ന്യൂഡൽഹി: രാജ്യത്ത് നീറ്റ് (NEET-UG) പുനഃപരീക്ഷ നടക്കാനിരിക്കെ ചോദ്യപേപ്പർ ചോർച്ചയും തട്ടിപ്പുകളും തടയുന്നതിനായി കർശന നടപടികളുമായി കേന്ദ്ര സർക്കാർ. ജനപ്രിയ മെസേജിങ് ആപ്പായ ടെലഗ്രാമിന് ഇന്ത്യയിൽ താൽക്കാലിക നിയന്ത്രണം ഏർപ്പെടുത്തിക്കൊണ്ട് ഐടി മന്ത്രാലയം ഉത്തരവിറക്കി. ജൂൺ 22 വരെയാണ് രാജ്യത്ത് ടെലഗ്രാം ആക്സസ് പരിമിതപ്പെടുത്തിയിരിക്കുന്നത്.

ചോദ്യപേപ്പർ ചോർച്ചയുമായി ബന്ധപ്പെട്ട് വിവിധ സംസ്ഥാനങ്ങളിൽ അന്വേഷണം പുരോഗമിക്കുന്ന പശ്ചാത്തലത്തിലാണ് ഈ അസാധാരണ നടപടി. ‘നീറ്റ് പേപ്പർ ലീക്ക്’, ‘Re-NEET 2026’ തുടങ്ങിയ പേരുകളിൽ പ്രവർത്തിച്ചിരുന്ന നിരവധി വ്യാജ ടെലഗ്രാം ചാനലുകളും ബോട്ടുകളും അധികൃതർ ഇതിനോടകം തന്നെ പ്ലാറ്റ്‌ഫോമിൽ നിന്നും നീക്കം ചെയ്തിട്ടുണ്ട്. പണം വാങ്ങി ചോദ്യപേപ്പർ നൽകാമെന്ന് വാഗ്ദാനം ചെയ്ത് വിദ്യാർഥികളെയും രക്ഷിതാക്കളെയും കബളിപ്പിക്കുന്ന സംഘങ്ങൾ സജീവമായതോടെയാണ് കേന്ദ്രത്തിന്റെ ഇടപെടൽ.

കൂടാതെ, സന്ദേശങ്ങൾ അയച്ച ശേഷം തിരുത്താൻ സഹായിക്കുന്ന ടെലഗ്രാമിലെ ‘മെസേജ് എഡിറ്റ്’ ഫീച്ചറും ജൂൺ 30 വരെ ഇന്ത്യയിൽ പ്രവർത്തനരഹിതമാക്കിയിട്ടുണ്ട്. തെളിവുകൾ നശിപ്പിക്കുന്നതും വ്യാജ പ്രചാരണങ്ങൾ നടത്തുന്നതും തടയാനാണ് ഈ നീക്കം.

അതേസമയം, ടെലഗ്രാം വഴിയും മറ്റ് സമൂഹമാധ്യമങ്ങൾ വഴിയും ചോദ്യപേപ്പർ ലഭ്യമാക്കാമെന്ന് പ്രചരിക്കുന്ന വാഗ്ദാനങ്ങൾ പൂർണ്ണമായും തട്ടിപ്പാണെന്ന് നാഷണൽ ടെസ്റ്റിങ് ഏജൻസി (NTA) അറിയിച്ചു. പരീക്ഷാ പ്രക്രിയ പൂർണ്ണമായും സുരക്ഷിതമാണെന്നും ഇത്തരം വ്യാജ സംഘങ്ങളുടെ കെണിയിൽ വീഴരുതെന്നും വിദ്യാർത്ഥികൾക്കും രക്ഷിതാക്കൾക്കും എൻടിഎ കർശന മുന്നറിയിപ്പ് നൽകി.

Photo Courtesy: Google/ images are subject to copyright