ആൻഡമാൻ നിക്കോബാർ ദ്വീപസമൂഹങ്ങളിലെ ആഴക്കടലിൽ വീണ്ടും വൻ പ്രകൃതിവാതക ശേഖരം കണ്ടെത്തിയതായി കേന്ദ്രസർക്കാർ സ്ഥിരീകരിച്ചു. രാജ്യത്തിന്റെ എണ്ണ, വാതക പര്യവേക്ഷണ മേഖലയിൽ നിർണായകമായ ഈ മുന്നേറ്റം പൊതുമേഖലാ സ്ഥാപനമായ ഓയിൽ ഇന്ത്യ ലിമിറ്റഡ് ആണ് നടത്തിയത്. ആൻഡമാൻ കടലിൽ കമ്പനി നടത്തുന്ന മൂന്നാമത്തെ പര്യവേക്ഷണ കിണറായ ‘ശ്രീ വിജയപുരം-3’ ലാണ് ഈ പുതിയ ഇന്ധന നിക്ഷേപം കണ്ടെത്തിയിരിക്കുന്നത്. ആൻഡമാൻ ദ്വീപുകളുടെ കിഴക്കൻ തീരത്തുനിന്ന് ഏകദേശം 15 കിലോമീറ്റർ അകലെ, 355 മീറ്റർ ആഴമുള്ള കടൽ മേഖലയിലാണ് ഈ നേട്ടം കൈവരിച്ചത്.

കേന്ദ്ര പെട്രോളിയം-പ്രകൃതിവാതക വകുപ്പ് മന്ത്രി ഹർദീപ് സിംഗ് പുരിയാണ് രാജ്യത്തിന് വലിയ പ്രതീക്ഷ നൽകുന്ന ഈ വാർത്ത ഔദ്യോഗികമായി പുറത്തുവിട്ടത്. പര്യവേക്ഷണ കിണറ്റിൽ 1900 മീറ്ററിലധികം ആഴത്തിൽ നടത്തിയ പ്രാഥമിക ഉൽപ്പാദന പരിശോധനയിൽ, പ്രകൃതിവാതകത്തിന്റെ സാന്നിധ്യം വിജയകരമായി തെളിയിക്കാൻ സാധിച്ചിട്ടുണ്ട്. ഈ പര്യവേക്ഷണ ക്യാമ്പയിനിൽ ഓയിൽ ഇന്ത്യ ലിമിറ്റഡ് കുഴിച്ച മൂന്ന് കിണറുകളിൽ രണ്ടിലും ഹൈഡ്രോകാർബണിന്റെ സാന്നിധ്യം കണ്ടെത്താനായത് ഭാവിയിൽ ഈ മേഖലയിലുണ്ടാകാൻ പോകുന്ന വലിയ വികസന സാധ്യതകളിലേക്കാണ് വിരൽ ചൂണ്ടുന്നത്. നേരത്തെ 2025 സെപ്റ്റംബറിലും ഇതേ ബ്ലോക്കിലെ രണ്ടാമത്തെ കിണറ്റിൽ പ്രകൃതിവാതകം കണ്ടെത്തിയിരുന്നു.

ആൻഡമാൻ കടൽത്തീരം വലിയ തോതിൽ പ്രകൃതിവാതകത്താൽ സമ്പന്നമാണെന്ന ശാസ്ത്രീയ വിലയിരുത്തലുകൾ ശരിവെക്കുന്നതാണ് പുതിയ കണ്ടെത്തലുകൾ. നിലവിൽ ഇന്ത്യയുടെ ഊർജ്ജ ആവശ്യങ്ങൾക്കായി വൻതോതിൽ എൽ.എൻ.ജി (ലിക്വിഫൈഡ് നാച്ചുറൽ ഗ്യാസ്) വിദേശ രാജ്യങ്ങളിൽ നിന്ന് ഇറക്കുമതി ചെയ്യുകയാണ് ചെയ്യുന്നത്. ഈ കണ്ടെത്തൽ പൂർണ്ണതോതിൽ പ്രയോജനപ്പെടുത്താൻ സാധിച്ചാൽ വിദേശ രാജ്യങ്ങളെ ആശ്രയിക്കുന്നത് ഗണ്യമായി കുറയ്ക്കാനും വലിയ രീതിയിൽ വിദേശനാണ്യം ലാഭിക്കാനും ഇന്ത്യക്ക് സാധിക്കും. വരും നാളുകളിൽ രാജ്യത്തെ വ്യവസായശാലകളിലും വാഹനങ്ങളിലും ഇന്ധനമായും, വീടുകളിൽ പാചകവാതകമായും ഇത് ഉപയോഗിക്കാൻ സാധിക്കുന്നതോടെ വലിയൊരു സാമ്പത്തിക നേട്ടമാണ് ഇന്ത്യയെ കാത്തിരിക്കുന്നത്.

രാജ്യത്തെ ആഴക്കടൽ പര്യവേക്ഷണം ശക്തമാക്കുന്നതിനായി പ്രധാനമന്ത്രി നരേന്ദ്ര മോദി പ്രഖ്യാപിച്ച ‘സമുദ്ര മന്തൻ ദൗത്യത്തിന്’ ലഭിച്ച ഏറ്റവും വലിയ അംഗീകാരം കൂടിയാണ് ഈ വിജയം. പുതിയതായി കണ്ടെത്തിയ വാതകത്തിന്റെ ഗുണനിലവാരം, ഘടന, വാണിജ്യപരമായ മൂല്യം എന്നിവ വിലയിരുത്തുന്നതിനായി വിശദമായ ശാസ്ത്രീയ പഠനങ്ങളും പരിശോധനകളും ഓയിൽ ഇന്ത്യ ലിമിറ്റഡ് ഇപ്പോൾ ആരംഭിച്ചിട്ടുണ്ട്. അന്താരാഷ്ട്ര തലത്തിലുള്ള ആഴക്കടൽ പര്യവേക്ഷണ വിദഗ്ധരുമായി സഹകരിച്ച് ഈ മേഖലയിലെ വാതക ശേഖരം പൂർണ്ണമായും പുറത്തെടുക്കാനുള്ള കൂടുതൽ വിപുലമായ പദ്ധതികളാണ് കേന്ദ്രസർക്കാർ ഇനി ലക്ഷ്യമിടുന്നത്. ഇതിലൂടെ ആൻഡമാൻ നിക്കോബാർ മേഖല ഇന്ത്യയുടെ ഭാവി ഇന്ധന ഹബ്ബായി മാറുമെന്നാണ് പ്രതീക്ഷിക്കപ്പെടുന്നത്.

Photo Courtesy: Google/ images are subject to copyright