2029-ലെ ലോക്സഭാ തിരഞ്ഞെടുപ്പിന് മുൻപായി ബിജെപി നേതൃത്വത്തിലുള്ള എൻഡിഎ ഭരണത്തിലുള്ള 21 സംസ്ഥാനങ്ങളിലും ഏകീകൃത സിവിൽ കോഡ് (യുസിസി) നടപ്പിലാക്കുമെന്ന് കേന്ദ്ര ആഭ്യന്തര മന്ത്രി അമിത് ഷാ പ്രഖ്യാപിച്ചു. പ്രധാനമന്ത്രി നരേന്ദ്ര മോദിയുടെ ജന്മദിനമായ സെപ്റ്റംബർ 17 മുതൽ ആരംഭിക്കുന്ന ഒരു മാസം നീളുന്ന ‘സേവാ സങ്കൽപ് അഭിയാൻ’ പരിപാടികളുടെ വിശദാംശങ്ങൾ വ്യക്തമാക്കവേയാണ് അദ്ദേഹം ഇക്കാര്യം അറിയിച്ചത്.

പല സംസ്ഥാനങ്ങളിലും ഏകീകൃത സിവിൽ കോഡ് ഇതിനകം തന്നെ അവതരിപ്പിച്ചു കഴിഞ്ഞുവെന്ന് മുംബൈയിൽ മാധ്യമങ്ങളോട് സംസാരിക്കവേ അമിത് ഷാ ചൂണ്ടിക്കാട്ടി. 2029-ന് മുൻപായി എൻഡിഎ സഖ്യം അധികാരത്തിലുള്ള 21 സംസ്ഥാനങ്ങളിലും യുസിസി വിജയകരമായി നടപ്പിലാക്കാൻ സാധിക്കുമെന്ന് തനിക്ക് പൂർണ്ണ ഉറപ്പുണ്ടെന്നും അദ്ദേഹം കൂട്ടിച്ചേർത്തു.

നിലവിൽ 19 സംസ്ഥാനങ്ങളിലും രണ്ട് കേന്ദ്രഭരണ പ്രദേശങ്ങളിലും എൻഡിഎ സഖ്യമാണ് ഭരണത്തിലുള്ളത്. ഇതിൽ ഉത്തരാഖണ്ഡ്, ഗുജറാത്ത്, അസം തുടങ്ങിയ സംസ്ഥാനങ്ങളിൽ ഇതിനകം തന്നെ യുസിസി നിയമനിർമ്മാണം പൂർത്തിയാക്കുകയോ നടപ്പിലാക്കുകയോ ചെയ്തിട്ടുണ്ട്. മധ്യപ്രദേശിൽ ഇതിനായി പ്രത്യേക കരട് സമിതിക്ക് രൂപം നൽകുകയും ചെയ്തിട്ടുണ്ട്.

പ്രധാനമന്ത്രിയായും ഗുജറാത്ത് മുഖ്യമന്ത്രിയായും മോദി 25 വർഷത്തെ ഭരണകാലം തികയ്ക്കുന്നതിന്റെ ഭാഗമായാണ് സെപ്റ്റംബർ 17 മുതൽ ഒക്ടോബർ 17 വരെ രാജ്യവ്യാപകമായി “സേവാ സങ്കൽപ് അഭിയാൻ” സംഘടിപ്പിക്കുന്നത്. എൻഡിഎ സഖ്യകക്ഷികളും വിവിധ സന്നദ്ധ സംഘടനകളും കാമ്പെയ്നിൽ അണിനിരക്കും. ഒരു സംസ്ഥാനത്തിന്റെ മുഖ്യമന്ത്രിയായും തുടർന്ന് രാജ്യത്തിന്റെ പ്രധാനമന്ത്രിയായും കാൽ നൂറ്റാണ്ട് കാലം തടസ്സമില്ലാതെ പൊതുസേവനം നടത്താൻ കഴിഞ്ഞ അപൂർവ്വം നേതാക്കളിൽ ഒരാളാണ് നരേന്ദ്ര മോദിയെന്നും എല്ലാ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും താഴെത്തട്ട് വരെ ഈ പ്രചാരണം വ്യാപിപ്പിക്കുമെന്നും ആഭ്യന്തര മന്ത്രി വ്യക്തമാക്കി.

Photo Courtesy: Google/ images are subject to copyright