രാജ്യാന്തര ചലച്ചിത്ര മേളയ്ക്ക് നാളെ തിരി തെളിയും
27-ാ മത് ഐ.എഫ്.എഫ്.കെയ്ക്ക് വെള്ളിയാഴ്ച തുടക്കമാകും. വൈകിട്ട് 3.30ന് നിശാഗന്ധി ഓഡിറ്റോറിയത്തില് മുഖ്യമന്ത്രി പിണറായി വിജയന് ഉദ്ഘാടനം ചെയ്യും. ചടങ്ങില് സാംസ്കാരിക വകുപ്പ് മന്ത്രി വി.എന്.വാസവന് അധ്യക്ഷനാകും. ബ്രിട്ടീഷ് ഫിലിം ഇന്സ്റ്റിറ്റ്യൂട്ടിലെ റെസിഡന്റ് പിയാനിസ്റ്റ് ജോണി ബെസ്റ്റ് വിശിഷ്ടാതിഥിയാകും.
ഇറാനില് സ്ത്രീകളുടെ അവകാശങ്ങള്ക്കുവേണ്ടി പൊരുതുന്ന സംവിധായിക മഹ്നാസ് മുഹമ്മദിക്ക് സ്പിരിറ്റ് ഓഫ് സിനിമ അവാര്ഡ് നല്കി മുഖ്യമന്ത്രി ആദരിക്കും. പൊതുവിദ്യാഭ്യാസ, തൊഴില് വകുപ്പ് മന്ത്രി വി.ശിവന്കുട്ടി, ഗതാഗതവകുപ്പ് മന്ത്രി ആന്റണി രാജുവിന് നല്കിക്കൊണ്ട് ഫെസ്റ്റിവല് ബുക്ക് പ്രകാശനം ചെയ്യും. ഭക്ഷ്യ, പൊതുവിതരണ വകുപ്പ് മന്ത്രി ജി.ആര് അനില് മേയര് ആര്യാ രാജേന്ദ്രന് നല്കിക്കൊണ്ട് ഫെസ്റ്റിവല് ബുള്ളറ്റിന് പ്രകാശനം ചെയ്യും. ചലച്ചിത്ര സമീക്ഷയുടെ ഫെസ്റ്റിവല് പതിപ്പ് അഡ്വ.വി.കെ പ്രശാന്ത് എം.എല്.എ, കെ.എസ്.എഫ്.ഡി.സി ചെയര്മാന് ഷാജി എന് കരുണിന് നല്കി പ്രകാശനം ചെയ്യും. ഫെസ്റ്റിവല് ഡയറക്ടറും ചലച്ചിത്ര അക്കാദമി ചെയര്മാനുമായ രഞ്ജിത്, വൈസ് ചെയര്മാന് പ്രേംകുമാര്, ഫെസ്റ്റിവല് എക്സിക്യുട്ടീവ് ഡയറക്ടറും അക്കാദമി സെക്രട്ടറിയുമായ സി.അജോയ്, ആര്ട്ടിസ്റ്റിക് ഡയറക്ടര് ദീപിക സുശീലന് എന്നിവര് ചടങ്ങില് പങ്കെടുക്കും.
ഡിസംബര് 9 മുതല് 16 വരെ എട്ടു ദിവസങ്ങളിലായി നടക്കുന്ന മേളയില് 70 രാജ്യങ്ങളില്നിന്നുള്ള 186 സിനിമകള് പ്രദര്ശിപ്പിക്കും. അന്താരാഷ്ട്ര മല്സരവിഭാഗത്തില് 14 സിനിമകളും മലയാള സിനിമ റ്റുഡേ വിഭാഗത്തില് 12 ചിത്രങ്ങളും ഇന്ത്യന് സിനിമ നൗ വിഭാഗത്തില് ഏഴ് സിനിമകളും പ്രദര്ശിപ്പിക്കും. ലോകസിനിമാ വിഭാഗത്തില് 78 സിനിമകള് പ്രദര്ശിപ്പിക്കും. 12 സിനിമകളുടെ ലോകത്തിലെ ആദ്യപ്രദര്ശനത്തിന് മേള വേദിയാവും. 14 തിയേറ്ററുകളിലായാണ് പ്രദര്ശനം നടക്കുക.
Photo Courtesy : Google/ images are subject to copyright