സംസ്ഥാനത്തെ പൊലീസ് സ്റ്റേഷനുകൾ കൂടുതൽ ജനസൗഹൃദമാക്കുന്നതിന്റെ ഭാഗമായി ‘എന്റെ പൊലീസ് സ്റ്റേഷൻ’ പദ്ധതിക്ക് ഓഗസ്റ്റ് 15 മുതൽ തുടക്കമാകുന്നു. സ്റ്റേഷനുകളുടെ പ്രവർത്തനങ്ങളിൽ സമഗ്രമായ മാറ്റം വരുത്തുന്നതിന്റെ ഭാഗമായിട്ടാണ് ആഭ്യന്തര വകുപ്പിന്റെ പുതിയ പദ്ധതിയെന്ന് ആഭ്യന്തരമന്ത്രി രമേശ് ചെന്നിത്തല വാർത്താസമ്മേളനത്തിൽ അറിയിച്ചു. ഇതിന്റെ ഭാഗമായി സ്റ്റേഷൻ ഹൗസ് ഓഫീസർ (SHO) സംവിധാനത്തിലും മാറ്റങ്ങൾ കൊണ്ടുവരും.

പുതിയ ക്രമീകരണമനുസരിച്ച് പൊലീസ് സ്റ്റേഷനുകളുടെ പ്രധാന ചുമതല സബ് ഇൻസ്പെക്ടർമാർക്ക് (SI) കൈമാറും. അതേസമയം, സംസ്ഥാനത്തെ പ്രധാനപ്പെട്ട 63 പൊലീസ് സ്റ്റേഷനുകളുടെ ഭരണം മാത്രമായിരിക്കും ഇൻസ്പെക്ടർമാരുടെ (CI) കീഴിൽ വരുന്നത്. പൊലീസ് സ്റ്റേഷനുകളുടെ ദൈനംദിന പ്രവർത്തനങ്ങൾ കൂടുതൽ കാര്യക്ഷമമാക്കാനും ജനങ്ങൾക്ക് എളുപ്പത്തിൽ പ്രാപ്യമാക്കാനും ഈ പരിഷ്കാരം സഹായിക്കുമെന്ന് മന്ത്രി വ്യക്തമാക്കി.

അതേസമയം, ഐപിഎസ് ഉദ്യോഗസ്ഥൻ എസ്. ശ്രീജിത്തിന് സ്ഥാനക്കയറ്റം നൽകിയത് നിയമപരമായ എല്ലാ മാനദണ്ഡങ്ങളും കൃത്യമായി പരിശോധിച്ച ശേഷമാണെന്ന് ആഭ്യന്തരമന്ത്രി പറഞ്ഞു. ഇതിൽ ആർക്കും പ്രത്യേക ആനുകൂല്യമോ സഹായമോ നൽകിയിട്ടില്ല. കേസ് പരിഗണിച്ചപ്പോൾ ഹൈക്കോടതിയിൽ ഹാജരായ അഭിഭാഷകൻ വിഷയത്തിലെ കൃത്യമായ വസ്തുതകൾ വ്യക്തമാക്കാതിരുന്നതാവാം കോടതിയുടെ പരാമർശത്തിന് ഇടയാക്കിയതെന്നും രമേശ് ചെന്നിത്തല തിരുവനന്തപുരത്ത് കൂട്ടിച്ചേർത്തു.

Photo Courtesy: Google/ images are subject to copyright