സംസ്ഥാനത്ത് വലിയ രാഷ്ട്രീയ വിവാദങ്ങൾക്ക് വഴിവെച്ച കേന്ദ്ര സർക്കാരിന്റെ ‘പിഎം ശ്രീ’ (PM SHRI) പദ്ധതിയുമായി കേരളത്തിന് മുന്നോട്ട് പോകാമെന്ന് പൊതുവിദ്യാഭ്യാസ ഡയറക്ടറുടെ റിപ്പോർട്ട്. പദ്ധതി നടപ്പിലാക്കുന്നതിനായി സംസ്ഥാനത്തിന്റെ നിലവിലുള്ള വിദ്യാഭ്യാസ നയത്തിൽ യാതൊരുവിധ മാറ്റങ്ങളും വരുത്തേണ്ടി വരില്ലെന്ന് പൊതുവിദ്യാഭ്യാസ ഡയറക്ടർ പുതിയ വിദ്യാഭ്യാസ മന്ത്രി എൻ. ഷംസുദ്ദീന് സമർപ്പിച്ച റിപ്പോർട്ടിൽ വ്യക്തമാക്കുന്നു.

 കേന്ദ്ര നിബന്ധനകൾ പ്രകാരമുള്ള സമഗ്ര ശിക്ഷാ കേരളം (SSK) ഫണ്ട് സംസ്ഥാനത്തെ പൊതുവിദ്യാഭ്യാസ മേഖലയ്ക്ക് അത്യന്താപേക്ഷിതമാണെന്നും, പിഎം ശ്രീ പദ്ധതിയുമായി സഹകരിച്ചില്ലെങ്കിൽ ഈ ഫണ്ടുകൾ പൂർണ്ണമായി മുടങ്ങുമെന്നും റിപ്പോർട്ടിൽ മുന്നറിയിപ്പ് നൽകുന്നുണ്ട്. അതേസമയം, കേന്ദ്ര പദ്ധതി വന്നാലും നിലവിലെ എസ്‌സിഇആർടി (SCERT) പാഠപുസ്തകങ്ങൾ തന്നെ ഉപയോഗിച്ച് കുട്ടികളെ പഠിപ്പിച്ചാൽ മതിയെന്നും റിപ്പോർട്ട് ഉറപ്പുനൽകുന്നു.

രണ്ടാം പിണറായി സർക്കാരിന്റെ കാലത്ത് പിഎം ശ്രീ പദ്ധതിയുമായി മുന്നോട്ട് പോകാൻ ആദ്യഘട്ടത്തിൽ ശ്രമങ്ങൾ നടന്നിരുന്നെങ്കിലും, എൽഡിഎഫ് മുന്നണിയിൽ നിന്ന് ഉൾപ്പെടെ ഉയർന്ന കടുത്ത എതിർപ്പുകളെ തുടർന്ന് അന്ന് വിദ്യാഭ്യാസ വകുപ്പ് പിൻവാങ്ങുകയായിരുന്നു. പിന്നീട് 2025 ഒക്ടോബർ 16-ന് മന്ത്രിസഭയോ മുന്നണിയോ അറിയാതെ അന്നത്തെ മുഖ്യമന്ത്രിയും വിദ്യാഭ്യാസ മന്ത്രിയും മുൻകൈയെടുത്ത് പദ്ധതിയുടെ ധാരണാപത്രത്തിൽ ഒപ്പുവെച്ചത് വലിയ വിവാദങ്ങൾക്ക് കാരണമായി.

കേന്ദ്രത്തിന്റെ പുതിയ വിദ്യാഭ്യാസ നയം സംസ്ഥാനത്ത് അടിച്ചേൽപ്പിക്കപ്പെടുമെന്ന ആശങ്കയായിരുന്നു അന്ന് പ്രധാനമായും ചർച്ച ചെയ്യപ്പെട്ടിരുന്നത്. എന്നാൽ ഈ ആശങ്കകൾക്ക് അടിസ്ഥാനമില്ലെന്ന ഉറപ്പോടെ പൊതുവിദ്യാഭ്യാസ ഡയറക്ടറുടെ റിപ്പോർട്ട് പുതിയ മന്ത്രിക്ക് മുൻപാകെ എത്തിയ സാഹചര്യത്തിൽ, പദ്ധതി നടപ്പാക്കുന്ന കാര്യത്തിൽ സംസ്ഥാന സർക്കാർ കൈക്കൊള്ളുന്ന അന്തിമ തീരുമാനം എന്തായിരിക്കുമെന്ന് ഉറ്റുനോക്കുകയാണ് കേരളം.

Photo Courtesy: Google/ images are subject to copyright