പ്രധാനമന്ത്രി നരേന്ദ്ര മോദിയുടെ യുഎഇ സന്ദർശനത്തിനിടെ ഇരുരാജ്യങ്ങളും തമ്മിൽ ഒപ്പുവെച്ച രണ്ട് നിർണായക ധാരണാപത്രങ്ങൾ ഇന്ത്യയുടെ ഊർജ്ജ സുരക്ഷയ്ക്ക് വലിയ കരുത്താകും. അസംസ്കൃത എണ്ണ ആവശ്യത്തിന്റെ 90 ശതമാനത്തോളവും ഇറക്കുമതി ചെയ്യുന്ന രാജ്യമാണ് ഇന്ത്യ. ഭൗമരാഷ്ട്രീയ തർക്കങ്ങൾ, കപ്പൽ ഗതാഗത തടസ്സങ്ങൾ, ഉപരോധങ്ങൾ, വിലക്കയറ്റം എന്നിവ രാജ്യത്തെ എപ്പോഴും പ്രതികൂലമായി ബാധിക്കാറുണ്ട്. 

അടുത്തിടെയുണ്ടായ അന്താരാഷ്ട്ര തർക്കങ്ങളെത്തുടർന്ന് ഹോർമുസ് കടലിടുക്ക് വഴിയുള്ള എണ്ണ വിതരണം തടസ്സപ്പെട്ടപ്പോൾ ഇന്ത്യ ഈ പ്രതിസന്ധി നേരിട്ടതാണ്. ഈ സാഹചര്യത്തിലാണ് ഇന്ത്യയ്ക്കായി തന്ത്രപ്രധാനമായ പെട്രോളിയം ശേഖരം നിർമ്മിക്കുന്നതിനും ദീർഘകാല എൽപിജി, എൽഎൻജി വിതരണം ഉറപ്പാക്കുന്നതിനുമുള്ള പുതിയ കരാറുകൾ നിലവിൽ വരുന്നത്. ഇന്ത്യൻ സന്ദർശനത്തിനിടെ പ്രധാനമന്ത്രി നരേന്ദ്ര മോദിയും യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാനും നടത്തിയ ഉഭയകക്ഷി ചർച്ചയിലാണ് ഈ ചരിത്രപരമായ തീരുമാനങ്ങൾ ഉണ്ടായത്.

തന്ത്രപ്രധാന പെട്രോളിയം ശേഖരവും എൽപിജി വിതരണവും

ഇന്ത്യൻ സ്ട്രാറ്റജിക് പെട്രോളിയം റിസർവ്സ് ലിമിറ്റഡും (ISPRL) അബുദാബി നാഷണൽ ഓയിൽ കമ്പനിയും (ADNOC) തമ്മിലാണ് ആദ്യ ധാരണാപത്രം ഒപ്പുവെച്ചത്. ഇതുപ്രകാരം ഇന്ത്യയിലെ വിശാഖപട്ടണം, മംഗലാപുരം, ചണ്ഡീഖോൾ എന്നിവിടങ്ങളിലെ തന്ത്രപ്രധാന സംഭരണശാലകളിൽ യുഎഇയുടെ സഹകരണത്തോടെ പെട്രോളിയം ശേഖരം വർദ്ധിപ്പിക്കും. കൂടാതെ യുഎഇയിലെ ഫുജൈറയിലും ഇന്ത്യയ്ക്കായി ക്രൂഡ് ഓയിൽ സംഭരിക്കുന്നതിനുള്ള സാധ്യതകൾ കരാറിലുണ്ട്. ഇത് ഹോർമുസ് കടലിടുക്കിലെ പ്രതിസന്ധികളെ മറികടക്കാൻ ഇന്ത്യയെ സഹായിക്കും.

ഇന്ത്യൻ ഓയിൽ കോർപ്പറേഷനും (IOCL) അഡ്നോക്കും (ADNOC) തമ്മിൽ ഒപ്പുവെച്ച രണ്ടാമത്തെ കരാർ രാജ്യത്തെ ദീർഘകാല എൽപിജി (LPG), എൽഎൻജി (LNG) വിതരണം സുരക്ഷിതമാക്കാൻ ലക്ഷ്യമിട്ടുള്ളതാണ്.

5 ബില്യൺ ഡോളറിന്റെ നിക്ഷേപം; ബന്ധം കൂടുതൽ ശക്തം

ഊർജ്ജം, പ്രതിരോധം, ഇൻഫ്രാസ്ട്രക്ചർ, ഷിപ്പിംഗ്, അത്യാധുനിക സാങ്കേതികവിദ്യ (AI സൂപ്പർകമ്പ്യൂട്ടിംഗ്) തുടങ്ങിയ സുപ്രധാന മേഖലകളിൽ ഒപ്പുവെച്ച ഈ കരാറുകൾ ഇന്ത്യ-യുഎഇ തന്ത്രപ്രധാന പങ്കാളിത്തത്തിന് പുതിയ വേഗത നൽകുമെന്ന് പ്രധാനമന്ത്രി നരേന്ദ്ര മോദി വ്യക്തമാക്കി.

ഇതിന് പുറമെ, ഇന്ത്യയുടെ അടിസ്ഥാന സൗകര്യ വികസന മേഖലയിലും ബാങ്കിംഗ് മേഖലയിലുമായി 5 ബില്യൺ ഡോളറിന്റെ (ഏകദേശം 41,000 കോടിയിലധികം രൂപ) വൻ നിക്ഷേപം നടത്തുമെന്ന് യുഎഇ പ്രഖ്യാപിച്ചതും ഇരുരാജ്യങ്ങളും തമ്മിലുള്ള സാമ്പത്തിക ബന്ധം കൂടുതൽ ശക്തമാക്കും. ആഗോള ഊർജ്ജ വിപണിയിലെ അനിശ്ചിതത്വങ്ങൾക്കിടയിലും ഇന്ത്യയുടെ ആഭ്യന്തര ആവശ്യങ്ങൾക്ക് തടസ്സമില്ലാത്ത ഇന്ധന ലഭ്യത ഉറപ്പാക്കാൻ ഈ സന്ദർശനം വഴി സാധിക്കുമെന്നാണ് വിലയിരുത്തൽ.

Photo Courtesy: Google/ images are subject to copyright