്നിവർക്കെതിരെ അന്വേഷണത്തിന് വഴിതുറക്കുന്നു. എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി) സംസ്ഥാന പോലീസ് മേധാവിക്ക് നൽകിയ കത്തിന്റെ അടിസ്ഥാനത്തിലാണ് നടപടികൾ ആരംഭിക്കുന്നത്.

മുഖ്യമന്ത്രിയുമായി നടത്തിയ നിർണായക കൂടിക്കാഴ്ചയ്ക്ക് ശേഷമാണ് ആഭ്യന്തരമന്ത്രി രമേശ് ചെന്നിത്തല സംസ്ഥാന പോലീസ് മേധാവിക്ക് (ഡി.ജി.പി) ആവശ്യമായ നിർദേശം നൽകിയത്. ഇ.ഡി കത്തിലെ വിവരങ്ങൾ പരിശോധിച്ച ശേഷം നിലവിൽ എഫ്.ഐ.ആർ രജിസ്റ്റർ ചെയ്യാതെ പ്രാഥമിക അന്വേഷണം നടത്താനാണ് പോലീസ് ലക്ഷ്യമിടുന്നത്.

ഖനന കമ്പനിയായ സിഎംആർഎല്ലിൽ നിന്ന് സേവനം നൽകാതെ മാസപ്പടിയായി തുക കൈപ്പറ്റി എന്ന ആരോപണമാണ് വീണയുടെ ഉടമസ്ഥതയിലുള്ള എക്സാലോജിക് കമ്പനിക്കെതിരെ ഉയർന്നത്. കേസിൽ ഉയർന്ന സാമ്പത്തിക ഇടപാടുകളും അഴിമതി നിരോധന നിയമത്തിന്റെ പരിധിയിൽ വരുന്ന വിഷയങ്ങളും ചൂണ്ടിക്കാട്ടിയാണ് ഇ.ഡി സംസ്ഥാന പോലീസിന് കത്തയച്ചത്. അന്വേഷണ റിപ്പോർട്ടിന്റെയും ലഭിക്കുന്ന തെളിവുകളുടെയും അടിസ്ഥാനത്തിലാകും തുടർനടപടികൾ സ്വീകരിക്കുക.

Photo Courtesy: Google/ images are subject to copyright