കൂടത്തായി കൊലപാതക പരമ്പര കേസിൻ്റെ വാദം വെള്ളിയാഴ്‌ച പ്രിന്‍സിപ്പല്‍ ജില്ല കോടതി കേള്‍ക്കും. കൂടാതെ സിലി, റോയ്‌ കേസിലെ ജോളിയുടെ ജാമ്യഹർജിയും വെള്ളിയാഴ്‌ച പരിഗണിക്കും. ചൊവ്വാഴ്​ച കേസ്‌ പരിഗണനക്കെടുത്തെങ്കിലും കഴിഞ്ഞ ദിവസം നല്‍കിയ അനുബന്ധ കുറ്റപത്രം പരിശോധിച്ച്‌​ തുടര്‍നടപടിയിലേക്ക്​ പോകാന്‍ തീരുമാനിക്കുകയായിരുന്നു.

നോട്ടറി അഭിഭാഷകന്‍ സി.വിജയകുമാറിനെ അഞ്ചാം പ്രതിയാക്കി റോയ്‌ വധക്കേസിലാണ്​ അനുബന്ധ കുറ്റപത്രം ​പൊലീസ്​ സമര്‍പ്പിച്ചത്​‌. വിജയകുമാറിന്‌ സമന്‍സ്‌ അയക്കുന്നതടക്കമുള്ള നടപടികള്‍ പുതിയ കുറ്റപത്രത്തിന്മേല്‍ വാദം കേട്ടശേഷം തീരുമാനിക്കും.

റിമാന്‍ഡില്‍ കഴിയുന്ന ജോളിയെയും എം.എസ്‌. മാത്യുവിനെയും ചൊവ്വാഴ്​ച കോടതിയില്‍ ഹാജരാക്കിയില്ല. മറ്റു​ പ്രതികളായ പ്രജികുമാര്‍, മനോജ്‌ എന്നിവര്‍ ഹാജരായി. പ്രോസിക്യൂഷനുവേണ്ടി സ്‌പെഷല്‍ പബ്ലിക്‌ പ്രോസിക്യൂട്ടര്‍ എന്‍.കെ. ഉണ്ണികൃഷ്‌ണന്‍, പ്രതിഭാഗത്തിനായി എം.ഷഹീര്‍ സിങ്‌, ടി.ടി.ഹിജാസ്‌, പി.കെപ്രശാന്ത്‌ തുടങ്ങിയവര്‍ ഹാജരായി.

Photo Courtesy : Google/ images are subject to copyright