ഒക്ടോബർ ഒന്നു മുതൽ രാജ്യത്തെ സാമ്പത്തിക, ധനകാര്യ മേഖലകളിൽ സുപ്രധാന മാറ്റങ്ങൾ പ്രാബല്യത്തിൽ വരുന്നു. ബാങ്കിങ് സേവനങ്ങൾ, എടിഎം ചാർജുകൾ, എൽപിജി ഇന്ധന സബ്‌സിഡി, യുപിഐ ഇടപാടുകൾ, മ്യൂച്വൽ ഫണ്ട്/എഫ്ഡി നിയമങ്ങൾ എന്നിവയിലാണ് കേന്ദ്ര സർക്കാരും ആർബിഐയും മാറ്റങ്ങൾ വരുത്തുന്നത്.

പ്രധാന മാറ്റങ്ങൾ ഒറ്റനോട്ടത്തിൽ:

എസ്ബിഐ എടിഎം ഇടപാടുകൾ: എസ്ബിഐ ശമ്പള പാക്കേജ് അക്കൗണ്ട് ഉടമകൾക്ക് മറ്റ് ബാങ്ക് എടിഎമ്മുകളിലും ADWM മെഷീനുകളിലും ലഭിച്ചിരുന്ന സൗജന്യ പ്രതിമാസ ഇടപാടുകളുടെ പരിധി 10-ൽ നിന്ന് അഞ്ചായി കുറയും. ബേസിക് സേവിങ്സ് അക്കൗണ്ടുകളിൽ (BSBD) പ്രതിമാസം സൗജന്യമായി നടത്താവുന്ന നാല് പണം പിൻവലിക്കലുകൾക്ക് ശേഷം ഓരോ ഇടപാടിനും 15 രൂപയും ജിഎസ്ടിയും ഈടാക്കും. എന്നാൽ ഡിജിറ്റൽ ഇടപാടുകൾ പൂർണമായും സൗജന്യമായി തുടരും.

എൽപിജി സബ്‌സിഡിക്ക് ബയോമെട്രിക് ആധാർ ഓതന്റിക്കേഷൻ: സബ്‌‌സിഡിയുള്ള ഗാർഹിക എൽപിജി സിലിണ്ടറുകൾ തുടർന്നും ലഭിക്കുന്നതിന് ഉപഭോക്താക്കൾ ബയോമെട്രിക് ആധാർ ഓതന്റിക്കേഷൻ പൂർത്തിയാക്കൽ നിർബന്ധമാക്കി.

യുപിഐ എംഡിആർ നിരക്കുകൾ: ഒക്ടോബർ 15 മുതൽ 2,000 രൂപയ്ക്ക് മുകളിലുള്ള ചില വ്യാപാരി യുപിഐ ഇടപാടുകൾക്ക് മെർച്ചന്റ് ഡിസ്കൗണ്ട് റേറ്റ് (MDR) ബാധകമാകും. എന്നാൽ 2,000 രൂപ വരെയുള്ള ഇടപാടുകൾക്കും ചെറുകിട വ്യാപാരികൾക്കും ഇത് സൗജന്യമായിരിക്കും.

ബൾക്ക് FD നിയമങ്ങൾ: വാണിജ്യ ബാങ്കുകൾ ബൾക്ക് ഡിപ്പോസിറ്റുകളുടെ പലിശ നിരക്കുകൾ മുൻകൂട്ടി വെളിപ്പെടുത്തണമെന്നും ദിവസേന രാവിലെ 10 മണിക്ക് പ്രസിദ്ധീകരിക്കണമെന്നും ആർബിഐ നിർദേശിച്ചു.

എൻപിഎസ് നിരക്കുകൾ: നാഷണൽ പെൻഷൻ സിസ്റ്റം (NPS), എൻപിഎസ് ലൈറ്റ് എന്നിവയിൽ പോയിന്റ്സ് ഓഫ് പ്രസൻസ് (PoP) ഈടാക്കുന്ന ചാർജുകളിൽ PFRDA വരുത്തിയ മാറ്റങ്ങളും ഒക്ടോബർ 1 മുതൽ പ്രാബല്യത്തിൽ വരും.

Photo Courtesy: Google/ images are subject to copyright