സംസ്ഥാനത്ത് കൊവിഡ് വ്യാപനത്തിന് കാരണം തദ്ദേശ തിരഞ്ഞെടുപ്പാണെന്ന് ആരോഗ്യമന്ത്രി.
സംസ്ഥാനത്ത് കൊവിഡ് വ്യാപനത്തിന് കാരണം തദ്ദേശ തിരഞ്ഞെടുപ്പാണെന്ന് ആരോഗ്യമന്ത്രി കെ കെ ശൈലജ. കേരളത്തെ കുറ്റപ്പെടുത്തുന്നത് കാര്യങ്ങള് വിശകലനം ചെയ്യാതെയാണെന്നും ആരോഗ്യമന്ത്രി പറഞ്ഞു.
രോഗനിയന്ത്രണത്തിന് സംസ്ഥാനത്ത് പൊലീസ് നടപടി ശക്തമാക്കുമെന്നും മന്ത്രി അറിയിച്ചു. സംസ്ഥാനത്ത് രോഗപരിശോധന കുറവല്ലെന്നും മന്ത്രി അഭിപ്രായപ്പെട്ടു.
അതേസമയം രാജ്യത്തെ 70 ശതമാനം കൊവിഡ് കേസുകളും കേരളത്തിലും മഹാരാഷ്ട്രയിലുമാണെന്ന് കേന്ദ്ര ആരോഗ്യമന്ത്രി ഹര്ഷ് വര്ദ്ധന് അറിയിച്ചു. കഴിഞ്ഞ 24 മണിക്കൂറിനിടെ 11,556 പുതിയ കേസുകളാണ് സ്ഥിരീകരിച്ചത്. ഇതുവരെ രാജ്യത്ത് ജനിതകമാറ്റം സംഭവിച്ച 153 കൊവിഡ് കേസുകളാണ് സ്ഥിരീകരിച്ചത്. കഴിഞ്ഞ 24 മണിക്കൂറില് രാജ്യത്ത് 123 മരണങ്ങളുണ്ടായി. ഇതില് 20 എണ്ണം കേരളത്തിലാണ്. ഇതോടെ രാജ്യത്തെ ആകെ കൊവിഡ് മരണങ്ങള് 1,53,847 ആയി ഉയര്ന്നിരിക്കുകയാണ്.
രാജ്യത്താകെ കൊവിഡ് കുറയുന്നുണ്ടെങ്കിലും കേരളത്തില് വ്യാപനം വര്ദ്ധിക്കുകയാണ്. ഒരാഴ്ചയ്ക്കിടെ 1,05,533 പേര്ക്കാണ് രാജ്യത്ത് രോഗം സ്ഥിരീകരിച്ചത്. ഇതില് 41,918ഉം കേരളത്തിലാണ്. ആകെ രോഗികളില് 39.7 ശതമാനവും കേരളത്തിലാണ്. രാജ്യത്ത് ഒരാഴ്ചയ്ക്കിടെ 18568 രോഗികളുടെ എണ്ണം കുറഞ്ഞപ്പോള് കേരളത്തില് 2463 പേര് വര്ദ്ധിച്ചു.
Photo Courtesy : Google/ images are subject to copyright