ചലച്ചിത്ര നടന് അനില് പി. നെടുമങ്ങാട് മുങ്ങിമരിച്ചു.
ചലച്ചിത്ര നടന് അനില് പി. നെടുമങ്ങാട് മുങ്ങിമരിച്ചു. തൊടുപുഴ മലങ്കര ഡാമില് വച്ചാണ് മരണം സംഭവിച്ചത്. ഡാം സൈറ്റില് കുളിങ്ങാനിറങ്ങിയ അനില് കയത്തില്പ്പെട്ടു പോകുകയായിരുന്നു. സിനിമ ചിത്രീകരണത്തിനിടെ സുഹൃത്തുക്കളോടൊപ്പം ഡാമില് കുളിക്കാനിറങ്ങിയപ്പോള് കയത്തില് പെടുകയായിരുന്നു.
ഒപ്പമുണ്ടായിരുന്നവരും നാട്ടുകാരും ചേര്ന്ന് ഏറെ ശ്രമപ്പെട്ട് അദ്ദേഹത്തെ കരയില് എത്തിച്ചു. തൊടുപുഴയിലെ സ്വകാര്യആശുപത്രിയില് പ്രവേശിപ്പിച്ചെങ്കിലും മരണം സംഭവിച്ചിരുന്നു. മലങ്കര ടൂറിസ്റ്റ് ഹബിലാണ് അപകടം നടന്നത്. മലങ്കര ഡാമില് പലയിടത്തും ആഴത്തിലുള്ള കുഴികളുണ്ട്. ഇതിലൊന്നിലേക്ക് അദ്ദേഹം മുങ്ങിപോയതാണ് മരണകാരണം എന്ന് നാട്ടുകാര് പറയുന്നു.
സച്ചി സംവിധാനം ചെയ്ത് ‘അയ്യപ്പനും കോശിയും’ എന്ന ചിത്രത്തില് പോലീസ് ഓഫീസറുടെ റോളില് ഗംഭീര പ്രകടനം നടത്തിയ അനില് പ്രേക്ഷക പ്രശംസ നേടിയിരുന്നു. കൂടാതെ ആഭാസം, കിസ്മത്, പൊറിഞ്ചു മറിയം ജോസ്, തെളിവ്, പാവാട, കമ്മട്ടിപ്പാടം, പാപം ചെയ്യാത്തവര് കല്ലെറിയട്ടെ തുടങ്ങിയ സിനിമകളിലും വേഷമിട്ടിട്ടുണ്ട്. വെള്ളിയാഴ്ച വൈകിട്ട് അഞ്ചു മണിക്കാണ് തൊടുപുഴ മുട്ടത്തിന് സമീപം മലങ്കര അണക്കെട്ടില് അനില് മുങ്ങിപ്പോയത്. കുളിക്കാനിറങ്ങിയ അനില് കയത്തില് മുങ്ങിത്താഴുകയായിരുന്നു. ഒപ്പമുണ്ടായിരുന്ന പാലാ സ്വദേശികളായ സുഹൃത്തുക്കള് നാട്ടുകാരെ വിവരമറിയിച്ചു.
പ്രദേശവാസിയായ യുവാവ് ഓടിയെത്തി എട്ട് മിനിറ്റുകൊണ്ട് അനിലിനെ കരയ്ക്ക് എത്തിച്ചു. ഉടനടി ആശുപത്രിയില് എത്തിച്ചെങ്കിലും, ജീവന് രക്ഷിക്കാനായില്ല. തൊടുപുഴയില് ജോജു ജോര്ജ് നായകനായ ‘പീസ്’ എന്ന ചിത്രത്തിന്റെ ഷൂട്ടിംഗിലായിരുന്നു അനില്. ചിത്രത്തില് ഒരു മുഴുനീള പൊലീസുദ്യോഗസ്ഥന്റെ വേഷമായിരുന്നു അനിലിന്.
തൊടുപുഴയിലെ താലൂക്കാശുപത്രിയിലെ മോര്ച്ചറിയിലാണ് അദ്ദേഹത്തിന്റെ മൃതദേഹം സൂക്ഷിച്ചിരിക്കുന്നത്. ഇന്ന് അദ്ദേഹത്തിന്റെ പോസ്റ്റ്മോര്ട്ടം നടക്കും. കൊവിഡ് പരിശോധനാ ഫലം ലഭിച്ച ശേഷം കോട്ടയം മെഡിക്കല് കോളജിലായിരിക്കും പോസ്റ്റ്മോര്ട്ടം. അതിന് ശേഷം മൃതദേഹം നാടായ നെടുമങ്ങാട്ടേക്ക് കൊണ്ടുപോകും.
നാടകവേദി സിനിമയ്ക്ക് നല്കിയ പുതിയ തലമുറ അഭിനയപ്രതിഭകളില് ശ്രദ്ധേയനായിരുന്നു അനില് നെടുമങ്ങാട്. മുപ്പതോളം സിനിമകളിലേ വേഷമിട്ടുള്ളൂവെങ്കിലും അഭിനയിച്ച കഥാപാത്രങ്ങളൊക്കെ വ്യത്യസ്തത കൊണ്ടും വ്യക്തിത്വം കൊണ്ടും ആസ്വാദകപ്രശംസ നേടിയിരുന്നു. നെടുമങ്ങാട് അരശുപറമ്ബ് സുരഭിയില് പരേതനായ പീതാബരന്നായരുടെയും ഓമനയുടെയും മകനാണ് അനില്.ആയുര്വേദ ഡോക്ടര് ആനന്ദ് സഹോദരനാണ്. മൃതദേഹം കോട്ടയത്ത് പോസ്റ്റ് മോര്ട്ടത്തിന് ശേഷം വൈകുന്നേരം നെടുമങ്ങാട് വീട്ടുവളപ്പില് എത്തിച്ചു സംസ്കരിക്കും.
Photo Courtesy : Google/ images are subject to copyright